Salamo

50 TE Atua maata ra, ko Iehova, teia e tuatua nei; te kapiki nei i te enua nei, mei te itinga mai o te rā e tae ua atu ki te topaanga.

2 Mei Ziona mai, te ngai i tu ke i te manea, ko te Atua ïa i te kakā anga mai.

3 Te aere maira to tatou Atua, kare e muteki ua; e ai te ka na mua iaia i te kai aere anga, e uriia maata te ka akapini mai iaia.

4 Ka kapiki aia ki te au rangi i runga ra, e te enua nei, ka akavaʼi i tona au tangata:

5 Kia akaputuputuia mai toku aronga tapu ki mua iaku, ko tei papau i te koreromotu kiaku nei ma te atinga.

6 E na te au rangi e akakite mai i tana tuatua-tika; ko te Atua uaorai oki te akava. Sela.

7 E akarongo mai, e taku au tangata e, e naku e karanga atu; e Iseraela e, e naku e akakite kia koe; ko te Atua, ko toou uaorai Atua, ko au nei.

8 Kare au e akamura ia koe i taau ra au atinga; e taau ra au atinga karakaratio i vai tamou ana ki mua iaku nei.

9 Kare au e rave i te puakatoro no roto i toou are, te puaka-nio toa no roto i taau anana;

10 Naku katoa te au puaka o te ngangaere ra; te au puaka i runga i te au maunga ra e tausani ua atu.

11 Kua kite au i te au manu katoa o te au maunga ra, e te au puaka momoavao o te enua ra, naku ïa.

12 Naringa au i pongi ra, kare au e karanga atu kia koe; noku oki te ao nei, e tona ki katoa ra.

13 Ka kai ainei au i te kiko puakatoro, ka inu ainei oki i te toto puaka-nio?

14 Ko te akameitaki ra te apai atu ki te Atua, e akatupu oki i taau i tia ra ki Tei Teitei ra.

15 Ka kapiki mai ei kiaku i te rā tumatetenga, naku koe e akaora, ka akameitaki mai ei koe iaku.

16 Kareka te tangata kino ra, te tuatua maira te Atua, Eaa tika naau kia akakite koe i taku nei au akonoanga? e kia akaiki oki to vaa na i taku nei koreromotu?

17 E mea riri oki naau kia apiiia, e kua akaruke koe i taku tuatua i muri ia koe.

18 Kia akara koe i te keia ra, kua akatika atu koe iaia, e kua kapiti katoa ki te aronga akaturi ra.

19 Kua tuku koe i to vaa ki te kino, e te akatupu ra to arero i te pikikaa.

20 Te noo ra koe ma te akakino i to taeake; te urutoe ra koe i te tamaiti a toou uaorai metua vaine.

21 Te pera ra koe, e kua muteki ua atu au; te manako ra koe e mei ia koe katoa na au: ka akamura au ia koe i toou ra kino, e akataka marie atu au i mua i to mata na.

22 E akamaara na kotou i teia, e te aronga akangaropoina ua i te Atua, ko te aaeia aea kotou e au, e kare rava e akaora.

23 Ko tei apai i te akameitaki ra, kua akapaapaa mai ïa iaku, e ko te aere na te ara tikai ra, ka akakite au kiaia i te ora a te Atua.