Isaia

15 TE TUATUA ia Moabi ra. Koia tika rai, i te po tamaki, i pou takiri ei Ara i Moabi; koia tika rai, i te po tamaki, i pou takiri ei Kira i Moabi.

2 Te aere akera ratou ki te marae, e ki Dibona, ki te au ngai teitei, aue ei: e aue Moabi ia Nebo, e ia Medeba: kua mangore anakeia to ratou upoko, kua varu anakeia te au kumikumi.

3 I tona ra au arataa kua kakau ratou i te kakau paoa: ki runga i tona ra au are, e ki roto i tona ra au ngai atea kua kakaoa anake ratou; kua eke akaou ki raro ma te aue.

4 Kua aue kapiki ua Hesebona, e ko Eleale: kua rongoia to ratou reo ki Iahaza: te au toa akatara katoa i Moabi i te kaku katoa anga; kua tumatetenga roa tona vaerua i roto iaia.

5 Te aue nei toku ngakau ia Moabi: tona aronga i ati e tae ua atu ki Zoara mei te aueanga o te puakatoro ou tinana ra: te kake ra ratou i te kakenga i Luita ma te aue; i te ara i Horonaima kua tumu ratou i te eva eketumu ra.

6 Te au vai oki i Nemerima, kua kore ïa: kua mae oki te mauku, kua pou te ngangaere, kare ua e mea ruperupe toe.

7 E teianei ta ratou apinga maata i rauka ra, e te au mea i akaputuputu marieia e ratou, kua apai naia ki tera pae o te riu rakau akaevaeva ra.

8 Kua pini takako ravaia oki te kotinga o Moabi i te eva kaku; kua tae rava tona ngunguru ki Egelaima; e tona kakaoa ki Bere-Elima.

9 Ki ua rai oki te au vai i Dimona i te toto: e maata rai oki taku e apai ki runga ia Dimona, te au liona ki runga i to Moabi i ora ra, e ki runga katoa i tei toe i te enua nei.