1 Paraleipomeno
14 KUA tono maira te ariki o Turia ra ko Hirama i te au karere kia Davida, ma te rakau ra e arezi, e te aronga tarai toka, e te taunga tarai rakau, ei akatu i tetai are nona.
2 E kia akarā Davida e kua akatinamouia aia e Iehova ei ariki ki runga ia Iseraela, e kua akateitei ravaia tona au no tona ra au tangata no Iseraela;
3 Kua rave rai a Davida i etai vaine rai nana i Ierusalema, e kua anau mairai ta Davida tamariki tamaroa e te tamaine.
4 Teia oki te au ingoa o nga tamariki tana i anau i Ierusalema ra; ko Samua, e ko Sobaba, ko Natana, e ko Solomona,
5 E ko Ibahara, e ko Elisua, e ko Eliphaleta,
6 E ko Noga, e ko Nephega, e ko Iaphia,
7 E ko Elisama, e ko Beeliada, e ko Elipheleta.
8 E kite akera te Philiseti e kua akatainuiâ Davida ei ariki ki runga ia Iseraela katoa ra, kua aere anake maira te Philiseti e kimi ia Davida. Kite akera oki a Davida, kua aere atura e aravei ia ratou ra.
9 Tae maira oki te Philiseti e kua akamatoa iora ia ratou uaorai i te o ra ko Rephaima.
10 E kua ui aturā Davida ki te Atua, na ko atura, Ka aere ainei au ki runga e tamaki i te Philiseti? ka tuku mai ainei koe ia ratou ki toku rima nei? Kua tuatua mairā Iehova kiaia, E aere ki runga; ka tuku au ia ratou ki to rima na.
11 Kua aere atura ratou ki runga ki Baala-perazima, e kua ta iorā Davida ia ratou i reira. Kua tuatua akerā Davida, Kua ngaangaa rava io nei toku au enemi i te Atua i toku nei rima, mei te vai e ngaa ra: tapa iora i te ingoa o taua ngai ra ia Baala-perazima.
12 I reira to ratou au atua i te akaruke angaia, kua akaue aturā Davida, kua ka atura ïa ratou ki te ai.
13 Kua aere akaou maira oki te Philiseti, e kua akamatoa akaou ia ratou ua orai i taua o ra.
14 Kua ui akaou aturā Davida ki te Atua; kua tuatua maira te Atua kiaia, Auraka ratou e aruia; e anga ke ra koe ia ratou, ka na ko mai ei i te aere kia ratou na te pae Baka ra.
15 E kia akarongo koe i te ngaee anga i te kauru o taua au Baka ra, ka aere ei koe ka tamaki ei: kua riro oki te Atua kua na mua ia koe e ta i taua nuku Philiseti ra.
16 E kua perā Davida i ta te Atua i akaue mai kiaia ra; e kua ta iora ratou i te nuku Philiseti ra, mei Gibeona mai e tae ua atura ki Gezera ra.
17 Tutuki atura te rongo o Davida e pini ua ake te pa enua ravarai; kua tuku iorā Iehova i te mataku iaia ki runga i te pa enua katoa.