Ieremia

26 I TE akamataanga o te au o Iehoiakima, te tamaiti a Iosia ra, ariki no Iuda, i tae mai ei teianei tuatua, no ko ia Iehova ra, i te na ko anga e,

2 Te na ko mairā Iehova, Tu ua na koe ki roto i te paepae i te are o Iehova, ka karanga atu ei ki te au oire katoa i Iuda ra, tei aere mai e akamori i roto i te are o Iehova ra, i te au tuatua katoa taku e akaue atu ia koe ra e tuatua kia ratou; auraka tetai tuatua e akatoeia.

3 Peneiake ratou ko te akarongo mai, e ko te ariu mai te tangata katoa i tona uaorai aerenga kino, kia tataraara oki au i te kino taku e akakoro nei e rave ia ratou, no te kino o ta ratou ravenga.

4 E karanga atu koe kia ratou, Te na ko mairā Iehova; Kia kore e tika ia kotou i te akarongo mai iaku ra, e aaere i taku nei ture, i tukuia atu e au ki mua ia kotou.

5 E akarongo i te tuatua a toku au tavini i te au peroveta ra, taku i tono atu ia kotou, ma te tu popongi anga e kua tono, kare ra kotou i akarongo ra;

6 E akariro au i teianei are mei ia Silo i reira, e e akariro au i teianei oire ei taumaa i te au enua katoa o te ao nei.

7 Te akarongo maira oki te kau taunga, e te au peroveta, e te tangata katoa ra, ia Ieremia, i te tuatua anga i teianei au tuatua i roto i te are o Iehova.

8 E ope akera te au tuatua katoa, ta Iehova i akaue mai ia Ieremia ra, i te tuatuaia e ia i te tangata katoa ra, kua opu atura te kau taunga, e te au peroveta, e te tangata katoa iaia, na ko atura, Ka mate takiri koe na.

9 Eaa koe i totou ei i te ingoa o Iehova, i te na ko anga mai e, E riro teianei are mei ia Silo, e teianei oire i te tanea, kare e tangataia? Putuputu maira te tangata katoa ia Ieremia ra ki roto i te are o Iehova.

10 Kite akera te ui ariki o Iuda i teianei au mea, aere atura ratou, mei te are o te ariki ra, ki te are o Iehova, e kua noo iora i te tomoanga i te ngutupa ou i te are o Iehova.

11 E kua tuatua maira te kau taunga, e te au peroveta, ki te ui ariki ra, e te tangata katoa ra, na ko atura, E tau teianei tangata i te mate; koia i totou i teianei oire i ta kotou i akarongo i to kotou taringa.

12 Kua tuatua mairā Ieremia ki taua ui ariki katoa e te tangata ravarai ra, na ko maira, Ko Iehova tei tono mai iaku kia totou au i teianei are, e teianei oire, i te au tuatua katoa ta kotou i akarongo ra.

13 I teianei ra, ka akameitaki ana kotou i to kotou au aerenga, e ta kotou au ravenga ra, ka akarongo ei i te reo o to kotou Atua ra o Iehova; e tataraarā Iehova i reira i te kino tana i akakite mai ia kotou ra.

14 Kareka au nei, i na, tei to kotou ïa rima au; ka rave kotou i tei meitaki, e tei tika, i to kotou na mata, iaku nei.

15 Kia kite pu tikai kotou, e kia mate au ia kotou ra, e iri tikai te toto ara kore ki runga ia kotou, e ki runga katoa i teianei oire, e ki runga katoa i tei noo i reira ra: koia tika rai, kua tonokia mai au e Iehova ia kotou, kia tuatua au i teia katoa nei au tuatua i to kotou ra taringa.

16 Kua karanga atura te ui ariki, ma te tangata katoa, ki taua kau taunga ra, e te au peroveta, Kare teianei tangata e tau i te mate; kua tuatua mai oki aia ia tatou i te ingoa o to tatou Atua, o Iehova.

17 Kua tu maira oki e tokotai no te aronga pakari o te enua ra, e kua tuatua maira ki taua uipa anga tangata katoa ra, na ko maira.

18 Ko Mika te Morasi, tei totou i te au rā o Hezekia ra, ariki no Iuda ra, e kua tuatua ki te au tangata katoa no Iuda, na ko maira, Te na ko mairā Iehova Sabaota ra, E aroteia Ziona mei te kainga ra, e riro oki Ierusalema ei au ututua, e te maunga ra i te are nei, mei te au ngai vaorakau teitei.

19 I tamate rava ainei te ariki o Iuda ko Hezekia, e to Iuda katoa ra, iaia? kare ainei aia i mataku ia Iehova, e kua pure marie ki mua i te aroaro o Iehova ra, e kua tataraara iorā Iehova i taua kino tana i tuatua mai ia ratou ra? Te rave nei ra tatou i te kino maata i to tatou uaorai au vaerua.

20 Tera katoa tetai tangata i totou ma te ingoa o Iehova, ko Uriia, te tamaiti a Semaia ra, no Kiriata-iearima; totou iora aia i teianei oire, e teianei enua, mei te au tuatua katoa a Ieremia ra.

21 Kite akera te ariki ra ko Iehoiakima, e te aronga nunui katoa nona ra, e te ui ariki katoa ra, i taua au tuatua nana ra, kua kimi atura te ariki iaia e ta; kite akerā Uriia, mataku iora, oro atura, e tae atura ki Aiphiti.

22 Kua tono atura ra te ariki ra ko Iehoiakima i te tangata ki Aiphiti, ia Elenatana, te tamaiti a Akabora, e nga tangata ke ke katoa i te aere katoa anga ki Aiphiti.

23 Kua arataki maira ratou ia Uriia mei Aiphiti maira, e kua apai atura aia ki te ariki ra kia Iehoiakima, e kua ta aia iaia ki te koke, e kua uri ua atura i tona kopapa ki roto i te tanumanga tangata rikiriki ra.

24 Tei ia Ieremia ra te rima o Ahikama, te tamaiti a Saphana, kia kore aia e tukuia atu ki te rima o te tangata kia ta mai iaia ra.