Hosea

4 E AKARONGO mai kotou, e te au tamariki a Iseraela e, i te tuatua a Iehova: e māro anga oki ta Iehova i te au tangata o te enua nei, no te mea, kare e tuatua-mou, e kare e aroa, kare oki e kite i te Atua, i te enua nei.

2 I te tao, e te pikikaa, e te ta tangata, e te keia, e te akaturi, kua rave viviki ratou, e kua taea tetai toto ki tetai.

3 E teianei e mii te enua nei, e ka mae oki te aronga ravarai e noo i reira, e te au puaka katoa o te enua nei e te au manu o te reva; e te au ika katoa o te tai ra, e ravea keia ïa.

4 Auraka tetai e māro, auraka e ako atu i tetai ke: kua aite oki toou au tangata i te aronga e māro ki te taunga ra.

5 E teianei, ei te ao koe e ingaʼi e inga katoa oki te peroveta e koe katoa i te po, e ka tipu ke atu au i to metua vaine ra.

6 Kua tipu keia toku iti-tangata i te kite kore: no te mea kua kopae koe i te kite, e kopae katoa au ia koe, auraka koe ei taunga naku nei: no te mea kua akangaropoina koe i te ture a to Atua, e akangaropoina katoa au i to au tamariki.

7 Mei ia ratou i tupu ki te maata, kua pera katoa ta ratou ara anga iaku nei: e teianei e akariro au i ta ratou kakā ei mea akama.

8 Te kai ra ratou i te au tarangaara a toku ra au tangata e te akamou nei ratou i to ratou ngakau ki to ratou kino.

9 E riro oki mei ta te tangata ra, ka pera rai ta te taunga: e e tutaki atu au ia ratou i to ratou au aerenga, e ta ratou i rave ra e akaoki au ki runga ia ratou.

10 E kai oki ratou kare ra e pangia te kaki: e akaturi ratou, kare ra e maata, no to mea kua akapaki ratou i te akono ia Iehova.

11 Te akaturi, e te wina, e te wina ou, i riro ke ei te ngakau.

12 Te ui nei toku au tangata ki to ratou au rakau, e na to ratou tokotoko e akakite mai kia ratou: no te ngakau akaturi i tatipake ei ratou, e kua riro ki te akaturi mei raro ake i to ratou Atua.

13 Te apai nei ratou i te atinga ki runga i te au take maunga ra, e te tutungi nei i te rakau kakara ki runga i te au tuaivi, i raro ake i te au rakau, e te au libene, e te ale, no te mea e marumaru meitaki to reira: e teianei, ka riro ta kotou au tamaine i te kanga, e ta kotou au vaine ou i te akaturi.

14 Kare au e tutaki atu i ta kotou au tamaine kia kanga ratou ra, e ta kotou au vaine ou kia akaturi ratou: kua tapae oki ratou uaorai ki o te au vaine akaturi, e kua apai atinga ratou e te au akaturi katoa ra: e teianei, e riro te au tangata kite kore i te inga.

15 Kia riro ua koe, e Iseraela, ki te akaturi, auraka tika ra Iuda e tatipake: auraka kotou e aere ki Gilagala, auraka oki kotou e aere ki runga ki Bete-avene, auraka e taputou e, Te ora rā Iehova.

16 Te kotoe nei a Iseraela ki muri mei te puakatoro ua e kotoe ki muri ra: e teianei e akaangai a Iehova ia ratou mei te punua mamoe i te ngai atea ra.

17 Kua piri Epheraima ki te au idolo: e vaoo ua atu iaia

18 Kia kore ake ta ratou akakona anga, kanga iora ratou: kua inangaro tona au tutara i te mea akama.

19 Kua rave viviki te matangi iaia i tona au peau, kia akama ratou i ta ratou au atinga.