1 Ariki

12 AERE aturā Rehoboama ki Sikema: kua ope rava oki to Iseraela i te tae mai ki Sekema e akaariki iaia.

2 E kite akerā Ieroboama te tamaiti a Nebata i te noo anga i Aiphiti ra; (i oro oki aia ki reira i mua i te aroaro o te ariki ra o Solomona, e kua noo oki a Ieroboama i Aiphiti ra;)

3 Kua tono akera ratou e tiki iaia. Kua aere mairā Ieroboama e to Iseraela katoa, e tuatua kia Rehoboama, na ko atura,

4 E teiaa rava to te zugo a to metua i runga ia matou: e tenana, e akamāmā ake ana koe i te angaanga maata a to metua, e te zugo teiaa tana i tuku mai ki runga ia matou nei, ka tavini atu ei matou ia koe i reira.

5 Kua tuatua maira aia kia ratou, E aere kotou, e kia po toru ra, ka oki akaou mai ei kiaku nei. Aere atura taua aronga tangata ra.

6 Kua ui akera te ariki ra ko Rehoboama ki te aronga tangata metua i tu ki mua i tona metua ia Solomona i te ora anga ra, na ko akera, Eaa ta kotou tuatua kia karanga atu au ki teianei aronga?

7 Kua tuatua maira ratou kiaia, na ko maira, Ei tavini koe no teianei aronga tangata i teianei rā, ka tavini atu ei koe kia ratou, e kia karangaranga atu koe kia ratou, e ei tuatua meitaki taau e karanga atu kia ratou, ka riro ïa ratou ei tavini noou e tuatau ua atu.

8 Akaruke akera aia i te tuatua a taua aronga tangata metua i tuku mai kiaia ra, e kua ui atura ki te au tangata ou, okotai rai pakari katoa anga ma ia katoa, e ko tei tu oki i mua iaia:

9 Kua karanga atura aia kia ratou, Eaa ta kotou tuatua, kia karanga atu tatou ki teianei aronga, ko tei tuatua mai kiaku nei, tei na koe mai e, E akamāmā ana koe i te zugo i tukuia mai e to metua ki runga ia matou nei?

10 Kua tuatua maira taua aronga tangata ou ra, okotai rai pakari katoa anga ma ia katoa ra, na ko maira, E na ko atu koe ki te au tangata i tuatua mai kia koe ra, ko tei tuatua mai e, E teiaa maata to te zugo ta to metua i tuku mai ki runga ia matou nei, e tamāmā mai koe i taua zugo ra ia matou nei; e na ko atu koe kia ratou, Ka maata toku maikao-rima iti nei i te taukupu o toku metua:

11 Kua tuku rai oki toku metua i te zugo teiaa ki runga ia kotou, ka maata rava ra ta kotou zugo iaku; i pāpā toku metua ia kotou ki te pāpā tikai, ka pāpā ra au ia kotou ki te sekopio.

12 Kua aere mairā Ieroboama e te tangata katoa kia Rehoboama ra i te po toru, ta te ariki oki i tuatua maira, ka tuatua mai ei ra e, E oki akaou mai kotou kia tae ki te po toru.

13 Kua tuatua taivaiva maira te ariki ki taua aronga tangata ra, akaruke akera oki aia i te tuatua ta te au tangata metua i tuatua ra;

14 E kua karanga atura aia kia ratou i te tuatua a te au tangata ou, na ko atura, Kua akateimaa toku metua i te zugo ki runga ia kotou, e akamaata ra au i taua zugo no kotou na; i pāpā oki toku metua ia kotou ki te pāpā tikai, ka pāpā ra au ia kotou ki te sekopio.

15 Kare atura te ariki i akarongo i taua au tangata ra: no ko mai oki ia Iehova ra taua mea nei, kia tupu tana tuatua ta Iehova i tuatua ia Ahia i Silo ra, kia Ieroboama te tamaiti a Nebata ra.

16 E kite akera to Iseraela katoa e, kare te ariki i akarongo mai ia ratou, kua karanga atura te au tangata ki te ariki ra, na ko atura, Eaa ta matou puapinga ia Davida nei? kare a matou tuanga i te tamaiti a Iese: ei to kotou au puakapa, e Iseraela e; e tenana, e Davida, e roi i toou uaorai ngutuare. Aere anake atura to Iseraela ki to ratou au puakapa.

