Salamo

85 KUA takinga-meitaki mai koe, e Iehova, i toou ra enua: kua akaoki mai koe i te tuikaa o Iakoba ra.

2 Kua akakore koe i te ara a to au tangata ra, kua tapoki koe i to ratou au kino katoa. Sela.

3 Kua akakore koe i toou riri katoa, kua anga ke atura koe i te otooto anga o toou ra riri.

4 E akaariu koe ia matou, e te Atua e oraʼi matou nei, e akamutu oki koe i to riri ia matou nei.

5 Ka riri mai koe ia matou e tuatau ua atu? ka tamou rai koe i to riri i tera uki i tera uki?

6 Kare ainei koe e akamaroiroi akaou mai ia matou, kia mareka to au tangata ia koe ra?

7 E akakite mai koe, e Iehova, i toou ra aroa, e o mai i te ora naau ia matou nei.

8 E akarongo ana au i ta te Atua ra, i ta Iehova, e tuatua mai: e tuatua mai oki aia i te au ki tona ra iti tangata, e ki tona ra aronga tapu; auraka ra ratou e ariu akaou ki te mea neneva.

9 Te vaitata tika rai te ora nana ki te aronga i mataku iaia ra, kia noo te kakā i to tatou nei enua.

10 Ko te aroa e te tuatua-mou, kua aravei ïa raua; ko te tuatua-tika e te au, kua ongi raua.

11 Ka tupu mai te tuatua-mou no roto i te enua; ka akara mai oki te tuatua-tika mei te rangi mai!

12 Na Iehova oki e oronga mai i te mea meitaki, e ka ua mairai to tatou enua.

13 Na mua iaia te tuatua-tika i te aere, e nana e arataki kia na te arataa o tona uaorai ruatapuae.