Salamo

36 TE tuatua nei te ara a te tangata akono kore i te Atua i roto i toku ngakau e, Kare rava e mataku i te Atua ki mua i tona ra mata:

2 Te koperepere ua ra aia iaia uaorai i tona uaorai mata; kare aia i kimi i tona uaorai kino ka rikarika atu ei:

3 E kino oki tei te tuatua a tona vaa e te pikikaa; kua kore akenei aia e akono tikai, e te rave i te mea meitaki:

4 Te kimi ra aia i te kino i rungao i tona roi; te māro ra aia i te arataa kare rava e meitaki ra; e kare aia e rikarika i te kino.

5 Kua tae toou takinga-meitaki, e Iehova, ki runga i te au rangi ra; te tuatua-mou naau ki runga i te au tumurangi ra.

6 E tau te tuatua-tika naau ki te au maunga o te Atua ra; taau ra au tuatua-tau mei te oonu maata ra! te ora nei te tangata e te puaka katoa ia koe, e Iehova!

7 Te meitaki o toou ra takinga-meitaki, e te Atua e! i akaruru ei te au tamariki a te tangata ki raro ake i te maru o to peau ra.

8 E merengo roa ratou i te kai meitaki o to are; e inu oki ratou i te kauvai o to rekareka ra.

9 Tei ia koe oki te tumu o te ora, e i toou ra mārama e kite ei matou i te mārama.

10 E tamou rai koe i to takinga-meitaki ki te aronga i kite ia koe ra, e te tuatua-tika naau ki te aronga i tiratiratu te ngakau ra.

11 Auraka te vaevae o te nengonengo e akavaitata mai kiaku nei, auraka te rima o te aronga kino e akakeu mai iaku.

12 I reira te aronga i rave i te kino i te inga anga: kua oparaia ratou ki raro, kare oki e tika kia tu mai ki runga!