Genese

13 E KUA aere mairā Aberama, e tana vaine, ma te au apinga nana ra, e Lota katoa, mei Aiphiti mai ki te pae i apatonga i Kanaana ra.

2 E apinga maata roa ta Aberama i te puaka, i te ario, e te auro.

3 E kua aere ua oki aia i tona aerenga, mei apatonga mai, e ki Betela roa, ki te ngai i patiaiaʼi tona puakapa i muatangana ra, i rotopu i te va i Betela e Ai;

4 Ki te ngai tana i akatu i te atarau i muatangana ra: e kua tautopa iorā Aberama i te ingoa o Iehova i reira.

5 E ko Lota oki, ko tei aere katoa raua ko Aberama, e mamoe katoa tana, e te puaka-toro, e te au puakapa.

6 Kare akera raua e o i te enua kia okotai ua ngai i te noo anga: i te maata oki o ta raua apinga, kare atura e tika kia kapiti katoa te raua noo anga.

7 E kua tupu iora oki te tauetonoanga i te au tiaki puaka a Aberama, e te au tiaki puaka a Lota ra. E te noo ra te ngati Kanaana, e te Perizi i taua enua ra.

8 E kua tuatua mairā Aberama kia lota, Teia taku tuatua kia koe, auraka roa to taua ei tauetonoanga, e ta toku nei au tangata tiaki puaka, e te au tangata tiaki puaka noo ra; okotai oki o taua kopu-tangata.

9 Kare ainei te vai ua io na te enua katoa nei i mua ia koe? Ka akataka atu ana koe iaku nei; kia na te pae kaui koe, ko au te na te pae katau; e kia na te pae katau koe, ko au te na te pae kaui.

10 E kua nānā akerā Lota i tona mata ki runga, e kitea atura i te ngai maniania katoa i Ioridana ra, e tae roa atura ki Zoara, (kare oki Sodoma e Gomora i mate ia Iehova i reira,) e e ngai meitaki i te vai e pini ua ake, mei te kainga o Iehova ra, e mei te enua ra mei Aiphiti.

11 E kua rave iorā Lota i taua ngai maniania katoa i Ioridana ra nona, e aere atura Lota ki te pae i te itinga o te rā ra.

12 Noo iorā Aberama i taua enua ra i Kanaana; e noo aturā Lota i te au oire i taua ngai maniania ra, patia iora i tona puakapa i vaitata i Sodoma.

13 E kino maata ra to te au tangata o Sodoma, e te rave maata i te ara ki mua i te aroaro o Iehova.

14 E riro aturā Lota, kua tuatua mairā Iehova kia aberama, Ka nānā ana i to mata ki runga i tena ngai taau e noo na, ka akara, i te pae i apatokerau, e te pae i apatonga, e te pae i te itinga o te rā ra, e te pae i te opunga o te rā:

15 Ko te reira katoa ra oki enua taau e akara na, e orongaia ïa e au noou, e no toou na uanga, e tuatau ua atu.

16 E ka akaaite oki au i toou na uanga mei te ungaunga-one o te enua nei; e kia ope te ungaunga-one o te enua nei i te tatauia e te tangata ra, ei reira katoa toou uanga e ope ei i te tatauia.

17 Ka tu, ka aere na te tiroa o taua enua nei, e na te tipoto; ka oronga oki au i te reira noou.

18 Kua kiriti akerā Aberama i tona puakapa i reira, e aere atura, e noo atura ki te au ale i Mamera i vaitata ki Heberona ra; e kua akatu aia i tetai atarau na Iehova i reira.