Salamo

148 ALELU Ia. E akameitaki ia Iehova i te au rangi ra: e akameitaki kotou katoa, ko tei noo i runga ra. 2 E akameitaki iaia, kotou katoa, e te au angela; e akameitaki iaia, ko kotou ravarai, e te au nuku nona ra. 3 E akameitaki iaia, e te rā, e te marama: e akameitaki iaia, e te au etu mārama. 4 E akameitaki iaia, e te rangi o te au rangi ra; e ko kotou, e te au vai i rungao i te au rangi ra. 5 Ko te reira te akapaapaa i te ingoa o Iehova; kua tuatua oki aia, e oti iora ratou i te angaia: 6 Kua akamou oki aia ia ratou e kia mou e tuatatau ua atu; kua akaaiteite aia i te akonoanga e kare rava ratou e tatipake. 7 E akameitaki ia Iehova i runga i te enua nei: te au taae o te moana ra, e te au ngai oonu katoa; 8 Te ai, e te ua toka; te kiona, e te kou ra; te matangi uriia ra, e akatupu i tana ra tuatua; 9 Te au maunga, e te au tuaivi katoa; te au rakau kai ra, e te au arezi katoa; 10 Te au manu, e te au puaka ravarai; Te au mea totoro aere ua ra, e te manu peau; 11 Te au ariki o te enua nei, e te tangata katoa, te aronga mana, e te au akava katoa o te enua; 12 Te au tangata ou, e te au tamaine; te au tangata metua, e te au tamariki ra: 13 Ko te reira te akameitaki i te ingoa o Iehova; tona anake ra oki te ingoa kia akateitei; tei runga roao tona kakā i te enua nei, e te au rangi ra. 14 Koia i akateitei i te tara o tona tangata, koia tei akameitakiia e tona aronga tapu katoa; koia oki tona ra au tangata akaperepere, te tamariki a Iseraela. Alelu Ia.