Levitiku

23 KUA tuatua mairā Iehova kia Mose, na ko maira,

2 E karanga atu koe ki te tamariki a Iseraela, e na ko atu kia ratou, Te au oroa a Iehova, ta kotou e akono ei uruoaanga tapu ra, ko teia taku au oroa ra.

3 Ka raveia te angaanga i nga rā e ono ra; kareka te rā itu, i te sabati akangaroi anga ra, ei uruoaanga tapu ïa; kare rava e angaanga e raveia i reira: ei sabati ïa no Iehova i to kotou au nooanga katoa ra. 4 Teia ra te au oroa a Iehova, e au uruoaanga tapu ïa, ta kotou e akono i to ratou ra tuatau i akonoia ra.

5 I te marama mua, i te po okotai ngauru ma a i taua marama ra, i te aiai, ko te pasa ïa na Iehova. 6 E te po okotai ngauru ma rima i taua marama ra, ko te oroa areto akaopue koreia ïa na Iehova: kia po itu kotou i te kainga i te areto akaopue koreia ra.

7 I te rā mua ra, ei uruoaanga tapu ta kotou; auraka rava kotou e rave i te angaanga i reira. 8 E apai ra kotou i te atinga ai na Iehova i taua au rā katoa e itu ra; ei te rā itu oki tetai uruoaanga tapu ra; auraka roa kotou e rave i te angaanga i reira. 9 Kua tuatua mairā Iehova kia Mose, na ko maira, E karanga atu koe ki te tamariki a Iseraela, e tuatua koe kia ratou,

10 Kia tae kotou ki te enua taku e oronga atu nei no kotou, e kua kokoti kotou i te kai mou ra, e apai mai kotou i tetai ruru i taua popo o ta kotou kai akaū ki te taunga ra:

11 E nana e ruru i taua ruru sitona ra ki mua i te aroaro o Iehova, kia marekaia mai na kotou; kia popongi ake kia oti te sabati ra, e ruruiaʼi e te taunga te reira. 12 Ei te rā e ruruiaʼi te ruru sitona ra, e apai ei kotou i tetai punua mamoe toa mataiti okotai, e te kino kore, ei atinga karakaratio na Iehova: 13 E tona ra atinga kai, kia rua ïa omera faraoa pueu i irokia ki te inu ra, ei atinga ai aunga kakara na Iehova: e tona atinga inu wina ra, kia okotai ia kuata ina.

14 Auraka kotou e kai i te areto, e te sitona tunu, e te ua ou, e tae ua atu ki te rā tikai e apai mai ei i te atinga na to kotou Atua: ei akonoanga vaoo tamou teia e ope ua ake to kotou au uki ra, i to kotou au nooanga katoa ra. 15 E tatau oki kotou i nga sabati mou e itu; e na taua rā i muri ake i te sabati ta kotou i apai i te ruru sitona e ruru ra, i te tatau: 16 E tae ua atu ki te rā i muri ake i te sabati itu ra, kia rima ngauru anga te rā ta kotou e tatau; ka apai ei kotou i tetai atinga kai ou na Iehova. 17 Ka apai mai kotou i nga areto ruru omera e rua no roto i to kotou au nooanga, ei areto faraoa pueu: e taonaia ma te akaopue katoa; ei popo na Iehova. 18 Ka apai katoa kotou i nga punua mamoe mataiti okotai, e te kino kore, e itu ra, e nga areto, e te puakatoro ou okotai, e nga mamoe toa e rua: ei atinga karakaratio te reira na Iehova, e to reira atinga kai, e to reira au atinga inu, ei atinga ai aunga kakara ïa na Iehova. 19 Ei reira kotou e ta ai i tetai puakanio ei tarangaara, e nga punua mamoe mataiti okotai e rua ei atinga au.

20 E na te taunga e ruru i te reira e te areto popo ra, ei atinga ruru ki mua i te aroaro o Iehova, e nga punua mamoe katoa e rua; e mea tapu te reira na Iehova, na te taunga ïa.

