Ieremia

35 TE TUATUA i tae mai kia Ieremia, no ko ia Iehova ra, i te au rā o Iehoiakima, te tamaiti a Iosia ra, ariki no Iuda, na ko maira,

2 Ka aere ki te are o te ngati Rekabi, ka karanga atu ei kia ratou, e arataki mai oki ia ratou ki roto i te are o Iehova, ki roto i tetai pia ra, ka oronga atu ei i te wina na ratou kia inu.

3 Kua arataki maira au ia Iaazania, te tamaiti a Ieremia, te tamaiti a Habazinia ra, e tona au taeake, e te au tamariki ravarai nana, e te ngutuare katoatoa o te ngati Rekabi ra.

4 I arataki mai au ia ratou ki roto i te are o Iehova, ki roto i te pia o te au tamariki a Hanana, te tamaiti a Igedalia, e tangata no te Atua, ki vaitatao i te pia o te ui ariki ra, ki runga ake i te pia o Maaseia, te tamaiti a Saluma, tiaki ngutupa ra.

5 Kua tuku atura au i te au kapu i ki i te wina, ki mua i te aroaro o te au tamariki o te ngutuare o te ngati Rekabi, e te au kapu rikiriki katoa, e kua karanga atura au kia ratou, Ka inu kotou i te wina.

6 Kua tuatua maira ratou, Kare matou e inu i te wina: ko Ionadaba te tamaiti a Rekabi, to matou metua ra, tei poroaki mai oki ia matou, na ko maira, Auraka kotou e inu i te wina, kotou, e ta kotou au tamariki, e tuatau ua atu:

7 Auraka oki kotou e patu i te are, auraka e ruru i te ua, auraka oki e tanu kainga vine, auraka oki o reira ia kotou; ei roto ra kotou i te puakapa noo ei, e ope ua atu to kotou puke rā, kia rai to kotou au rā i te ora anga i runga i te enua, ta kotou i noo tangata ke ke ua ana.

8 Kua akarongo oki matou i te reo o Ionadaba, te tamaiti a Rekabi, to matou metua ra, i te au mea katoa tana i poroaki mai ia matou, kia kore e inu i te wina i to matou au rā katoa nei, ko matou, ta matou au vaine, ta matou au tamaroa, e ta matou au tamaine;

9 Kare oki i patu i te are ei nooanga no matou: kare oki o matou kainga vine, kare oki e koro, e kare e ua rakau:

10 Noo ua ana ra matou ki roto i te puakapa, e kua akarongo, e kua rave, i te au mea katoa ta to matou metua, ta Ionadaba, i poroaki mai ia matou.

11 Kia tae maira te ariki o Babulonia ra, ko Nebukanesa, ki teianei enua, kua na ko akera matou, Ka aere mai, ka aere tatou ki Ierusalema no te nuku oki o te Kaledea, e no te nuku katoa o Suria; i noo ei matou i Ierusalema nei.

12 Kua tae maira te tuatua a Iehova kia Ieremia ra i reira, na ko maira,

13 Te na ko mairā Iehova Sabaota ra, te Atua no Iseraela, Ka aere ka karanga atu ki te au tangata no Iuda, e to Ierusalema ra, Kare ainei kotou e āriki i te ako, ka akarongo mai ei i taku nei tuatua? te tuatua mairā Iehova.

14 I te au tuatua a Ionadaba, te tamaiti a Rekabi, tana i poroaki ki te au tamariki nana ra, e auraka e inu i te wina ra, kua akonoia ïa; kare oki ratou i inu e tae rava akenei ki teianei rā, kua akarongo ratou i te iku a to ratou metua ra; ko au katoa oki tei karanga atu kia kotou, ma te tu popongi anga, e te tuatua anga atu, kare ra kotou i akarongo mai iaku.

15 Kua tono atu oki au i te au tavini katoa noku ra, i te au peroveta, i te tu popongi anga, e te tono anga atu, i te na ko anga atu e, E ariu mai na kotou, te tangata katoa i tona ra aerenga kino, e akameitaki ana i ta kotou e rave ra, auraka e aru i te au atua ke, i te tavini anga ia ratou; ka noo ei ki te enua i orongaia e au no kotou, e no to kotou au metua ra; kare ra kotou i ariu mai i to kotou taringa, kare oki i akarongo mai iaku.

16 No te mea, te au tamariki a Ionadaba, te tamaiti a Rekabi, kua akono i te iku a to ratou metua, tana i iku mai ia ratou ra; kare ra teianei aronga i akarongo mai iaku nei:

17 E tenana, te na ko maira te Atua Sabaota ra, ko Iehova, te Atua o Iseraela; I na, ka apai mai au i te au kino katoa ki runga ia Iuda, e ki runga i to Ierusalema katoa ra, i taku i tuatua ia ratou ra: no te mea kua tuatua atu ia ratou e kare ra ratou i akarongo mai, kua kapiki atu au ia ratou, kare ra ratou i îō mai.

18 Kua karanga aturā Ieremia ki te ngutuare o te ngati Rekabi ra, Te na ko mairā Iehova Sabaota ra, te Atua o Iseraela; No te mea, kua akarongo kotou i te iku a to kotou metua ra a Ionadaba, e kua akono i te au poroaki katoa nana ra, e kua rave i te au mea katoa tana i akaue mai ia kotou;

19 E teianei, te na ko mairā Iehova Sabaota ra, te Atua o Iseraela, Kare ravā Ionadaba te tamaiti a Rekabi e ngere i te tangata i te tu anga ki mua iaku e tuatau ua atu.