Zekaria

10 E PATI kotou kia Iehova i te ua i te tuatau i te ua openga ra: te anga rā Iehova i te uira, e te oronga maira i te ua kutukutu no ratou, te kai na te tangata katoa i te enua.

2 E tuatua puapinga kore tikai ta te au tiki, e e pikikaa ta te au taura atua i akara ra; e moe pikikaa oki ta ratou i akakite mai, kua tuatua ratou i te mea puapinga kore ei akapumaana; i uoa aere uaʼi ratou mei te anana ra; e mate to ratou, no te mea kare e tiaki.

3 Ka akera toku riri ki te au tiaki, e kua akautunga atura au i te au puaka-nio toa ra; kau atoro maira rā Iehova Sabaota ra i tana anana i te ngutuare o Iuda, e kua akariro ia ratou mei te oroenua meitaki nana i te tamaki ra.

4 No ko mai iaia te toka tiavā, no ko mai iaia te nairo, no ko mai iaia te ana tamaki, no ko mai iaia te au tutara ravarai i te aerenga.

5 E mei te au toa ririnui ka takatakai ei ratou i te enemi i te tamaki anga ki roto i te vari i te au arataa ra; e tamaki ratou, ko Iehova oki tei vaitata mai ia ratou, e riro oki te aronga akaoro oroenua ra i te taakamaia.

6 E naku e akamaroiroi i te ngutuare o Iuda, e e akaora au i te ngutuare o Iosepha, e akatinamou oki au ia ratou, no te mea kua tangi au ia ratou; e riro oki ratou mei te mea e kare ratou i akarukeia e au ra, ko au oki to ratou Atua ko Iehova, e naku ratou e akarongo atu.

7 E riro oki Epheraima mei te to ririnui ra, e e rekareka to ratou ngakau mei te mea e no te wina; e kite oki ta ratou au tamariki, e rekareka to ratou ngakau ia Iehova.

8 Naku e mitimiti ia ratou, e e akaputuputu ia ratou; kua okoia oki ratou e au, e rai oki ratou mei ia ratou i rai ana.

9 I ruru ana oki au ia ratou i roto i te au tangata ra, e akamaara mairai ratou iaku i te au enua mamao ra; e ora oki ratou ma ta ratou katoa ra au tamariki, ka oki mai ei.

10 E akaoki mai au ia ratou mei te enua maira mei Aiphiti, e e koi aere mai au ia ratou mei Asura mai; e e arataki mai au ia ratou ki te enua ra ia Gileada, e ia Lebanona, e kare oki ratou e o i te rai.

11 E na runga aia i te tai i te aerenga, e vevete oki iaia, e ka ta aia i te au ngaru tai ra, e ka marō o te au ngai oonu ravarai o te kauvai ra; e tukuia oki te nengonengo o Asura ki raro ra, e te sepeta o Aiphiti e riro ke ïa.

12 E naku e akamaroiroi ia ratou ia Iehova, e aaere oki ratou ma tona ra ingoa, te tuatua mairā Iehova.