Ieremia

28 TEI taua mataiti ra oki, i te akamataanga o te au o Zedekia, ariki no Iuda, i te a o te mataiti, e te rima o te marama, i tuatua mai ei a Hanania, te tamaiti a Azura ra, e peroveta i Gibeona, kiaku, i roto i te are o Iehova, ki mua i te aroaro o te kau taunga, e te tangata katoa ra, na ko maira,

2 Te na ko mairā Iehova Sabaota ra, te Atua o Iseraela, na ko maira, Kua aatiia e au te zugo a te ariki o Babulonia.

3 E rua tikai mataiti toe e akaoki mai ei au ki teianei ngai i te au āriki katoa o te are o Iehova, ta te ariki o Babulonia ta Nebukanesa i rave mei ko nei atu, e apai atura ki Babulonia:

4 E ko Iekonia, te tamaiti a Iehoiakima, ariki no Iuda, e te au tuikaa katoa o Iuda, tei tae ki Babulonia, taku ïa e akaoki mai ki teianei ngai, te tuatua mairā Iehova; e aati oki au i te zugo a te ariki o Babulonia.

5 Kua karanga aturā Ieremia peroveta ra ki te peroveta ra kia Hanania, ki mua i te aroaro o te kau taunga, e ki mua i te aroaro o te tangata katoa, i tu ua mai i roto i te are o Iehova,

6 Kua karanga atura oki te peroveta ra ko Ieremia, Amene; kia pera mai a Iehova; kia akatika mai a Iehova i taau au tuatua taau i totou mai, kia akaoki mairai i te au āriki no te are o Iehova, e te au tuikaa katoa, mei Babulonia mai, ki teianei ngai.

7 Akarongo mai ana ra koe i teianei tuatua taku e karanga atu nei i to taringa, e i te taringa o te au tangata katoa nei;

8 Te au peroveta i muatangana ra, ou au nei, ou oki koe, mei taito mairai, kua totou ïa i te au enua e manganui, e i te au basileia nunui ra, i te tamaki oki, e te kino, e te maki-mate.

9 Te peroveta kia totou mai i te tuatua au ra, kia tupu te tuatua a taua peroveta ra, e kitea meitakiiaʼi taua peroveta ra, e na Iehova tikai aia i tono mai.

10 Kua rave atura taua peroveta ra ko Hanania i te zugo i runga i te kaki o te peroveta o Ieremia, kua aati iora.

11 E kua karanga aturā Hanania ki mua i te aroaro o te tangata katoa ra, na ko atura, Te na ko mairā Iehova, Mei te reira taku aati i te zugo a te ariki o Babulonia, a Nebukanesa ra, i runga i te kaki o te pa enua katoa, i eianei puke mataiti e rua nei. Aere atura taua peroveta rā Ieremia i tona aerenga.

12 I reira te tae anga mai o te tuatua a Iehova kia Ieremia ra, kia oti te zugo i te aatiia e te peroveta ra e Hanania, i runga i te kaki o te peroveta ra o Ieremia, na ko maira

13 Aere ka karanga atu kia Hanania, e ana ko atu, Te na ko mairā Iehova, Kua aatiia e koe te zugo rakau, ei zugo auri ra taau e anga ei tupau.

14 Te na ko maira oki a Iehova Sabaota ra, te Atua no Iseraela; Kua tuku au i te zugo auri ki runga i te kaki o teianei au enua katoa, kia tavini atu ratou ki te ariki o Babulonia ia Nebukanesa ra; e e tavini ratou iaia: e kua oronga katoa atu au i te au puaka o te ngangaere ra nana.

15 Kua karanga atura te peroveta ra ko Ieremia, ki te peroveta ra ko Hanania, Ka akarongo mai ana, e Hanania e; Kare a Iehova i tono mai ia koe ra: kua akairi ra koe i te teianei iti-tangata ki runga i te pikikaa.

16 I na ko mai ei a Iehova, I na, ka akaruke au ia koe i runga i te enua nei; ei teianei mataiti koe e mate ei, ko koe i tuatua i te meameaau ia Iehova.

17 Mate atura taua peroveta ra ko Hanania i taua mataiti ra, i te itu o te marama ra.