Ieremia

48 NO MOABI. Te na ko mairā Iehova Sabaota ra, te Atua o Iseraela; E ae oki Nebo e! kua tanea oki: kua tumatetenga Kiriataima, kua rauka: kua tumatetenga Misigaba, e kua mataku oki.

2 Kare Moabi e akameitaki akaouia i Hesebona; kua akakoro oki ratou i te kino nona: kua na ko e, Taki aere tatou e kokoti ke atu tatou iaia, auraka aia e iti-tangata. E ko koe katoa e Madema: e akamutekiia ïa, e aruia koe e te koke ra.

3 E reo aue mei Horonaima mai, i te pou e te mate maata.

4 Kua pou Moabi; te kitea ra te aue o te tamariki nana.

5 Koia ïa, i te kakenga i Luita, kua na rungao te aue i te aue; i te ekenga i Horonaima, kua rongo te enemi i te aue pou.

6 Ka ati kotou, kia ora kotou, kia riro ua atu kotou mei te rakau mate ua i te medebara ra.

7 No te mea te irinaki ra koe ki taau angaanga e to apinga, e rauka katoa koe: e riro Kemosa ei tuikaa, te kau taunga nana, e te ui ariki katoa ki ona ra.

8 E tae mai te āru ki te au oire katoa ra, kare tetai oire e ora: e pou katoa te o, e pou te ngai mataataa, ta Iehova rai oki i tuatua maira.

9 O atu i te peau kia Moabi, kia rere ke atu aia ra: ka tanea atu tona au oire, auraka rava ei tangata to roto ra.

10 Kia taumaaia tei rave i te angaanga a Iehova ma te maromaroā; kia taumaaia tei tāpu i tana koke i te toto.

11 I nianiaau ua ana Moabi mei tona ou anga maira, kua noo ua aia ki runga i tana ota, kare oki aia i pukao keia, ki tera āriki, ki tera āriki, kare oki aia i riro ei tuikaa: i mou ei tona tu ki roto iaia, kare tona kakara i akatu keia.

12 E teianei, i na, e tae mai te au rā, te tuatua mairā Iehova, e tono atu ei au i te aronga akataʼe, e akataʼe ke atu ratou iaia, e kia pou rava tana au āriki, e kia ngaangaa tana au ue.

13 E akama oki Moabi ia Kemosa, mei te ngutuare o Iseraela i akama i to ratou irinakianga ia Betela.

14 Eaa oki kotou i tuatuaʼi e, Te maroiroi nei matou, e tangata ririnui i te tamaki?

15 Kua āruia Moabi, e kua peke tona au oire ki runga, e te au tangata ou ikiia nona ra, kua riro ki raro ki te tainga, te tuatua maira te Ariki, ko Iehova Sabaota ra tona ingoa.

16 Te vaitata ra te tumatetenga o Moabi i te tae mai, e te viviki maira tona mate.

17 Ka aue iaia, e te aronga katoa e pini rava ake iaia ra; e ko kotou katoa oki i tei kite i tona ingoa, ka tuatua, Aue te rakau maroiroi i atiati e! te rakau manea e!

18 Ka eke mai na ki raro i toou na kakā, ka noo ki runga i te one marō, e tera ra tamaine i noo i Dibona; te kake atura te āru ia Moabi e rave ia koe, e nana e vavaʼi i to akapuanga ketaketa ra.

19 Tu ua ki te pae arataa, ka akaraʼi, e tei noo i Aroera; e i tei ati ra ka ui atu, e te vaine i ora maira, ka na ko atu ei, Kua aaia?

20 Kua tumatetenga Moabi, no te mea kua ngaangaa aia ki raro: ka kakaoa kotou, ka aue; e akakite kotou ki Aranona e, kua pou rava Moabi.

21 Kua riro mai te tuatua-tau ki runga i te enua mataataa ra, ki runga ia Holona, e ki runga ia Iahaza, e ki runga ia Mephata,

22 E ki runga ia Dibona, e ki runga ia Nebo, e ki runga ia Bete-dibelataima,

23 E ki runga ia Kiriataima, e ki runga ia Bete-gamula, e ki runga ia Bete-meona,

24 E ki runga ia Keriota, e ki runga ia Bozara, e ki runga i te au oire katoa i te enua ra i Moai, tei te mamao ke, e tei vaitata mai.

25 Kua kokoti keia te tara o Moabi, e kua aatiia tona rima, te tuatua mairā Iehova.

26 Akakona ua atu kotou iaia: no te mea kua akamaata aia iaia uaorai ia Iehova; kia takaviri ua Moabi i tona ruaki anga, kia riro katoa oki aia ei avirianga.

