Isaia

24 I NA, te riringi nei a Iehova i te enua, e kia pou rava; te tairipoti rava nei, e te akapueurikiriki i tona tangata.

2 E riro oki, mei ta te tangata ra, ka pera rai ta te taunga; mei ta te tavini tane ra, ka pera rai ta te pu; mei ta te tavini vaine ra, ka pera rai ta te rangatira vaine, mei ta te tangata e oko atura, ka pera rai ta tei oko maira; mei ta te tangata ori apinga ra, ka pera rai ta tei o atu; mei ta te tangata ou ra, ka pera rai ta tei ouia ra.

3 Kua uriapaka ravaia te enua, e kua pou i te āruia; na Iehova oki teia i tuatua.

4 Kua aue te enua, kua mae: kua paruparu to te ao, kua mae; kua paruparu te aronga teitei o te enua nei.

5 Kua viivii te enua i raro ake i tona au tangata ra, kua ara oki ratou i te ture ra; kua ruri keia tei akonoia ra; kua akaatikauia te koreromotu mutu kore ra.

6 I pou ei te enua i te taumaa; e kua akautungaia te aronga e noo ki reira: i ope roaʼi te tangata o te enua nei i te ka i te ai; e te tangata i vaooia ra, kare e toko rai.

7 Kua mii te wina ou, te takupe nei te vine; te aronga katoa i rekareka te ngakau ra, kua aue ïa.

8 Kua kore te tangi rekareka o te paʼu ra; te mutamuta o te aronga i rekareka ra, kua kore ïa; te tangi rekareka o te kinura, kua kore.

9 Kare ratou e inu i te wina ma te peʼe; te kava kona kua maamaa ïa i te aronga i inu ra.

10 Kua vavaʼia te oire tanea ki raro: kua popaniia te au are katoa, kare tomoia.

11 E kakunga wina tei te au arataa; kua kore roa te rekareka; te pereperekavana o te enua, kua riro ke ïa.

12 Ko te tanea ua te apinga toe i te oire nei; e kua tutukiia te pa ki raro ma te kokina maata.

13 Ka akaperaia oki ki rotopu i te enua ra ki rotopu i te au tangata ra; mei te olive i ruruia ra; mei te koi aere anga ra, kia oti te mou vine ra.

14 Ka akateitei ra ratou i to ratou reo, ka imene ei; i te tapunui o Iehova ka maevaʼi ratou mei te moana mai.

15 E teianei, e akakakā kotou ia Iehova i te au o ra, i te pa enua o te moana, i te ingoa o te Atua o Iseraela ko Iehova.

16 Mei te kotinga roa mai o te enua to tatou akarongo anga i te imene, E paapaa anga to Tei Tuatua-tika e! Kua na ko atura au, Taku mate e! taku mate e! E ae oki au e! te āru aere nei rai te aronga āru; koia ïa, te āru apinga aere nei rai te aronga āru.

17 Ko te mataku, e te vaarua, e te ereere, tei runga ïa ia koe, e to te enua nei e.

18 E e riro oki, ko tei oro i te reo akamataku ra, ka topa ïa ki roto i te vaarua; e tei ora i te vaarua ra, ka piri ïa i te ereere: e kua akatueraia te au ngutupu o te rangi ra, e kua ngaueue te tumu o te enua nei.

19 Kua akangaueue roaia te enua nei, kua akapueurikiriki takiri ravaia te enua nei, kua akaruketekete maata ravaia te enua.

20 Kua arara aere te enua mei te konā kava ra, e te keukeu ki tera ngai, ki tera ngai, mei te roi tautau ra: te vai teiaa nei oki tana ara ki runga iaia; e inga oki aia, e kare e tu akaou mai.

21 E kia tae i te reira rā, e akautungā Iehova i te nuku o te ranga i runga ra, e te ui ariki o te enua ra ki runga i te enua nei.

22 E akaputuia mai ratou katoa ra, mei tei tapekaia ra i roto i te vaarua ra; e popani takiriia ratou ki roto i te are tapeka anga ra; e kia ope nga rā e manganui e atoroia mai ei ratou.

23 Ka rokoia te marama e te tumatetenga, e te rā oki e te akama, kia riro te au ia Iehova Sabaota ra i te maunga ra ko Ziona, e i Ierusalema, ma te kakā ki mua i te aroaro o te aronga taito nona ra.