Te Aue o Ieremia

1 AUE te noo miea ua o te oire e, tei ki ana i te tangata e! kua riro ïa mei te vaine takaua, tei maata i rotopu i te au enua ra! ko tei ariki vaine i rotopu i te au motia ra, kua riro ïa ei tautaūnga!

2 E aue maata tona i te po nei, e te vai ra tona roi-mata ki runga i tona paparinga: kare rava e akapumaana i te aronga katoa i inangaro mai iaia ra: e pikikaa anake ta te au oa nona, kua riro ratou ei enemi nona.

3 Kua riro Iuda ei tuikaa no te takinga-kino, e no te angaanga maata: te noo ra aia ki roto i te au etene, e kare e akaeaanga e kitea e ia: rokoia uaia mai aia i roto i te tumatetenga e te aronga ravarai i takinga-kino ra.

4 Kua aue to Ziona au arataa, no te mea kare tetai e tae mai ki te au oroa tapu ra: kua tanea te au ngutupa katoa nona ra: kua mii tona aronga taunga, kua tumatetenga te aronga paretenia nona, e kua mamae aia.

5 Ko tona aronga enemi, ko tei upokotu ïa; ko tona ra au ekai, ko tei manuia ïa; no te mea ko Iehova tei akatumatetenga mai iaia no te maata o tana ra au ara: kua riro tana au tamariki ki te tuikaa anga ki mua i te aroaro o te enemi.

6 E te manea o te tamaine a Ziona ra, kua ope ïa i te riro ke: kua riro tona ui ariki mei te aili kare roa a ratou e kai, e kua riro ma te maroiroi kore ki mua i te aroaro o te arumaki ra.

7 Kua maara Ierusalema i te au rā i mate ei, e i tumatetengaʼi aia ra, i te au mea i inangaroia nana i te au rā i muatangana, ka topaʼi tona au tangata ki roto i te rima o te enemi, kare ona o tauturu: kua akara mai te au enemi iaia, kua kata aviri mai ratou i tona au mate.

8 E ara maata ta Ierusalema i rave; no reira aia i akataka keiaʼi: te aronga katoa i akapaatu iaia ra, kua akaviivii atu iaia, no te mea kua kite ratou i tona vai taaka ua; koia katoa uaorai tei mii ua, e kua ariu ki muri.

9 Te vai ra tona viivii ki tona tapa kakau; kare ra aia i manako i tona openga; i tuku akaaka ravaiaʼi aia ki raro: e kare ona e akapumaana. Ka akara mai, e Iehova, i toku nei tumatetenga: no te mea kua akateitei te enemi.

10 Kua oora te enemi i tona rima na rungao i te au mea i inangaroia nana: kua kite oki aia i te au etene i te tomo anga ki roto i tona ra ngai-tapu, i tei akaueia e koe e, auraka e tomo ua atu ki roto i toou ra uipa anga.

11 Kua mii tona au tangata katoa, kua kimi ratou i te manga; kua oronga ratou i ta ratou mea inangaro ei oko kai ei akaoki mai i te vaerua: ka akara mai, e Iehova, ka akamanako mai; no te mea kua riro au ei mea viivii.

12 E puapinga kore ainei na kotou ravarai, tei aere na te ara? E nānā mai, e akara, i te tu o te aue e tau i toku nei aue, i tei akairiia mai ki runga iaku nei, i ta Iehova i akatumatetenga mai iaku, i te rā i otooto mai ei tona riri.

13 Kua tuku maira aia i te ai no runga mai ki roto i toku nei au ivi, e kua vi ratou i te reira: kua totoa mai aia i te kupenga no toku vaevae, kua akaoki aia iaku ki muri: kua akamiea ua mai aia iaku kua rere a mate ua e po ua atu te rā.

14 Te zugo o taku ara nei, kua tamouia ïa e tona uaorai rima: kua taviriia ïa; kua tae ki runga i toku kaki; kua tuku aia i te ririnui noku ra ki raro, kua orongaia au e te Atu ki to ratou rima, kare e tika iaku kia tu ki runga.

15 Kua akavaavaa mai te Atu i toku aronga ririnui katoa i rotopu iaku nei: kua kapiki aia i te uipa anga i runga iaku nei, kia pîî toku au tangata ou nei: kua takatakaiia e te Atu mei tei te taomi anga wina ra, i te tamaine paretenia a Iuda nei.

16 Ko te au mea teia i aue ei au nei; toku mata, toku mata te maringi a vai ua nei, no te mea ko te akapumaana, te akaoki mai i toku vaerua, tei te atea ke ïa iaku: kua miea ua taku au tamariki ra, no te mea kua autu te enemi.

17 Kua oora mai Ziona i ona rima, kare ra ona e akapumaana: kua ikuiku a Iehova i te tuatua ia Iakoba ki tona au enemi e akapini mai iaia ra, kua riro Ierusalema mei te mea viivii i rotopu ia ratou ra.

18 E tuatua-tika ta Iehova; no te mea kua patoi au i tona vaa: e akarongo mai, ko taku ïa tuatua kia kotou, e te au tangata katoa nei, e akara mai i toku nei aue: toku au paretenia, e toku au tangata ou, kua riro ïa ei tuikaa.

19 Kua kapiki au ki tei inangaro mai iaku ra, kua pikikaa maira ratou iaku: toku kau taunga e toku au tangata pakari, kua unui ravaia i roto i te oire, i te kimi anga i te kai na ratou uaorai ei akaoki mai i to ratou vaerua.

20 Ka akara mai, e Iehova; no te mea e mate toku: kua ori ua toku manava; kua ruri ke toku ngakau i roto iaku nei: no te mea kua maata toku meameaau anga: na te koke e akangere mai i te atea ke ra; tei te ngutuare nei, ko te mate ïa.

21 Kua akarongo ratou iaku i te ngengeti anga: kare ra e akapumaana iaku ra: kua akarongo toku au enemi katoa i toku nei tumatetenga; kua rekareka ratou i te mea naau i rave: e tuku maira koe i te rā i akakiteia mai e koe ra, kia riro ratou mei iaku katoa nei.

22 Kia tae mai to ratou au kino katoa ki mua ia koe ra; ka rave atu ei ia ratou, mei taau i rave mai iaku nei i taku nei au ara katoa: kua maata rava nei toku ngengeti anga, e toku ngakau nei kua taitaia rava.