Iobu
7 KARE ainei i akonoia to te tangata nei tuatau i te ao nei? e tona puke rā mei te au rā o tei ouia ra?
2 Mei te tavini e anoano maata i te maru aiai ra, e mei te ouia ra e tapapa i te tutaki no tana angaanga:
3 Koia katoa au, kua tukuia mai te au marama rekareka kore noku, e te au po noo-ngata tei akonoia mai noku.
4 Kia akāvai au ki raro, kua tuatua au e, Aea ra au e tu ei ki runga, e kore atura te po? kua roiroi au i te takauriuri ua anga e tae ua atu ki te ao anga ra.
5 Kua vaîia toku kopapa ki te iro, e te tikipa repo; kua mimiro toku kiri, e kua pe.
6 E viviki to te au rā noku nei i to te kauta a te raranga kakau ra, e te ope ua nei ma te manakonako anga kore.
7 E akamaara ana e, ko toku nei ora, e matangi ua ïa: kare oku mata e kite akaou i te meitaki.
8 Kare oki te mata o tei kite mai iaku ra e akara akaou mai iaku: tei runga maira oou mata iaku, e kua kore ïa au.
9 Mei te tumurangi e peke nei, e kua ngaro; koia katoa tei eke ki raro i te vaarua kare e oki mai.
10 Kare aia e oki akaou ki tona ngutuare, kare rai tona ngai e kite akaou mai iaia.
11 I kore ei au e tāpu i toku vaa; e tuatua rai au i te tumatetenga anga o toku vaerua; e ka aue rai au i te mamaeanga o taku ngakau.
12 Ko te tai ainei au, e e taae o te moana, i tuku mai ei koe i te tiaki ki runga iaku?
13 Kia karanga au e, E mareka au i taku roi nei, e amaru ake taku maki i toku nei moenga;
14 Te akapoitirere maira koe iaku ki te moe i reira, e te akarikarika maira iaku ki te orama:
15 I inangaro ei taku vaerua kia kukumiia mai, e kia mate rava, auraka teianei au ivi.
16 Kua iu au; auraka au kia ora roa atu: Ka tuku ake ana iaku; kare oki e puapinga taku nei puke rā.
17 Eaa te tangata nei, i manako nui mai ei koe iaia? e i akono ei toou ngakau iaia?
18 I atoro ei koe iaia i te au popongi katoa ra, i timata mai ei koe iaia kare e tukumoe?
19 Kia aa koe e ariu ke atu ei iaku nei, e e vaoo iaku kia tuku ua ana au i taku uavare?
20 Kua ara ïa au; e akapeea atu au ia koe? E tei tiaki i te tangata nei, eaa oki koe i akatu ei iaku ei pa naau, e kua riro au ei mei teiaa noku uaorai?
21 Eaa oki koe i kore ei i akakore i taku nei ara, ka apai ke atu ei i toku nei kino? Ka moe oki au i tenana ki raro i te one-pueu; ka kimi oki koe iaku kia popongi ake, e kare ra au.