Isaia

50 TE NA ko mairā Iehova, Teiea te tuatua kopae a to kotou metua vaine, i tuku ke atu ei au iaia ra? e koai to roto i taku aronga kai ou ra, tei apai atu au ia kotou ei ou? I na, no ta kotou au ara i apaiiaʼi kotou ei ou; e no ta kotou tuatua kino i tukua keiaʼi to kotou metua vaine.

2 Eaa te mea i kore ei te tangata, iaku i aere ra? iaku i kapiki ra, i kore ei tetai i îō mai? Kua poto ainei toku rima e kare e tika kia akaora? e kare ainei oku e mana kia akaora? I na, i taku akamura anga, kua marō te moana iaku: e akariro oki au i te au vai ei ngai papamarō; kua pirau ta ratou ika i te vai kore, e mate atura i te kaki vai.

3 Te akakakau nei au i te rangi ki te kerekere, e te tapoki nei ia ratou ki te kakau paoa.

4 Kua oronga mai te Atu ra ko Iehova kiaku i te arero o te aronga i apiiia; kia tika iaku kia tauturu atu i tei roiroi ki te tuatua: te akaara nei aia iaku i tera popongi, i tera popongi: te akaara nei aia i toku taringa, kia akarongo au mei te aronga i apiiia ra.

5 Kua akaputata te Atu ra ko Iehova i toku taringa, e kare oki au i akarongo ngata; kare oki au i kotoe ki muri.

6 Kua tuku ua atu au i taku tua ki te aronga i pāpā mai, e oku paparinga ki te aronga i utiuti i te kumikumi: kare au i uuna ke atu i toku mata i te akavaavaa, e i te tutua uavare.

7 E tauturu mairai te Atu ra ko Iehova iaku; i kore ei au i akama: i akaketaketaʼi au i taku mata mei te toka tama ra; kua kite oki au e kare au e akama.

8 Ko te akatika mai iaku nei, te vaitata nei ïa; koai te ka māro mai iaku? tu katoa mai aia maua katoa: koai taku enemi? kia akavaitata mai aia iaku nei.

9 I na, na te Atu ra na Iehova e tauturu maira iaku; koai te akaapa mai iaku nei? i na, e piro anake ratou mei te kakau nei; e pou ratou i te neu.

10 Koai to roto ia kotou e mataku ia Iehova; tei akarongo i te reo o tona tavini, ko tei aaere ua na te poiri, e kare e mārama? e irinaki aia i te ingoa o Iehova, e kia akaea aia ki runga i tona Atua.

11 I na, ko kotou roarai ko tei tutungi i te ai, tei akapini ia kotou uaorai ki te rama ra; e aere kotou i te mārama o ta kotou ai, e i te rama i tutungiia e kotou na. Teia ta kotou e rauka i toku rima nei: e moe kotou ki raro ma te aue ra.