2 Paraleipomeno

2 KUA akakoro akerā Solomona e akatu i tetai are no te ingoa o Iehova, e tetai are katoa no tona basileia.

2 Kua tatau iorā Solomona i e itu ngauru i te tausani tangata ei apai apainga, e varu oki ngauru tausani tangata ei tarai toka i runga i te maunga, e toru oki tausani e ono anere ei akamaroiroi ia ratou.

3 Kua tono akerā Solomona i te karere ki te ariki i Turia ra kia Hirama, karanga atura, Mei taau takinga i toku metua ra ia Davida, e kua akau mai i te au arezi ei akatu i te are nona ei noo anga, e akapera katoa mai koe iaku nei.

4 I na oki au, te akatu nei au i tetai are no te ingoa o taku Atua no Iehova, ka akatapu ei nona ra, ei tutungi anga i te atinga kakara ki mua iaia, e no te kai o te aroaro vaoo tamou ra, e no te atinga karakaratio i te popongi e te aiai, i te au sabati, e te au marama ou ra, e no te au oroa tapu no to matou Atua no Iehova: ei akonoanga na Iseraela teia e tuatau ua atu.

5 E are maata oki taua are e akatuia e au nei, to matou Atua oki tei maata i te au atua katoa ra.

6 E tika oki iaai kia akatu i te are nona, i na oki te rangi nei, e te rangi o te au rangi ra, kare rai aia e o? koai oki au nei, ka akatu ei au i te are nona, mari ra ei tutungi anga atinga kakara ki mua iaia?

7 E tenana, e tono mai koe i tetai tangata karape i te rave i te auro, e te ario, e te veo, e te auri, e te kakau purapura, e te muramura, e te kerekere, e te kite oki i te kotikoti, kia rave katoa aia e te aronga karape katoa i oku nei i Iudea nei, e Ierusalema, tei akaputuputuia e taku metua e Davida.

8 E akau katoa mai i te au arezi, e te au berusi, e te au alamuga i Lebanona: kua kite oki au e toou te tangata i kite i te tipu i te rakau i Lebanona; e i na, ka kapiti katoa toku ra au tavini ki toou ra au tavini,

9 Ei akonokono i te rakau naku e kia maata: teia are nei oki taku e akatu nei, ka riro ei are maata e te tu ke.

10 E i na, ka oronga atu oki au ki toou ra au tavini e tipu i te rakau ra, okotai takau i te tausani i te kora sitona reruia, okotai takau i te tausani i te kora kerite, okotai takau oki te tausani i te bato wina, okotai takau oki i te tausani i te bato inu.

11 Kua tata maira te ariki o Turia ra ko Hirama i te tuatua tana i akau kia Solomona, No te mea e aroa to Iehova i tona iti-tangata, i akaariki ei aia ia koe ki runga ia ratou.

12 E kua karanga atu rai a Hirama, Kia akameitakiia te Atua o Iseraela ko Iehova, ko tei anga i te rangi e te enua; ko tei oronga mai i tetai tamaiti pakari ki te ariki ra kia Davida, tei iaia te karape e te kite, kia akatu i te are no Iehova, e te are oki no tona basileia.

13 E teianei, kua tonokia atu e au tetai tangata karape, e te kite maata, ko Hirama-abiu.

14 E tamaiti na tetai tamaine a Dana, no Turia tona metua tane, kua karape i te rave i te auro, e te ario, te veo, te auri, te toka, e te rakau, te kakau purapura, te mea kerekere, e te orongā meitaki, e te muramura; e i te kotikoti oki i te au kotikotianga katoa ra: e te kimi oki i te au ravenga katoa kia tuatuaia mai aia ra, e toou katoa ra oki au tangata karape, e te au tangata karape katoa a taku pu ra a to metua a Davida.

15 E teianei, i te sitona ra, e te kerite, te inu, e te wina ra, i tei tuatuaia mai e koe, e taku pu, e akau ua mai aia ki tona nei au tavini:

16 E na matou e tipu mai i te rakau i Lebanona ra, e kia ui roa koe; e na matou e paata mai kia koe na tai e ki Iopa; e naau e apai ki runga ki Ierusalema.

17 Kua tatau iorā Solomona i te au tangata katoa, koia te au tangata ke i te enua ra i Iseraela nei, mei te tatau anga i tatauiaʼi ratou e tona metua e Davida; e kua kitea iora, okotai anere e rima ngauru ma toru i te tausani, e ono oki anere.

18 E kua akono atura aia i to te reira, e itu ïa ngauru i te tausani ei apai apainga, e varu oki ngauru i te tausani ei tarai toka i runga i te maunga e toru oki tausani e ono anere i rungao ei akakite ki te tangata i te angaanga.