Salamo

52 EAA koe i akatietie ei i te kino, e tenana tangata mana ra? Ko te takinga-meitaki o te Atua kare e rā e tivata.

2 Te akakoro ra to arero i te kino, mei te varu koi i tatipake ra.

3 Ko te kino taau i inangaro ra, kare te meitaki: te pikikaa ra, kare kia tuatua i te tuatua-tika. Sela.

4 Te inangaro ra koe i te au tuatua ravarai e mate ei ra, e tenana arero pikikaa.

5 Ka mate takiri rava koe i te Atua; ka rave mai aia, e kiriti ravaia koe i toou ra puakapa, e ka uritumuia koe i te enua o te aronga e ora nei. Sela.

6 Ka kite te aronga tuatua-tika, e ka mataku, ka katangia aia e ratou ra:

7 I na! ko te tangata teia, kare i akariro i te Atua ei maroiroi nona, irinaki atura ra i te maata o tona ra apinga, e kua akamaroiroi iaia uaorai i tana tuatua kino.

8 Ko au nei ra, mei te olive ruperupe au i te are o te Atua; te irinaki nei oki au i te takinga-meitaki o te Atua ra, e tuatau e tuatau ua atu.

9 E akameitaki au ia koe e tuatau ua atu i taau i rave nei; ka irinaki oki au i toou ra ingoa; e meitaki oki te reira i mua i to aronga tapu ra.