Esetera

6 KARE rava te ariki i varea e te moe i taua po ra, kua akaue atura aia i te buka vairanga tuatua no te au rā ra kia apaiia mai, e tatauia iora ïa ki mua i te aroaro o te ariki ra.

2 E kitea iora te tuatua i tataia ra e, na Moredekai i akakite ia Bagatana raua ko Teresa, nga tavini a te ariki toko rua, tei tiaki i te ngutupa ra, tei umuumu i te ariki ra ia Ahasueru e ta.

3 Kua ui atura te ariki, Eaa te tutaki e te meitaki i o atuia atu no Moredekai i te reira? Kua tuatua maira te au tavini o te ariki tei tavini iaia ra, Kare rava e meitaki i o atuia atu nona.

4 Kua karanga atura te ariki, Koai tei roto i te paepae? Ko Hamana tei aere mai ki roto i te paepae ki vao i te are o te ariki, e tuatua ki te ariki e ri ia Moredekai ki runga i te ringa i akatuia e ia nona.

5 Kua tuatua maira te au tavini o te ariki kiaia, I na, ko Hamana te tu ua maira i roto i te paepae. Kua karanga atura te ariki, E tuku ua mai ki roto nei.

6 Kua aere mairā Hamana ki roto. Kua karanga atura te ariki kiaia, E akapeeaia atu te tangata ta te ariki i anoano i te akangateitei atu? Te manako ra to Hamana ngakau, Koai ra ta te ariki i anoano i te akangateitei mari ra ko au?

7 Kua tuatua mairā Hamana ki te ariki, Te tangata i anoanoia e te ariki i te akangateitei,

8 Kia apaiia mai te kakau ariki ta te ariki i mātau i te kakau ra, e te oroenua ta te ariki i mātau i te noo, e te korona ariki i tukuia ki runga i tona mimiti:

9 E tuku oki i taua kakau nei e te oroenua ki te rima o tetai tangata maata rava i te mana i o te ariki ra, e kia akakakau ratou i te tangata ki te reira, i ta te ariki i anoano i te akangateitei, e kia akaoroia i runga i te oroenua na roto i te arataa o te oire, ka kapiki aere ei na mua iaia e, E akaperaia te tangata ta te ariki i anoano i te akangateitei.

10 Kua karanga atura te ariki kia Hamana, E akangakoikoi, ka rave i taua kakau ra, e te oroenua, taau i tuatua ra, ka pera atu ei ki te ngati Iuda nei kia Moredekai, te noo ra i te ngutupa o te ariki nei, auraka rava e akatopa i tetai tuatua taau i tuatua maira.

11 Kua rave aturā Hamana i taua kakau ra e taua oroenua ra, e kua akakakau atura ia Moredekai, e kua arataki iaia ki runga i te oroenua na roto i te arataa o te oire ra, e kua kapiki atura na mua iaia, E akaperaia te tangata ta te ariki i anoano i te akangateitei ra.

12 Kua aere akaou mairā Moredekai ki te ngutupa o te ariki ra. Karekā Hamana, aere viviki atura ki tona are ma te aue e ma te purokuia tona mimiti.

13 Kua akakite aturā Hamana ki tana vaine kia Zeresa, e te au oa katoa nona ra, i taua au mea katoa i rokoia mai ei aia ra. Kua tuatua maira te au tangata pakari nona, e te vaine katoa nana ko Zeresa, kiaia, E ngati Iudā Moredekai, taau i inga ana i mua iaia, kare aia e rauka ia koe, ka inga ra koe ki mua iaia.

14 E te karangaranga ua ra ratou kiaia, ko te tavini maira a te ariki, e kua rapurapu ua iora i te arataki ia Hamana ki te inumanga i akonokonoia e Esetera ra.