Iobu

28 E RUA tikai oki to te ario, e e vairanga to te auro i tamāiaʼi e te tangata nei;

2 No roto i te enua te auri i te ko angaia, e no roto i te toka te veo i te akataʼe anga mai.

3 Te akakakore nei te tangata i te poiri, e te kimi matatio nei aia, e tae rava atu ki te au toka no roto i te poiri, e te maru-mate.

4 Ei te atea ke i te ngai tangata i ko ei aia i te vaarua, kua tautau ua ratou, kua taa ua te vaevae: ei te atea ke i te tangata nei kua peke a moari ua ratou.

5 Kareka te enua nei, no reira te kai i te rauka anga: ko to raro akera kia uriia mai, kua aite ïa ki te ai.

6 Tei roto i tona ra au toka te vairanga o te saphiro: e tei roto iaia te one auro.

7 Ko te arataa teia kare i kitea e te manu, kare oki te mata o te aie i kite ua ake:

8 Kare te au puaka taae i takai ua atu i reira, e te liona kare i aere na rungao.

9 Te tuku nei aia i tona rima ki runga i te mato pakari; te tatipoki nei aia i te au maunga ma te tumu katoa.

10 Te kokoti nei aia i te au matavai na roto i te mato; e te kite ra tona mata i te au mea memeitaki katoa ra.

11 Kua akakore aia i te taʼe anga o te vai; e kua tuku i te apinga ngaro ki te ngai mārama.

12 Eiea ra te pakari e kitea atu ei? e teiea to te kite ra vairanga?

13 Kare e tangata i kite i te oko i te reira; kare oki i kitea i te enua o tei ora nei.

14 Te tuatua maira te moana, Kare i ku nei iaku nei: e te tuatua maira te tai, Kare i ku nei iaku nei.

15 Kare te auro meitaki e apaiia ei oko i te reira, kare oki te ario e akateiaaia atu ei tutaki i te reira.

16 Kare te reira e akaaiteia ki te auro Ophira, ki te toka sema meitaki, e te saphiro.

17 Te auro, e te toka areare, kare ïa e tau i te reira: kare ïa e okoia i te au poe auro tamāia ra.

18 Eiaa te punga muramura, e te poe, e taikuia: kua maata oki to te pakari meitaki i to te penini.

19 Kare oki te topazi i Kusa e akatauia i te reira, kare oki e oko na ki te auro meitaki ra.

20 Noea ra te pakari i te tae anga mai? e teiea to te kite vairanga?

21 Kua uuna keia oki i te au mata o te aronga katoa e ora nei, e kua tāpuia i te au manu o te reva nei.

22 Te tuatua maira te pou e te mate, Ko te rongo ta maua i akarongo akenei i to maua taringa.

23 Ko te Atua ra tei kite i tona aerenga, e koia tei kite i tona ngai.

24 E tae ua atu ki te au openga o te enua nei, kua akara oki aia, e kua kite aia i to raro ake i te au rangi katoa ra.

25 Iaia i anga i te akateiaa matangi ra; e kua akatau marie i te vai ki te aite;

26 Iaia i anga i te ture no te ua, e te aerenga no te uira mangungu ra:

27 I reira tona akara anga, e kua akakite mai; kua akonokono aia i te reira, e kua kimi pu tikai.

28 E kua karanga atura aia ki te tangata, I na, ko te mataku i te Atu ra, ko te pakari ïa, e te akaruke i te kino ra, ko te kite ïa.