2 Paraleipomeno

12 E KETAKETA akera te basileia ia Rehoboama, kua maroiroi akera aia uaorai, kua akaruke iora aia, e Iseraela katoa, i te ture a Iehova.

2 E tae akera ki te rima o te mataiti o taua ariki ra, ko Rehoboama, kua aere maira te ariki o Aiphiti ra ko Sisaka e tamaki ia Ierusalema, no te mea kua ara ratou ia Iehova.

3 E te au kariota okotai ngauru ma rua i te anere, e ono ngauru i te tausani i te au tangata akaoro oroenua, e te aronga katoa i aere katoa mai mei Aiphiti maira, kare e ope kia tatau; to Lubia, to Suki, e to Kusa.

4 E rauka akera iaia te au oire i akaketaketaia i o Iuda ra, e aere maira ki Ierusalema.

5 Kua aere mairā Semaia peroveta kia Rehoboama ra, e te ui mataiapo katoa o Iuda i uipa i Ierusalema ia Sisaka, e kua karanga atura kia ratou, Te na ko mairā Iehova, Kua akaruke kotou iaku, e te akaruke katoa nei au ia kotou i te rima o Sisaka.

6 Kua taakaaka iora te ui mataiapo o Iseraela e te ariki ia ratou uaorai; e kua tuatua akera ratou, E tuatua-tika ta Iehova.

7 E kia akara mairā Iehova e, kua taakaaka ia ratou uaorai, kua tae maira te tuatua a Iehova kia Semaia, na ko maira, Kua taakaaka ratou ia ratou uaorai; e teianei kare ratou e pou iaku, ka oronga atura au i tetai manga ora iti no ratou; kare oki toku riri e maringi rava atu ki runga ia Ierusalema i te rima o Sisaka.

8 Ka riro ra ratou ei au tavini nona; kia kite ratou i taku angaanga, e te angaanga a te au basileia o te pa enua ra.

9 Kua aere maira te ariki o Aiphiti ra ko Sisaka ki Ierusalema e tamaki; e kua apai ke atura i te au apinga o te are o Iehova, e te au apinga o te are o te ariki ra; kua akaope rava atura aia: e kua apai katoa aia i te au paruru auro i angaia e Solomona.

10 Kua anga iora te ariki ko Rehoboama i te au paruru veo ei tupau, e kua tuku atura ki te rima o te rangatira o te vaeau, ko tei tiaki i te tomoanga o te are o te ariki ra.

11 E kua aere te ariki ki roto i te are o Iehova, kua tiki mai ïa te aronga vaeau, e kua akaoki mai ki roto i te pia vaeau.

12 E kia taakaaka aia iaia uaorai, kua anga ke akerā Iehova i tona riri iaia, kare akera i rave takiri mai iaia kia mate: e i Iuda katoa ra oki te tu meitaki katoa ra i reira.

13 Maroiroi akera te ariki ra ko Rehoboama, e au oki tona i Ierusalema Tei te a ngauru ma tai o te mataiti i riro ei te au ia Rehoboama, okotai ngauru ma itu ona mataiti i te ariki anga i Ierusalema, i te oire i ikiia e Iehova no roto i te au kopu katoa o Iseraela, ei vairanga no tona ra ingoa. E te ingoa o tona metua vaine, ko Naama ïa e ngati Amona.

14 E kua rave aia i te kino, no te mea kare tona ngakau i akono tikai i te kimi ia Iehova.

15 E te au tuatua ia Rehoboama, tei muatangana e tae ua atu ki te openga ra, kare ainei kua tataia ki roto i te tuatua a Semaia peroveta, e te tuatua anauanga a Ido akara ra? E tamaki rai ta Rehoboama raua ko Ieroboama kare i akapaki.

16 Kua moe iorā Rehoboama ki o tona ra ai metua, e tanumia iora i roto i te oire o Davida; tupauia iora aia i te au e tana tamaiti ra e Abia.