Hosea

12 TE kai nei Epheraima i te matangi, e te aru aere nei i te maoake: te akamaata nei aia i te pikikaa e te āru, kare e rā e tukua; e te koreromotu nei ratou ki to Asura, e te apaiia nei te manongi ki Aiphiti.

2 E taumāro anga rai oki ta Iehova ia Iuda, e e akautunga atu aia ia Iakoba ki tei tau ki tona ra au aerenga; e tutaki atu aia iaia ki tei tau ki tana ra au ravenga.

3 I roto aia i te kopu i te opu anga i te poo vaevae o tona tuakana; e no tona ririnui e mana ariki tona i te Atua ra:

4 Koia ïa, e mana ariki tona i te Angela, tupu atura tana: kua aue aia, e kua pati akatenga atu iaia ra: i Betela tona kite anga atu iaia, e i reira tana tuatua anga mai kia tatou:

5 Koia te Atua Sabaota ra ko Iehova; ko Iehova tona uaorai ingoa mou.

6 E teianei e ariu koe ki toou ra Atua; e akono i te aroa e tuatua-tau, e tapapa marie koe ki toou ra Atua ma te tukumoe kore.

7 E tangata okooko aia, e aite pikikaa tei tona rima: e mea anoano nana i te tinai-mate atu.

8 Kua tuatua oki Epheraima, Kua riro au ei tangata apinga, kua kitea e au te apinga naku: i taku katoa ra au angaanga, kare e rauka ia ratou te kino i ara ai au ra.

9 Ko to Atua ra au ko Iehova mei te enua maira mei Aiphiti, e akanoo akaou rai au ia koe ki roto i te au puakapa, mei tei te au rā oroa tapu ra.

10 Kua tuatua oki au i te au peroveta, e kua akamaata rai au i te orama, e te au aiteanga i te rima o te au peroveta.

11 E ara tikai tei Gileada, e mea puapinga kore tikai ratou: te apai nei ratou i te au puakatoro i Gilagala; e kua riro ta ratou au atarau, mei te au utua toka i te ngai aroteia i te au kainga ra.

12 Ati atura Iakoba ki te enua ra i Arama; tavini atura oki a Iseraela i te vaine; e no te vaine rai i tiaki ei aia i te au anana.

13 E kua arataki mai a Iehova ia Iseraela mei Aiphiti mai i te rima o te peroveta, e na te peroveta aia i tiaki.

14 Kua akakoko ra Epheraima i te riri maata i vaoo ei tona Atu i tona toto ki runga iaia, e ka akaoki maira i tona akakino ki runga iaia.