27 Kare ainei Iseraela i riro ei avirianga naau? Rokoia atu ainei aia tei roto i te au keia? Mei te tuatau i tuatuaʼi koe iaia, kua takirikiri koe i to mimiti.

28 Ka akaruke i te au oire, ei roto i te mato noo ei, e te au tangata no Moabi, e kia riro mei te kukupa, tei anga i tona koanga i te nia o te vaarua ra.

29 Kua akarongo matou i te nengonengo o Moabi, nengonengo maata ua atu tona; tona akamaata, e tona akateitei, tona akaparau, e te teitei o tona ngakau.

30 Kua kite au i tona riri, te tuatua mairā Iehova; kare ra e pera, kare rai e pera i te tupu tana pikikaa.

31 E teianei e kakaoa au ia Moabi, e aue au ia Moabi katoatoa ra; e mii au i te au tangata i Kira-haraseta.

32 E aue au ia koe i te aue ia Iazera, e te vine i Sibema e: kua toro to au rara ki te pae tai ra; kua tae rava te reira ki te tai i Iazera; kua rokoia taau mou e te vine akaū i te noni.

33 Kua apai keia te rekareka e te pereperekavana i te kainga uua, i te enua oki o Moabi; e te wina no te taomi anga ra, kua akakoroia e au ra: kare tetai e takatakai ma te maeva; e te maeva kare atura te maeva.

34 Kua akateitei i to ratou reo, mei te aue ana mai o Hesebona, e tae ua atu ki Eleale, e ki Iahaza; mei Zoara e tae ua atu ki Horanaima, mei te puakatoro ua mataiti toru ra: e te au vai Nimirima, kua pou ïa.

35 E akakore oki au i Moabi, te tuatua mairā Iehova, i tei apai atinga ki runga i te ngai teitei ra, e tei tutungi i te rakau kakara no tona ra au atua.

36 E teianei e tangi toku ngakau ia Moabi mei te vivo ra, e tangi a vivo ua toku ngakau i te au tangata o Kira-haraseta: no te mea, ko te apinga i rauka iaia ra, kua pou ïa.

37 Kare e upoko toe i te mangoreia, kare e kumikumi toe i te varuia: tei runga i te au rima katoa te tapatapai, e tei runga i te au taukupu te kakau paoa.

38 Tei runga i te au tapoki are katoa a Moabi, e i roto i te au arataa katoa ra, ko te aue anake ra ïa: kua akangaangaa au ia Moabi, mei te kapu kare i inangaroia, te tuatua mairā Iehova.

39 Aue te ngaangaa nona ki raro e! ta ratou ïa e pukaoa maira; aue te iki a Moabi i te tua ma te akama e! e riro oki Moabi ei aviri anga, e ei mataku anga na te tangata katoa e pini ua ake iaia ra.

40 Te na ko maira oki a Iehova; I na, e rere aia mei te aeto ra, ka totoaʼi tona peau ki runga ia Moabi.

41 Kua pou te au oire, kua rauka te au punanga, e riro oki te ngakau o te aronga ririnui i te reira rā i Moabi, mei te ngakau o te vaine kia rokoia e te anau ra.

42 E pou oki Moabi, kare atura ïa e tangata, no te mea kua akateitei aia iaia uaorai ia Iehova ra.

43 Te mataku, e te vaarua, e te ereere, tei runga ïa ia koe, e tei noo i Moabi e! te tuatua mairā Iehova.

44 Ko te oro i te mataku ra, e topa ïa ki roto i te vaarua; e ko tei kake mai i roto i te vaarua ra, e mou ïa i te ereere: e akatae atu au ki runga iaia, koia oki Moabi, te mataiti e tutakiiaʼi ratou, te tuatua mairā Iehova.

45 Tu ua maira te aronga i oro ki raro ake i te maru o Hesebona i te maroiroi kore; puroro ua maira te ai mei roto mai i Hesebona, e te mura ai mei roto mai i Sihona, e ka pou te pae o Moabi, e te ngai teitei o te au tamariki vaavaa nunui.

46 E ae oki koe, e Moabi e! kua mate te au tangata o Kemosa: kua apai tuikaaia taau au tamaroa, kua riro katoa oki toa au tamaine ei tuikaa.

47 E ruri ke ra au i te tuikaa anga o Moabi, kia tae ki te au rā openga ra, te tuatua maira Iehova. Oti ra ua te tuatua-tau ia Moabi.