Ieremia

13 KUA na ko mairā Iehova kiaku, Ka aere ka tiki i tetai tatua orongā noou, ka tatua na i to taukupu, auraka ra e takū ki te vai.

2 E tiki atura au i taua tatua ra, i ta Iehova i tuatua maira, e kua tatua iora au i toku taukupu.

3 Kua tae maira te tuatua a Iehova kiaku nei, ko te tu rua ïa, i te na ko anga mai,

4 Ka rave i te tatua ra i rauka ia koe ra, tei to taukupu ra, e ka tu, ka aere ki Eupharati, ka uuna atu ei ki reira ki roto i tetai vaarua mato.

5 Aere atura oki au, e kua uuna iora i te reira ki te pae i Eupharati, mei ta Iehova i akaue mai kiaku nei.

6 E ope akera te au rā e manganui, kua tuatua mairā Iehova kiaku nei, Ka tu, ka aere ki Eupharati, ka rave mai i te tatua taku i karanga atu kia koe e uuna i reira.

7 Kua aere atura au ki Eupharati, e kua keri iora, e kua rave mai i te tatua i te ngai i uunaiaʼi e au ra, e i na, kua kino taua tatua ra, kare ua e puapinga.

8 E kua tae maira te tuatua a Iehova kiaku nei, i te na ko anga e,

9 Te na ko mairā Iehova, Ka pera rai taku akakino anga i te nengonengo o Iuda, e te nengonengo maata o Ierusalema.

10 Ko teianei iti-tangata kino, tei kore e tika kia akarongo i taku tuatua, ko tei aere na te ketaketa anga o to ratou uaorai ngakau, e ko tei aru aere i te au atua ke, kia tavini atu ia ratou, e kia akamori atu ia ratou ra, e riro ratou mei teianei tatua, tei kore rava ïa e puapinga.

11 Mei te tatua nei oki e piri ki runga i te taukupu tangata nei, kua pera rai taku topiri anga mai iaku nei i te ngutuare katoa o Iseraela, e te ngutuare katoa o Iuda, te tuatua mairā Iehova; kia riro mai ratou ei iti-tangata noku, e ei ingoa, e ei akameitaki, e ei akamanea: kare ra ratou i akarongo mai.

12 Teia oki tetai tuatua taau e akakite kia ratou; Te na ko maira te Atua no Iseraela ra ko Iehova, E akakiia te au āriki katoa i te wina: e e riro ratou i te tuatua kia koe, Kare ainei matou uaorai i kite pu tikai e, ka akakiia te au āriki katoa i te wina!

13 Ei reira koe ka karanga atu ei kia ratou, Te na ko mairā Iehova, I na, e akaki atu au i te aronga ravarai e noo ki teianei enua, e te au ariki e noo ki runga i te terono o Davida, e te kau taunga, e te au peroveta, e te aronga katoa e noo i Ierusalema, ki te kona.

14 E e titiri pu ua au i tetai ki runga i tetai, ko te au metua ma nga tamariki katoa, te tuatua mairā Iehova: kare au e tangi atu, e kare au e akaperepere, kare rava au e aroa atu, e kia pou takiri ratou.

15 E akarongo mai kotou, e kia ariu mai te taringa; auraka e akateitei: kua tuatua mai oki a Iehova.

16 O atu i te kakā i to kotou Atua ra ia Iehova, ko te akapoiri mai aea iaia, e ko te turorirori aea to kotou vaevae ki runga i te au maunga poiri ra, e ko te tatari aea kotou i te mārama, akariroia iora e ia ei marumate, akapoiri kerekere atura.

17 Kia kore ra kotou e akarongo mai i te reira, ka iriea taku vaerua i te ngai ngarongaro i to kotou ngakau parau; e ka aue ua atu taku mata, ma te roi-mata i te maringi anga, no te mea kua riro tuikaa atura te anana a Iehova.

18 E karanga atura ki te ariki, e ki te ariki vaine, Ka taakaaka korua, ka noo ki raro; ka tukuia oki ki raro, mei runga i to korua upoko, te korona o to korua akamanea.

19 Ka popaniia oki te au oire i apatonga, e kare ua tetai e vaʼi: e arataki tuikaaia Iuda, ko ratou katoatoa te ka arataki tuikaaia.

20 Ka nānā ana to kotou mata ki runga, ka akara ia ratou ko tei aere mai mei apatokerau mai: teiea te anana i orongaia atu ia koe ra, te anana manea naau ra?

21 Ka akapeea koe kia tutaki mai aia ia koe na? kua apii oki koe ia ratou ei tutara, e ei rangatira i rungao ia koe na: kare ainei koe e rokoia e te mamae mei to te vaine anau ra?

22 E kia tuatua koe ki roto i to ngakau ra, Eaa au i rokoiaʼi i teianei au mea? No te rai o toou kino, i eeuiaʼi to pareu, e i aunaiaʼi te tapoki o to poo vaevae.

23 E tika ainei i te tangata Kusa kia akatu ke i tona kiri, e te nemera i tona au kotuutuu, ei reira e tikaʼi kotou kia rave i te meitaki, ko tei mātau i te rave i te kino.

24 E teianei e akapueurikiriki ke atu au ia ratou, mei te ota i pueu ke i te matangi o te medebara ra.

25 Ko taau teia kelero, ko taau ïa tuanga i akaariteia e au, te tuatua mairā Iehova: no te mea kua akangaropoina mai koe iaku nei, e kua irinaki ki te pikikaa.

26 E teianei e eeu atu au i toou na pareu ki mua ia koe, kia kitea toou akama.

27 Kua kite au i taau akaturi anga, e taau mitimiti anga, te akakoro anga o taau akaturi anga, ki runga i te au tuaivi i te au kainga, taau au peu viivii. E ae oki koe, e Ierusalema e! kare e tika ia koe kia tamāia ïa. Aea atura ïa?