Numero

21 E RONGO akera te ariki no Arada, ngati Kanaana, i noo i te pae i apatonga, e te na Atarima maira Iseraela te aere; kua tamaki maira aia ia Iseraela, e riro tuikaa atura tetai pae o ratou iaia. 2 Kua tia iorā Iseraela ia Iehova ra, karanga atura, Kia tika tikai ia koe i te tuku mai i teianei aronga ki toku nei rima, ka pou tikiri roa to ratou au oire iaku.

3 Kua akarongo mairā Iehova i te reo o Iseraela, e kua tuku maira i te ngati Kanaana ra; pou takiri rava akera ratou e to ratou au oire: tapa iora ratou i te ingoa o taua ngai ra ko Horama.

4 Akaruke iora ratou i taua maunga ra ko Hora, aere iora na te ara tiroa na te Tai Muramura ra: e takako i te enua o Edoma ra: taitaia roa akera te ngakau o te tangata i taua arataa ra.

5 Kua tuatua kino iora te tangata i te Atua, e ia Mose, Eaa korua i arataki mai ei ia matou mei Aiphiti mai kia mate matou i teianei medebara? kare oki e areto, kare oki e vai, e kua iu matou i teianei kai māmā ua. 6 Kua tuku mairā Iehova i te au ovi ai i rotopu i te au tangata, e kua kakati ratou i te tangata; e manganui o to Iseraela i mate takiri rava.

7 Kua aere maira te tangata kia Mose, kua tuatua maira, Kua ara matou, kua tuatua kino oki matou ia Iehova, e ia koe; e tautopa koe ia Iehova kia apai ke aia i te au ovi ia matou nei. Kua tautopa iorā Mose kia Iehova i taua au tangata ra. 8 Kua tuatua mairā Iehova kia Mose, E anga koe i tetai ovi ai ra, ka tamou ei ki runga i tetai rakau roa, e te tangata ravarai i katia ra, me akara aia i taua ovi ra, ka ora ïa. 9 Kua anga iorā Mose i tetai ovi veo, tamou akera ki runga i te rakau roa ra; e te tangata i katia e tetai ovi ra, kua akara ua aia i taua ovi veo ra, kua ora ïa. 10 Kua aere maira te tamariki a Iseraela, e kua patia iora i te puakapa i Obota.

11 E mei Obota mai oki ratou te aere, e patia iora i te puakapa i lieabarima, i te medebara i mua mai i Moabi, i te pae i te itinga o te rā ra.

12 Mei reira oki riro maira ratou, e patia iora i te puakapa i te o ra i Zareda.

13 Mei reira oki, kua aere iora ratou, e kua patia iora i te puakapa i tetai pae i Aranona, ko tei taʼe tika na te medebara, e na te pae o te ngati Amori ra: ko Aranona oki te kotinga o Moabi i rotopu i te ngati Moabi e te ngati Amori ra. 14 I tuatuaiaʼi i roto i te buka tamaki a Iehova ra e; Kia Vaheba i Supha ra, e ki te au kauvai i Aranona ra,

15 Ki te paringa o te au kauvai e tae roa ki te nooanga i Ara, e tei piri tika atu ki te pae o Moabi.

16 Mei reira oki aere atu ratou ki te ruavai, ko taua ruavai ra i tuatuaʼi a Iehova kia Mose ra e, Ka akaputuputu mai i te tangata kiaku nei, e naku e o atu i te vai na ratou. 17 Kua peʼe iora Iseraela i teianei peʼe, Ka pupui mai, e te vai, ki runga! e peʼe kotou i te reira! 18 E ruavai i koia e te aronga tutara, ta te aronga mana o te au tangata nei i ko, i to ratou au rakau, i te ako a te akakite ture ra. Mei te medebara mai oki kua aere mai ki Matana: 19 Mei Matana oki ki Nahaliela; e mei Nahaliela ki Bamota:

20 E mei Bamota oki ki te o, i te enua o Moabi, te ngai i kiteaʼi te take o Pisega, i tei akara tika ki Iesimona. 21 Kua tono aturā Iseraela i te veka ki te ariki o te ngati Amori ra ko Sihona, na ko atura,

22 E aere ana au na toou nei enua; kare matou e tapae ua atu ki roto i te au kainga, e te au kainga vine; kare oki matou e inu i te vai no te punavai ra: e na te ara tiroa o te ariki ra matou te aere ua, e topa ua mai toou na enua.

23 Kare akerā Sihona i tuku ia Iseraela kia aere na roto i tona enua: kua akaputuputu iorā Sihona i te tangata ravarai nona, e kua aere maira ki vao ki te medebara ra e aravei ia Iseraela; e tae maira aia ki Iahaza, e kua tamaki maira ia Iseraela.

24 Pou iora aia i te taia e Iseraela ki te mata koke, riro maira tona enua mei Aranona mai, e tae akera ki Iaboka, i te pae o te tamariki a Amona ra; e pakari oki te kotinga o te tamariki a Amona.

25 Riro maira to reira au oire ravarai kia Iseraela: e noo iora Iseraela i roto i te au oire katoa o te ngati Amori ra; i Hesebona e tona katoa ra au vila.

26 Ko te oire ïa ko Hesebona e te ariki o te ngati Amori ra o Sihona; i tamaki aia ki tetai ariki o Moabi i muatangana ra, e i riro maira tona enua katoa kiaia, e tae rava akera ki Aranona.

27 Koia tei tuatua maseliia ra e, E aere mai kia patuia Hesebona; e kia akatuia te oire o Sihona: 28 E ai tei puroro mai mei roto mai i Hesebona; e te mura ai mei roto ma i te oire o Sihona; i ka ai Ara i Moabi, e te aronga mamaata o te au ngai teitei i Aranona. 29 Aue oki koe, e Moabi e! kua akaruke roaia koe, e to Kemosa e! kua tuku aia i tana au tamariki i ora ra, e tana au tamaine, kia riro ei tuikaa na te ariki o te ngati Amori, na Sihona.

30 Kua akainana atura matou i te kakao kia ratou, kua pou Hesebona e tae rava atura ki Dibona, tairipoti rava akeraia e matou e tae ua atura ki Nopha, i vaitata ki Medeba.

31 Te noo ra oki Iseraela i te enua o te ngati Amori.

32 Kua tono akerā Mose i te tangata e tutaka ia Iaazera, e pou iora te reira ia ratou e tona ra au vila, e tuaru atura i te ngati Amori i reira ra. 33 E kua ariu akera ratou, e kua aere iora na te ara tiroa ki Basana, kua aere maira te ariki o Basana ko Oga e aravei ia ratou, koia ma tona katoa ra au tangata, e tamaki i Ederei.

34 Kua tuatua mairā Iehova kia Mose, Auraka e mataku iaia: e tuku atu au iaia e tona katoa ra au tangata ki toou rima, e tona enua; e mei taau i rave i te ariki o te ngati Amori ra ia Sihona i noo i Hesebona ra, e pera katoa koe iaia.

35 Mate iora aia, e tana au tamaroa, e tona katoa ra au tangata, ia ratou, kare rava akera i toe; riro maira tona enua kia ratou.