21 Ei uruoaanga tapu ta kotou e akono i te reira rā; auraka rava kotou e rave i te angaanga i te reira rā: ei akonoanga vaoo tamou te reira i to kotou au nooanga katoa, e ope ua ake to kotou au uki ra. 22 Kia kokoti kotou i te kai mou i to kotou na enua, auraka koe e kokoti akapou takiri i te au poo i to koro, auraka oki koe e koi aere i te totoenga kai mou naau na: ka vaoo koe i te reira na te putaua, e na te tangata ke: ko au ko to kotou Atua ra ko Iehova. 23 Kua tuatua mairā Iehova kia Mose, na ko maira,

24 E karanga atu koe ki te tamariki a Iseraela, e na ko atu, Kia tae ki te marama itu ra, i te rā mua o taua marama ra, ei sabati ïa te reira na kotou, ei akonoanga akatangi pu, ei uruoaanga tapu. 25 Auraka rava kotou e rave i te angaanga i te reira rā: e apai ra kotou i te atinga ai na Iehova. 26 Kua tuatua mairā Iehova kia Mose, na ko maira,

27 Te ngauru o te ra o taua marama itu ra, ei rā tapokiangaara ïa; ei uruoaanga tapu na kotou; e e taakaaka kotou i to kotou au vaerua, e apai oki i te atinga ai na Iehova ra. 28 Auraka roa ta kotou ei angaanga e rave i taua rā ra: e rā tapokiangaara oki te reira, ei apai anga i te tapokiangaara na kotou ki mua i te aroaro o to kotou Atua ra ko Iehova.

29 Ko te tangata kare e taakaaka iaia uaorai i te reira rā, e tipu keia i tona iti-tangata ra.

30 E tei rave i te angaanga i taua rā ra, e mate te reira tangata iaku i roto i tona iti-tangata.

31 Auraka roa kotou e rave i te angaanga i te reira rā: ei akonoanga vaoo tamou teia e ope ua ake to kotou au uki, i to kotou au nooanga katoa rā. 32 Ei sabati akaangaroi anga ïa te reira, e e taakaaka kotou i to kotou au vaerua: mei te aiai mai o te rā iva i taua marama ra, e tae ua atu ki tetai aiai, ko ta kotou ïa e akono ei sabati. 33 Kua tuatua mairā Iehova kia Mose, na ko maira,

34 E karanga atu koe ki te tamariki a Iseraela, e na ko atu, Ko te ngauru ma rima o te rā i taua marama itu ra, ko te oroa patia anga puakapa ïa na Iehova, e kia po itu.

35 Ei uruoaanga tapu tei te rā mua ra: auraka roa kotou e rave i te angaanga i reira.

36 E apai kotou i te atinga ai na Iehova, e kia po itu; e ei uruoaanga tapu ta kotou i te rā varu, e ka apai ra i te atinga ai na Iehova: e rā akatapu anga ïa; auraka roa kotou e rave i te angaanga i reira. 37 Ko nga oroa eia a Iehova, ta kotou e akono ei au uruoaanga tapu ra, kia apai i te atinga ai na Iehova; te atinga karakaratio, e te atinga kai, i te atinga, e te au atinga inu; i to ratou ra rā tikai: 38 E te au sabati katoa o Iehova, e te au mea oronga ua na kotou, e ta kotou au tia katoa, e ta kotou apinga apai ua katoa, ta kotou e oronga na Iehova.

39 E kia tae ki te ngauru ma rima o te rā i te marama itu ra, kia akaputuputu mai kotou i te kai o te enua, ei oroa ta kotou e akono na Iehova, e kia po itu: ko te rā mua ra ei sabati ïa, e ei sabati katoa te rā varu ra.

40 Ei te rā muatangana e rave ei kotou i te kopura rakau meitaki ra, te kikau nu tamara, e te au rara rakau ruperupe, e te rakau akaevaveva i raro i te kauvai; e rekareka katou ki mua i te aroaro o to kotou Atua ra ko Iehova, e kia po itu.

41 Ei oroa ta kotou e akono na Iehova, e kia po itu i te mataiti okotai. Ei akonoanga vaoo tamouia e ope ua ake to kotou au uki ra; ei te marama itu ra kotou e akono ei i te reira.

42 Ei roto kotou i te au are piritanga noo ei e kia po itu; ko to Iseraela tikai ra ei roto ïa ei te are piritanga noo ei;

43 Kia kite to kotou au uki a muri atu e, kua akanoo au i te tamariki a Iseraela ki roto i te are piritanga, iaku i arataki mai ia ratou mei te enua maira mei Aiphiti: ko au to kotou Atua ra ko Iehova.

44 E kua akakite aturā Mose ki te tamariki a Iseraela i te au oroa a Iehova.