2 Paraleipomeno

28 KUA tae a Ahaza ki te tai takau i tona mataiti i ariki ei aia, okotai ngauru ma ono ona mataiti i te ariki anga i Ierusalema; kare ra aia i rave i te mea tika i mua i te aroaro o Iehova, mei tona tupuna ra mei ia Davida;

2 Aere atura ra aia na te arataa o te au ariki o Iseraela, e kua anga oki i te au idolo akatoia na Baala.

3 E kua tutungi aia i te atinga kakara i te o o te tamaiti a Hinoma, e kua tutungi i tana au tamariki i te ai, mei te au mea rikarika a te au etene, ko tei tuaruia e Iehova i mua i te aroaro o te tamariki a Iseraela ra.

4 Kua apai aia i te atinga, e kua tutungi i te atinga kakara ki runga i te au ngai teitei, e ki runga i te au tuaivi, e ki raro ake i te au rakau marumaru katoa ra.

5 I tuku ei tona Atua ko Iehova iaia ki te rima o te ariki o Arama ra; ta atura ratou iaia, e manganui te tangata i apai tuikaaia e ratou e kua apai ki Damaseko ra. E i tuku katoaia oki aia i te rima o te ariki o Iseraela, ko tei ta iaia ma te pou maata ra.

6 Mate iora oki ia Peka te tamaiti a Remalia i Iuda okotai anere e rua ngauru i te tausani i te rā okotai, e aronga toa anake; no te mea kua akaruke ratou i te Atua o to ratou ai metua ia Iehova.

7 E na tetai tangata ririnui no Epheraima na Zikeri, i tamate takiri i te tamaiti a te ariki ra ia Maaseia; e ia Azerikama te tutara o te are, e ia Elikana i vaitata i te ariki ra.

8 E na te tamariki a Iseraela i apai tuikaa i to ratou au taeake, e rua anere i te tausani, i te au vaine, te au tamaroa, e te au tamaine; e kua rave maira i ta ratou apinga e mea maata, e kua apai i te apinga ki Samaria.

9 I reira ra tetai peroveta a Iehova, ko Odeda te ingoa; e kua aere iora aia e aravei i taua nuku ra, i to ratou aerenga ki Samaria ra, e kua karanga atura kia ratou, I na, no te mea e riri to te Atua o to kotou ai metua to Iehova ia Iuda, i tuku mai ei aia ia ratou ki to kotou na rima, e kua ta makitakita ua kotou ia ratou e tae rava atura ki runga i te rangi ra.

10 E tenana te akakoro na kotou i te au tamariki a Iuda e Ierusalema, ei akariro ei tavini tane e ei tavini vaine no kotou; kare ainei e ara katoa to roto ia kotou uaorai i to kotou Atua ia Iehova?

11 E tenana, e akarongo mai ana kotou iaku, e akaoki rai kotou i tenana au tuikaa, i rave tuikaaia mai e kotou no roto i to kotou ai taeake na: tei runga rai oki ia kotou te riri maata o Iehova.

12 Ko tetai pae ui mataiapo no te au tamariki a Epheraima, ko Azaria te tamaiti a Iohanana, ko Berekia te tamaiti a Mesilemota, e ko Iehizakia te tamaiti a Saluma, e ko Amasa te tamaiti a Hadalai, kua tu maira ki runga kua patoi maira i taua aronga i aere mai mei te tamaki maira,

13 E kua tuatua maira kia ratou, Auraka kotou e arataki mai i tenana au tuikaa i ko nei; kua maata oki ta tatou ara i mua i te aroaro o Iehova, te anoano na kotou i te akamaata mai i to tatou kino e ta tatou ara; kua maata oki ta tatou ara, e te otooto ra te riri ia Iseraela.

14 Kua akaruke maira te au toa taoonga tamaki ra i te au tuikaa e te apinga, ki mua i te aroaro o te ui mataiapo e taua uipaanga katoa ra.

15 Kua tu maira te au tangata i akaikiia ra te ingoa, kua rave akera i te aronga tuikaa, e kua akakakau atura i te aronga i vai taaka ua ra, no roto i taua apinga ra; e kua akakakau oki ia ratou, e kua akatamaka oki ia ratou, e kua angai e kua akainu ia ratou, e kua akatainu oki ia ratou, e kua akauta i te aronga katoa i apikepike ra ki runga i te au asini, e kua kave ia ratou ki Ieriko, ki te oire nu tamara ra, ki to ratou ra au taeake; e kua oki atura ratou ki Samaria.

16 I reira to taua ariki ra to Ahaza tono anga i te karere ki te ui ariki o Asura, kia tupae mai ratou iaia.

17 Kua aere akaou mai oki te ngati Edoma, e kua ta ia Iuda, e kua apai keia te au tuikaa.

18 Kua akaratopuia oki te au oire i te tapere i raro ra e te Philiseti, e to te pae i apatonga i Iuda ra, e kua rauka ia ratou Bete-semesa, e Aialona, e Gederota, e Soko ma to reira au vila, e Timina ma to reira au vila, e Gimezo ma to reira au vila: e te noo ra oki i reira.

19 Kua tuku akaakaia iora oki Iuda e Iehova, no Ahaza no te ariki o Iseraela: kua mako kore oki Iuda iaia, kua maata rava oki tana ara ia Iehova.

20 Kua aere maira te ariki o Asura ko Tigelata-pilesera kiaia, kare ra aia i akaketaketa mai, e taeko ra iaia.

21 Kua rave iora oki a Ahaza i tetai apinga no roto i te are o Iehova, e no roto oki i te are o te ariki ra, e ta te aronga mataiapo, e kua oronga na te ariki o Asura ra; kare ra aia i tauturu mai iaia.

22 E kia rokoia aia e te tumatetenga ra, kua maata rava tana ara ia Iehova i reira: ko taua ariki ra ko Ahaza teia.

23 Kua apai oki aia i te atinga ki te au atua no Damaseko, ko tei ta mai iaia ra; kua tuatua akera oki aia, No te mea kua tupae mai te atua o te au ariki o Arama ra ia ratou, ka apai au i te atinga kia ratou, kia tupae mai oki ratou iaku. Riro atura ratou ei mate nona, e no Iseraela katoa.

24 Kua akaputuputu mairā Ahaza i te au āriki o te are o te Atua ra, e kua tipupu oki i taua au āriki o te are o te Atua ra, e kua topiri i te au pa o te are o Iehova; e kua anga aia i te atarau nana uaorai i te au poo arataa katoa i Ierusalema.

25 E kua anga aia i te ngai teitei i te au oire ravarai o Iuda, ei tutungi anga atinga kakara na te au atua ke ra, akariri atura i te Atua o tona ra ai metua ia Iehova.

26 E te toenga o te tuatua iaia, e te aerenga katoa nona, ko tei mua e tei muri, i na, kua tataia i roto i te tuatua a te au ariki o Iuda e o Iseraela.

27 Moe iorā Ahaza ki o tona ra ai metua, e tanumia atura e ratou i roto i te oire ra ia Ierusalema; kare ra ratou i apai iaia ki roto i te menema o te au ariki o Iseraela: tupauia akera aia i te au e tana tamaiti ra e Hezekia.