2 Ariki

11 KITE akerā Atalia te metua vaine o Ahazia ra e, kua mate tana tamaiti, kua tu akera aia, e kua pou iaia i te ta te uanga ariki katoa ra.

2 Karekā Iehoseba, te tamaine a te ariki ra a Iorama, e tuaine oki no Ahazia ra, kua rave akera ia Ioasa te tamaiti a Ahazia, i keiaia e ia no roto i te au tamariki a te ariki i taia ra; e kua uuna akera ratou iaia, koia katoa ma te ikiiki nona, ki roto i tetai pia moe, ia Atalia, kare akerai aia i taia.

3 Ngaro iora aia ma ia katoa i roto i te are o Iehova e ono mataiti. Riro akera te au ia Atalia i taua enua ra.

4 Kia tae ra ki te itu o te mataiti, kua tono akerā Iehoiada e tiki i te au tutara o te au anere, e te au rangatira, e te aronga vaeau, e kua arataki mai ia ratou kiaia ki roto i te are o Iehova, e kua papau i te koreromotu kia ratou, e kua tuku i te taputou kia ratou i roto i te are o Iehova. Kua akakite akera aia kia ratou i te tamaiti a te ariki.

5 Kua akaue atura aia ia ratou, karanga atura, Teia ta kotou e rave: ko te pae toru o kotou o te aronga e tomo mai ki roto i te sabati, ei tapapa ïa, i te ngai e tapapaʼi i te are o te ariki ra;

6 E tetai pae toru, ei te ngutupa ïa ei Sura; e tetai pae toru, ei te pa i muri mai i te aronga vaeau: e akapera kotou i te tapapa i te ngai e tapapaʼi i te are, kia kore e vavaʼiia.

7 E kia rua oki tuanga to te aronga katoa o kotou, e aere ki vao i te sabati: na ratou e tapapa i te ariki i te ngai e tapapaʼi i te are o Iehova.

8 E na kotou e takako rava i te ariki, te tangata katoa ma te au taoonga i te rima: e ko tei tomo mai ki roto i taua tupati tangata ra, kia mate atu ïa: ei vaitatao kotou i te ariki, kia tomo ki vao, e kia aere mai ki roto.

9 Kua akapera te au rangatira o te au anere, i ta Iehoiada taunga i akaue maira e ope ua ake: kua iki iora ratou i to ratou au tangata, i te tomo mai i te sabati, ratou katoa, e kua aere maira kia Iehoiada taunga ra.

10 Kua apai atura taua taunga ra i te au korare, e te au paruru, a te ariki ra a Davida, ki te au rangatira o te au anere ra, i roto i te are o Iehova.

11 Kua tu ua iora taua aronga vaeau ra ma te au taoonga katoa i te rima, tanao, tanao, e pini ua ake te ariki, mei tetai poo are i te pae katau ra e tae ua atura ki te poo are i te pae kaui, na te pae atarau e te are ra.

12 Kua arataki maira aia i te tamaiti a te ariki ra, e kua tuku i te korona ki runga iaia, e kua tuku iora i te ture kiaia; kua akaariki akera ratou iaia, e kua akatainu iaia; e kua pokarakara ratou i te rima, e kua tuatua akera, Kia ora te ariki.

13 E kite akerā Atalia i te mutamuta o te au vaeau e te tangata, kua aere maira aia ki te tangata ki roto i te are o Iehova:

14 Kua akara iora aia e i na, te tu ua maira te ariki i te pae pou, ko te ravenga tikai ïa, e i vaitata i te ariki ko te aronga mamaata ïa, e te aronga akatangi i te pu: rekareka rava akera te tangata katoatoa o te enua ra, e kua akatangi i te au pu. Kua aae iorā Atalia i ona kakau, kua kapiki atura, E kaitamaki, e kaitamaki.

15 Kua akaue akerā Iehoiada taunga i te au rangatira anere, te aronga rangatira i taua nuku ra, e karanga atura kia ratou, Arataki atu iaia ki vao i te tupati tangata ra: e te aru iaia ra, e ta ki te koke. I tuatua ana oki te taunga, Auraka aia e taia i roto i te are o Iehova.

16 Kua opu atura to ratou rima iaia; e tae atura aia ki te arataa e tomo ei te au oroenua i te are o te ariki ra: taia iora aia i reira.

17 Kua papau iorā Iehoiada i te koreromotu i te ariki raua ko Iehova e te au tangata ravarai, ei tangata ratou no Iehova; e tetai koreromotu oki i te au tangata e te ariki.

18 Kua tomo atura te au tangata katoa o te enua ki roto i te are o Baala, kua vavaʼi atu i te reira; i te au atarau e to reira au tiki, kua vavaʼi takiri ravaia e ratou; e kua ta atura i te taunga o Baala ra ko Matana ki mua i te au atarau ra. Kua akataka iora te taunga ra i te aronga akataoongaia i te are o Iehova.

19 Kua rave akera aia i te au rangatira anere, e te au tutara, e te au vaeau, e te tangata ravarai o te enua ra, e kua arataki maira ratou i te ariki ki raro, mei te are o Iehova maira, e kua na te ngutupa o te vaeau ra te aere ki roto i te are o te ariki. E kua noo iora aia ki runga i te terono o te ui ariki.

20 Mareka rava akera te tangata katoa o te enua ra: e te vai au ua ra te oire, mate ua ake a Atalia ki te koke i vaitata i te are o te ariki ra.

21 Tei te itu o to Ioasa mataiti i ariki ei aia.