Salamo

32 E AO tona, to te akakoreia tana ara, to tei tapokiia tona kino!

2 E ao to te tangata, kare i tapepeia e Iehova i te ara, e kare e pikikaa o roto i tona ngakau.

3 Iaku i muteki ua ra, kua kino roa oku au ivi, i te ngunguru anga noku e po ua atu te rā.

4 Te teimaa maira oki to rima i runga iaku i te po e te ao; toku mauu ra, kua riro ïa mei te marō o te tuatau paroro ra. Sela.

5 Kua aaki atura au i taku ara kia koe ra; e kare au i uuna i taku nei apa: i tuatua akera oki au e, E aaki au i taku ara kia Iehova ra; e kua akakore mai koe i te kino o taua ara naku ra. Sela.

6 No reira e pure atu ei te aronga akono i te Atua katoa ra ia koe, i te tuatau e kiteia mai ei ra: ko te ka kore roa ïa e taea e te vai puke maata ra.

7 Ko koe toku pipinianga; ka akaora koe iaku i te tumatetenga; e akapini mai koe iaku ki te imene ora. Sela.

8 E apii atu au ia koe, e akakite atu ei kia koe i taau arataa kia aere ra; e ako atu au ia koe; ei runga ia koe toku mata vaoo ei.

9 Auraka kia aiteia ki te oroenua, e te mule, kare o ratou e kite ra, ko tei akamouia te tanga ki te tavaa, kare oki e akavaitata mai kia koe.

10 E manganui to te aronga kino ra aueanga; kareka tei irinaki ia Iehova ra, ka pini takakaiia aia e te aroa.

11 Kia rekareka e kia pereperekavana ia Iehova, kotou e te aronga tuatua-tika ra; e maeva i te rekareka, kotou katoa, e te aronga i tiratiratu te ngakau ra.