Iobu

30 I TEIANEI ra, ko tei iti to ratou puke rā i toku nei, tei kata aviri mai iaku, kare oki to ratou au metua e tau iaku kia akanoo i roto i te au puakaaoa o te anana naku nei.

2 I te maroiroi oki o to ratou rima eaa ïa puapinga iaku nei, tei topakā ua te ruaine anga?

3 No te pongi e te onge i ikoke uaʼi ratou; i te ngangau aere anga i te medebara, te ngai vaiavare ua, e te miea ua.

4 I te uuti anga i te malua no roto i te ngangaere, e te aka rotema, ei kai na ratou.

5 Kua tuaru keia ratou i roto i te tangata, kua kapikiia ratou na muri mei te mea e keia;

6 Kia noo i roto i te au o rikarika ra, i roto i te au vaarua o te enua, e i roto i te au mato ra:

7 I roto i te ngangaere to ratou ungā aere ua anga; i raro ake i te au rakau taratara to ratou akaputuputu anga:

8 E tamariki na te neneva, e anau na te tangata kikino: kua arumaki naia ratou mei runga atu i te enua nei.

9 Kua amuamuaia ra au e ratou i teianei, e kua riro au ei tuatua anga na ratou.

10 Kua akaviivii mai ratou iaku, e rere ke ratou iaku, e kare i tukumoe i te tutua i te uavare i mua i toku aroaro.

11 No te mea kua tatara aia i tana tavaa, e kua tairo mai iaku, kua tatara katoa ratou i te tavaa ki mua iaku.

12 E takanga tamariki tei tu mai i toku rima katau ra; te tute ke nei ratou i oku vaevae, te akāū nei ratou i te au arataa kia mate au ra.

13 Kua takinokino aere ratou i toku arataa, kua akamaata ratou i toku mate, kare ua e tauturu ia ratou.

14 Kua oro maira ratou ki runga iaku, mei te mea e na roto i tetai ngaa maata ra: kua akataka roa maira ia ratou uaorai i taua mate maata ra.

15 Kua uriia maira te au mea matakutaku ki runga iaku: kua peke ia ratou toku meitaki mei te matangi ra: e kua kore te ora noku mei te tumurangi ra.

16 E tenana, kua taravai rava toku vaerua i roto iaku: kua rokoia au e te au rā tumatetenga.

17 Kua koputaputaia toku au ivi i te po nei i roto iaku: e te ngangau mai iaku ra kare ua e akapaki.

18 No te ririnui o toku maki i riro ei te reira ei kakau noku: e kua piri maira iaku mei te kaki pona.

19 Kua uri aia iaku ki roto i te vari, e kua riro au mei te one-pueu e te reu.

20 Te kapiki nei au kia koe, kare ra koe e akarongo mai iaku: te tu nei au ki runga, kare ra koe e akono mai iaku.

21 Kua riro koe ei takinga-kino iaku: i te ririnui o te rima kua rave viviki maira koe iaku.

22 Te apai nei koe iaku ki runga i te matangi; te akaoro nei koe iaku na rungao, te akangaevaeva rava nei koe iaku.

23 Kua kite oki au e ka arataki koe iaku ki te mate, e ki te are i akonoia no te aronga katoa e ora nei.

24 Kare ra aia e akatika atu i tona rima ki te vaarua, aue uaʼi ratou i taua akapou nana ra.

25 Kare ainei au i aue i tei rokoia e te tumatetenga? kare ainei i mamae toku ngakau i te aronga putaua?

26 I tapapa oki au i te meitaki, e rokoia iora e te kino: i tiaki oki au i te mārama, e rokoia iora e te poiri.

27 Kua ori ua toku ngakau, kare e akaea anga: kua rokoia au e te au rā makimaki.

28 Te aere nei au ki te kerekere, kare ra e na te rā; te tu nei au ki runga ei aue ua i roto i te uipa anga.

29 Kua riro au ei taeake no te au puaka taae, e ei oa no te au ione.

30 Kua kerekere taku kiri i runga iaku nei, e kua ka aku ivi i te veravera.

31 Kua riro katoa taku kinura ei aue, e taku koê kua riro mei te reo o te aronga aue ra.