2 Paraleipomeno

22 AKAARIKIIA akera tana tamaiti openga ra ko Ahazia e to Ierusalema ei tupau mai i tona metua; kua taia oki nga tuakana e te takanava tangata i aere katoa ratou e to Arabia ki te puakapa. Riro atura te au ia Ahazia te tamaiti a Iehorama ariki no Iuda.

2 E rua takau ma rua o to Ahazia mataiti i ariki ei aia, okotai oki ona mataiti i te ariki anga i Ierusalema. Ko Atalia te ingoa o tona metua vaine, e utaro na Omeri.

3 Aere atura oki aia na te au arataa o te ngutuare o Ahaba: ko tona metua vaine te ako iaia i te rave i te kino ra.

4 I rave ei aia i te kino i mua i te aroaro o Iehova, mei te ngutuare o Ahaba ra: ko ratou oki tei ako iaia i muri ake i te matenga o tona metua, e mate atura aia uaorai.

5 Kua aite oki tona aerenga ki ta ratou i ako ra, e kua kapiti katoa aia ia Iorama, te tamaiti a Ahaba ariki o Iseraela, i te tamaki i te ariki o Arama ia Hazaela i Ramota-gileada: puta iorā Iorama i to Arama ra.

6 E kua oki iora aia ki Iezereela, kia akaoraia te au puta i putaʼi aia i Rama, ka tamaki ei aia i te ariki o Arama ia Hazaela. Kua aere iorā Ahazia te tamaiti a Iehorama ariki no Iuda, e akara ia Iorama te tamaiti a Ahaba i Iezereela, no te mea kua makiia aia.

7 Ko to Ahazia ïa mate i akonoia e te Atua, koia i aere kia Iorama: tae atura oki aia, kua aere katoa iora aia e Iorama katoa e tamaki ia Iehu te tamaiti a Nimesi, tei akatainuia e Iehova e tipu ke i te ngutuare o Ahaba.

8 E te akautunga rā Iehu i te ngutuare o Ahaba, e kitea iora te ui ariki o Iuda, e te au tamariki a te au taeake o Ahazia, ko tei tauturu ia Ahazia, kua ta atura aia ia ratou.

9 E kua kimi aia ia Ahazia: e rauka iora aia ia ratou, (kua pipini oki aia i roto i Samaria,) kua arataki maira iaia kia Iehu: e mate atura aia i te taia, kua tanu atura ratou iaia: kua tuatua akera ratou, No te mea e utaro aia na Iehosaphata, ko tei kimi ia Iehova ma tona ngakau katoa ra. Kare oki te ngutuare o Ahazia e maroiroi kia tāpu i te basileia.

10 Kite akerā Atalia te metua vaine o Ahazia ra e, kua mate tana tamaiti, kua tu akera aia, kua pou iaia i te ta te uanga ariki katoa o te ngutuare o Iuda.

11 Karekā Iehoseba, te tamaine a te ariki ra, kua rave akera ia Ioasa te tamaiti a Ahazia, i keiaia e ia no roto i te au tamariki a te ariki i taia ra, e kua tuku iaia e te ikiiki katoa nona ki roto i tetai pia moe. I perā Iehoseba te tamaine na te ariki ra na Iehorama, te vaine oki na Iehoiada taunga ra, ko te tuaine oki aia no Ahazia, i te uuna anga iaia ia Atalia, kare akera aia i ta iaia.

12 Ngaro iora aia ma ratou katoa i roto i te are o te Atua e ono mataiti. Riro akera te au ia Atalia i taua enua ra.