17 Kareka te tamariki a Iseraela i noo i te au oire i Iuda ra, e au to Rehoboama ki runga ia ratou.

18 Kua tono akera te ariki ra ko Rehoboama ia Adorama, no runga aia i te apinga uipa ra; peîia iora aia e to Iseraela katoa ki te toka, mate rava akera; kua akamaroiroi iora te ariki ra ko Rehoboama kia tae aia ki runga i te kariota, e oro ki Ierusalema.

19 Kaitamaki iora Iseraela i te ngutuare o Davida, e tae rava akenei ki teianei rā.

20 Kite akera to Iseraela ravarai e kua oki mai a Ieroboama, kua tono akera i te tiki iaia e aere mai ki taua uruoaanga ra, e kua akaariki iaia ki runga ia Iseraela katoa: kare rava e tangata i aru i te ngutuare o Davida, mari ra ko te kopu o Iuda anake ra.

21 E tae akerā Rehoboama ki Ierusalema, kua akaputuputu maira aia i to te ngutuare o Iuda, e to te kopu o Beniamina, okotai anere e varu ngauru i te tausani, ko te aronga toa i ikiia ïa, e tamaki i te ngutuare o Iseraela, e akaoki mai i te au kia Rehoboama te tamaiti a Solomona ra.

22 Kua tae maira te tuatua a te Atua ki te tangata no te Atua ra kia Semaia, na ko maira,

23 E karanga atu ki te ariki o Iuda kia Rehoboama e tamaiti a Solomona ra, e te ngutuare katoa o Iuda raua ko Beniamina ra, e te toenga o te au tangata ra, e na ko atu,

24 Te na ko mairā Iehova, Auraka kotou e tae, auraka oki te tamaki ki to kotou ai taeake ki te tamariki a Iseraela; ka oki te tangata ravarai ki tona uaorai ngutuare; naku oki taua mea nei. Kua akarongo akera ratou i taua tuatua a Iehova ra; e kua oki ratou kua aere, ta Iehova oki i tuatua maira.

25 Kua akatu akerā Ieroboama i te oire ra ia Sekema, i te maunga ra i Epheraima, e kua noo oki ki reira; e kua aere atura aia, e kua akatu akera ia Penuela.

26 Te tuatua ua rā Ieroboama i roto i tona uaorai ngakau, Ei teianei ka oki ei te basileia ki te ngutuare o Davida:

27 Kia tae teianei aronga tangata ki Ierusalema e apai i te atinga ki te are o Iehova, ka riro i te oki akaou te ngakau o teianei aronga ki to ratou pu tikai ra kia Rehoboama, ki te ariki o Iuda ra, e ka ta ratou iaku, ka oki akaou atu ei ki te ariki o Iuda kia Rehoboama ra.

28 Kua kimi iora te ariki i te ravenga, e kua anga iora i nga punua puakatoro auro e rua ra, e kua karanga atura ki to Iseraela, Angaanga maata ta kotou i te aere ua anga ki Ierusalema; i na to atua, e Iseraela e, ko tei arataki mai ia koe mei te enua maira mei Aiphiti.

29 Kua tuku iora aia i tetai i Betela, e kua vaoo iora tetai i Dana.

30 Riro atura taua mea ra ei ara: aere anake atura te au tangata e akamori i tetai e tae ua atura ki Dana.

31 Kua akatu iora aia i te are tapu i te ngai teitei, e kua akariro i to roto i te tangata rikiriki ei taunga, kare to te au tamariki a Levi ra.

32 Kua akono aturā Ieroboama i te oroa, i te varu o te marama, i te rā okotai ngauru ma rima o taua marama ra, mei te oroa i Iuda ra; e kua apai aia i te atinga ki runga i te atarau tana i akatu i Betela ra, ei atinga na nga punua puakatoro i angaia e ia ra, e kua akanoo aia i te aronga taunga i Betela, no te au ngai teitei tana i akatu ra.

33 Kua apai aia i te atinga ki runga i te atarau i akatuia e ia i Betela ra, i te rā okotai ngauru ma rima i te varu o te marama, koia te marama tei kimiia e tona uaorai ngakau; e kua akono aia i te oroa na te tamariki a Iseraela: e kua apai aia i te atinga ki runga i te atarau, e kua tutungi i te atinga kakara.