Salamo

144 KIA akameitakiiā Iehova, toku akapuanga, ko tei apii mai i toku rima i te tamaki, oku maikaorima i te tamaki anga ra. 2 Ko toku meitaki, e toku punanga; toku are teitei, e te akaora iaku; toku paruru, e taku e irinaki nei; ko tei akavi i toku au tangata i raro iaku nei. 3 E Iehova, eaa te tangata nei i kite mai ei koe iaia? te tamaiti a te tangata i akono ei koe iaia? 4 E tau te tangata ki te puapinga kore; tona au rā mei te ata e peke ra. 5 E Iehova, e tuku akaaka mai te au rangi ra, ka eke mai ei: e akatukia ua atu i te au maunga, e ka peke te auai. 6 E tuku mai i te uira, kia pueurikiriki ke ratou; e akainana i te au kakao naau, kia pou atu ratou. 7 E akatika mai i to rima no runga mai, e opu mai e akaora iaku i te vai maata nei; i te rima o te au tangata ke ke ra: 8 E tuatua puapinga kore oki tei to ratou vaa e to ratou rima katau, e rima katau ïa no te pikikaa. 9 Ka imene au i te imene ou ia koe, e te Atua e; e imene akameitaki au ia koe i te nabala ao ngauru ra. 10 Ko koe tei oronga mai i te ora no te au ariki, ko tei akaora i tona tavini ia Davida i te koke e mate ei ra. 11 E opu mai e akaora iaku i te rima o te au tangata ke ke ra; e tuatua puapinga kore oki tei to ratou vaa, e to ratou rima katau e rima katau ïa no te pikikaa. 12 Kia riro ta matou au tamariki i to ratou ou anga ra, mei te rakau tupu meitaki ra; ta matou au tamaine, mei te toka i te kapeu tara ra, i akamaneaia mei to te are ariki ra. 13 Kia ki to matou au are vairanga apinga ki tera apinga tera apinga: kia riro ta matou au anana ei tausani ua atu, kia ngauru oki te tausani i to matou au arataa: 14 Kia ririnui ta matou au puakatoro i te angaanga; auraka e vavaʼi anga mai ki roto, auraka ei ati anga ki vao; auraka ei aue anga i to matou au arataa. 15 E ao to te aronga, mei te reira te tu: e ao to te aronga, ko Iehova to ratou Atua.