Ezekiela

5 E KO koe, e te tamaiti a te tangata na, ka rave koe i tetai matipi kokoi, ka rave koe i tetai reza varu tanga ra, ka varu ei i to mimiti na, e i to kumikumi, ka rave ei i tetai aite akateiaa ei aite, e ei tua, i taua rauru ra.

2 Te toru o te tuanga ra, naau e tau ki te ai i rotopu i taua oire ra, kia ope nga rā akapini anga ra: ka rave ei oki koe i tetai i taua nga tuanga e toru ra, ka reru aere ei ki te matipi: e tetai toru o te tuanga ra, naau e akapueu ki te matangi; e naku e unui i te koke na muri ia ratou.

3 Ka rave oki koe i tetai pae o ratou, auraka e rainga kia tatau, ka ri ei ki roto i to tapa kakau.

4 Ka rave akaou ei oki koe i tetai pae o ratou, ka titiri atu ei ki roto i te ai, kia ka atu i roto i te ai; e riro oki i te tae mai te ai no roto ia ratou ki te ngutuare katoa o Iseraela.

5 Te na ko maira te Atu ra ko Iehova, Ko Ierusalema teia: kua tuku oki au iaia ki rotopu i te au etene, e te akapiniia nei aia e te pa enua nei.

6 Kua rai tana taruri ke anga i te au tuatua-tau naku ei kino, e iti to te au etene ra, e taku nei au akonoanga, e iti to te pa enua ra e pini ua ake aia ra: kua akaruke ratou i te au tuatua-tau naku ra, e kare ratou i aaere na taku nei au akonoanga.

7 E teianei, te na ko maira te Atu ra ko Iehova, No te mea kua akamaataia kotou i to te au enua e akapini mai ia kotou na, kare i aaere i taku aei au akonoanga, kare i akono i taku nei au tuatua-tau, kare oki kotou i rave i te au tuatua-tau, mei ta te au enua e akapini ia kotou na;

8 E teianei, te na ko maira te Atu ra ko Iehova; I na, ko au, ko au nei rai, tei patoi ia koe, e naku e akautunga atu i rotopu ia koe, kia mua i te aroaro o te au enua nei.

9 E naku e rave i roto ia koe i tei kore i raveia e au ra, e kare oki au e pera i te rave akaou, no taau ra au mea viivii ravarai ra.

10 E teianei e kai te au metua i te tamariki i roto ia koe na, e kai oki te au tamariki i te au metua; e naku e akautunga atu i to roto ia koe; e toou aronga ravarai i toe ra, naku ïa e akapueurikiriki ki te au matangi katoa ra.

11 E teianei, te ora nei au, te tuatua maira te Atua ra ko Iehova; No te mea kua akaviivii mai koe i toku nei ngai-tapu, i taau katoa ra au mea viivii, e taau katoa ra au mea kikino, e rave au ia kotou e akaiti, e kare toku mata e akaperepere, e kare rava oki au e aroa atu.

12 Te toru o te tuanga ia koe ra, ka mate ïa i te maki-mate ra, e pou oki i te onge i rotopu ia koe na: e te toru oki o te tuanga ra, e inga ïa i te koke e pini ua ake koe na: e te toru oki o te tuanga, naku ïa e akapueurikiriki ki te au matangi katoa ra, e naku e unui i te koke na muri ia ratou.

13 E pera au i te akatupu i toku nei riri, e e akairi au i taku riri otooto ki runga ia ratou, e mareka akera oki au: e kite ïa ratou e, naku na Iehova i karanga atu ma taku ririnui katoa ra, kia akatupuia taku riri otooto ki runga ia ratou.

14 E akariro atu oki au ia koe ei tanea, e ei akakino anga i rotopu i te pa enua e akapini mai ia koe ra, ki mua i te aroaro o te aronga katoa e na reira te aere.

15 E riro oki ïa ei akakino anga, e ei amuamu anga, e ei ako anga, e ei vavaranga, na te pa enua e akapini mai ia koe ra, kia akatupu au i te tuatua-tau ki runga ia koe, ma te riri, ma te riri otooto, e ma te akamura viviki atu.

16 Kia akaunga atu au i te au kakao kikino ra i te onge ki runga ia ratou, ka mate ei ratou ra, ko taku ïa e akaunga atu kia pou kotou: e akamaata au i te onge ki runga ia kotou, e ta kotou tauturu ra, ko te manga, naku ïa e aati.

17 E unga atu au i te onge ki runga ia kotou, e te au puaka kikino, e na te reira e akangere ia koe; e te maki-mate, e te toto, te ka na roto ia koe; e apai mai oki au i te koke ki runga ia koe. Ko au teia ko Iehova e tuatua nei.