Ieremia

11 TE TUATUA i tae mai kia Ieremia no ko ia Iehova ra, na ko maira,

2 Ka akarongo mai ana kotou i te tuatua o teianei koreromotu, e karanga atu kotou ki te au tangata no Iuda, e ki te aronga e noo i Ierusalema;

3 E ka karanga atu koe kia ratou, Te na ko maira te Atua no Iseraela ra ko Iehova, Kia kino te tangata tei kore e akarongo i te tuatua o teianei koreromotu,

4 Taku i akaue atu ki to kotou ai metua i te rā i arataki mai ei au ia ratou mei te enua maira mei Aiphiti, mei roto mai i te umu auri, ka na ko atu ei, E akarongo mai i toku reo, e ka rave oki i te au mea katoa taku e akaue atu ia kotou ra: e riro ïa kotou ei iti-tangata noku i reira, e riro oki au ei Atua no kotou:

5 Kia akatupu oki au i te taputou taku i taputou atu ki to kotou ai metua ra, e oronga au ia ratou i te enua e taʼe a vai ua te u e te meli mei tei teianei rā.

6 E kua tuatua mairā Iehova kiaku, E tutu aere koe i teia katoa nei au tuatua i te au oire o Iuda, e i te au arataa i Ierusalema, i te na ko anga e, E akarongo mai kotou i te au tuatua o teianei koreromotu, ka rave ei.

7 I tuatua raurau atura oki au ki to kotou ai metua i te rā i arataki mai ei au ia ratou mei te enua maira mei Aiphiti, e tae roa akenei ki teianei rā i te tu popongi anga, ka tuatua raurau atu ei, i te na ko anga e, Ka akarongo mai kotou i toku reo.

8 Kare ra ratou i akarongo, kare oki i anga mai i to ratou taringa, kua aere ra ratou katoa na te ketaketa o to ratou uaorai ngakau kino: i apai mai ei au i te au tuatua katoa o teianei koreromotu ki runga ia ratou, taku i akaue atu e rave; kare ra ratou i rave.

9 E kua tuatua mairā Iehova kiaku nei. E kotivaka tei kitea i roto i te au tangata no Iuda, e i roto i tei noo i Ierusalema.

10 Kua oki akaou atu ratou ki te au ara a to ratou ai metua taito, tei kore i tika kia akarongo mai i taku au tuatua; e kua aru aere ratou i te au atua ke ei akatavini atu ia ratou: kua akaatikau te ngutuare o Iseraela, e te ngutuare o Iuda, i taku nei koreromotu, taku i papau atu ki to ratou ai metua ra.

11 I na ko mai ei a Iehova, I na, teia au ka tuku atu i te kino ki runga ia ratou, kare oki ratou e ora kia oro; e kia kapiki ua mai oki ratou kiaku, kare au e akarongo atu ia ratou.

12 Ei reira e aere ei te au oire o Iuda e tei noo i Ierusalema, e kapiki atu ki te au atua ta ratou i tutungi atu i te rakau kakara ra: kare takiri ra ratou e ora ia ratou i to ratou tuatau kino.

13 Kua aite oki toou au atua e Iuda e, ki toou au oire i te rainga, e mei te rainga o te au arataa i Ierusalema, te au atarau taau i akatu no taua mea akama ra, e au atarau tutungi anga rakau kakara ia Baala.

14 E teianei, auraka koe e pure no taua au tangata nei, auraka e kapiki, e auraka oki e pati akatenga no ratou: kare oki au e akarongo me kapiki mai ratou kiaku i to ratou kino ra.

15 Eaa ta taku akaperepere ra puapinga ki roto i toku nei are, e kua rave aia i te au peu kino e manganui, e kua riro ke ïa te kiko tapu ia koe ra? ia koe i rave i te kino ra, te akatietie ra koe i reira.

16 E olive ruperupe, e te manea, e te ua meitaki, ko toou ïa ingoa ia Iehova: ma te reo aruru maata, kua tau aia i te ai ki runga i te reira, e kua atiatiia tona au rara.

17 Na Iehova Sabaota tei tanu ia koe ra, i akakite mai i te kino noou, no te kino i te ngutuare o Iseraela, e te ngutuare o Iuda, ta ratou i rave ia ratou uaorai, i te akakoko anga mai iaku, i te tutungi anga i te rakau kakara kia Baala.

18 Kua akakite mairā Iehova iaku, e kite akera au: kua akakite maira oki koe iaku i ta ratou au ravenga.

19 Mei te punua mamoe rarata ua ra au kia aratakiia e ta; e kare au i kite e te akakoro maira ratou e rave iaku, i te na ko anga e, Tatou ka tipu i te rakau ma te ua katoa i rungao, e akataka ke atu tatou iaia i te enua o tei ora nei, kia kore e maara akaouia atu tona ingoa.

20 Ko koe ra, e Iehova Sabaota e, ko tei akava ma te tuatua-tika ra, tei kimi matatio i te manako, e te ngakau, e kite au i toou riri akaoko ia ratou: no te mea kua akakite atu na au i taku tuatua kia koe.

21 E teianei, te na ko mairā Iehova i te au tangata no Anatota, ko tei aruaru ia koe e ta, i te na ko anga e, Auraka koe e totou i te ingoa o Iehova, ka mate aea koe i to matou nei rima:

22 I na ko mai ei a Iehova Sabaota, I na, e tutaki atu au ia ratou: e mate te au tangata ou i te koke; ta ratou au tamariki tamaroa, e te au tamaine, ka mate ïa i te onge:

23 Kare ua o ratou uraura e toe: e apai mai oki au i te kino ki rungao i te au tangata o Anatota, ko te mataiti ïa e tutakiiaʼi ratou ra.