Mareko

5 E TAPAE atura ratou ki tetai pai i taua roto ra, i te enua i to Gadara.

2 E kia akaruke aia i te pae ra, kua aravei maira iaia i reira ra, tetai tangata i uruia e te vaerua viivii, no roto mai i te au tanumanga ra;

3 E noo tamou aia ki roto i taua au tanumanga ra; e kare rava e tangata e tika kia tapeka iaia, kare rai oki i te pirianganaoa:

4 I tapeka putuputuia na oki aia i te auri e te pirianganaoa, e kua atiati te auri iaia: e kare ua e tangata e rarataʼi.

5 E noo tamou aia i te maunga i te po e te ao, e i roto i te au tanumanga ra, kapiki aere uaʼi ma te kotikoti iaia uaorai ki te toka.

6 E kia akara mai aia ia Iesu i te atea ke ra, kua oro maira, e akatopa maira, kapiki nui maira, na ko maira,

7 Eaa taau iaku nei, e Iesu, e te Tamaiti a te Atua teitei? Te pati atu nei au ia koe i te ingoa o te Atua, auraka koe e akamamae iaku.

8 I tuatua na oki aia kiaia, Ka aere koe ki vao, e tenana vaerua viivii, i tenana tangata.

9 Kua ui atura aia kiaia, Koai toou ingoa? Kua tuatua maira aia, na ko maira, Ko Manotini toku ingoa, e manganui oki matou.

10 Kua maata ua maira tona kaku iaia, auraka aia e tuaru ke atu ia ratou i te reira enua.

11 E anana puaka maata tei reira, i te kai anga i te kai, i runga i te maunga.

12 Kua kaku maira te au demoni ravarai iaia, na ko maira, E tuku koe ia matou kia tomo ki roto i tera ra anana puaka.

13 Kua tuku aturā Iesu ia ratou i reira. Aere atura te au vaerua viivii ra ki vao, tomo atura ki roto i te au puaka: oro ua atura taua anana, e rua katoa tausani, na te mato, e raro rava i taua roto ra; mate takiri atura i roto i te vai.

14 Ati atura te aronga i angai i te au puaka ra, akakite aere atura i roto i te oire e te au kainga ra. Kua aere maira oki to reira ki vao e akara i taua mea ra.

15 E tae maira ratou kia Iesu ra, kite maira iaia i tei uruia e te demoni ra, tei iaia oki te manotini ra, i te noo marie anga, kua kakau oki i te kakau, e ma tona ngakau tikai; mataku akera ratou.

16 E kia akakite atu te aronga i kite ia ratou i tei raveia i taua tangata demoni ra, e i te anana puaka ra oki,

17 Kua akateni atura oki ratou iaia i reira ra, kia aere ke atu aia i to ratou ra ngai.

18 E tei te aerenga mai aia ki runga i te pai, kua pati ua maira te tangata i uruia e te demoni ra e, ei vaitata katoao aia iaia.

19 Kare rā Iesu i akatika atu, kua na ko atura kiaia, Ka aere i to ngutuare i toou au taeake, e akakite atu kia ratou i taua mea maata ta te Atua i rave io nei i te aroa ia koe.

20 Aere atura aia, akakite aere atura i Dekapoli katoa ra, i te maata o ta Iesu ravenga kiaia; umere anake iora te tangata ravarai.

21 E kia oki aturā Iesu i tetai pae na runga i te pai, e urupu maata tei uipa mai kiaia ra, i te pae rai o taua roto ra.

22 E i na, te aere maira tetai tutara o te sunago, ko Iairo te ingoa, e kite maira aia iaia, kua akatopa iora ki te vaevae o Iesu ra,

23 Kua tuatua meitaki maira kiaia, na ko maira, Kua vaitata taku tamaine iti i te mate, ka aere maira koe, e tuku i to rima ki runga iaia, kia meitaki aia, e ka ora ïa aia.

24 Aere atura aia raua katoa; e te tangata oki e manganui, te ototitoti maira i muringao iaia.

25 E tetai vaine, raungauru ma rua akera ona mataiti, i te mate ua anga i te atekeria.

26 I rapakauia na oki aia e te aronga rapakau ra e manganui, kua pou rava tona apinga, kare rava i ora, te maata ua ra tona maki.

27 E kite akera aia ia Iesu, kua na muri maira i te aere, na roto i taua aerenga tangata ra, kua akatukia atura i tona kakau.

28 Na ko akera, Kia akatukia ua atu au i tona kakau, ka ora ïa au.

29 Mao iora taua atekeria ra i reira, e kite iora aia iaia uaorai, kua ora aia i taua maki nona ra.

30 Kite akerā Iesu e mana tei riro atu no roto iaia i reira, kua ariu akera i te aerenga tangata ra, na ko akera, Koai tei akatukia mai i toku kakau nei?

31 E kua na ko maira tana au pipi kiaia, Te kite mai nei koe i te tangata tini nei i te ototi anga atu ia koe, e ka ui mai oki koe e, Naai i akatukia mai kiaku?

32 Kua akarau aturā Iesu, kia kite aia iaia i tei pera maira.

33 Kua aere maira taua vaine ra ma te mataku e te rutetetete, kua kite iora i te tu ke i akatupuia i roto iaia, kua tipapa iora ki raro ki mua iaia, kua aaki ua maira i te tuatua-mou.

34 E kua karanga atura aia kiaia, E taku tamaine, kua ora koe i toou akarongo, ka aere koe ma te au, e ma te ora i to maki.

35 Kare i mutu taua tuatua ra, ko te karere maira no ko i te tutara o te sunago ra, na ko maira, Kua mate rava to tamaine; eaa koe e tamanamanata atu ei i te Orometua?

36 E kite akerā Iesu i taua tuatua ra, kua na ko atura i taua tutara ra, Auraka e mataku, ka akarongo ua mai koe.

37 E kare atura i tika iaia kia aru mai te tangata, mari ra ko Petero, ko Iakobo, e te taeake o Iakobo, e te taeake o Iakobo ra ko Ioane.

38 E tae atura aia ki te are o taua tutara ra, kite atura aia i te aue, e te tangi maata o te aronga i ea ra.

39 E kia tomo atura aia ki roto ra, kua na ko atura kia ratou, Eaa kotou i eaʼi, e i maataʼi to kotou aue? Kare te tamaine nei i mate, kua moe ra.

40 Kua taitoito maira ratou iaia. Kua tuku atura aia ia ratou ravarai ki vao, arataki atura i te metua tane e te metua vaine o taua tamaine ra, e te aronga i aru mai iaia ra, tomo atura ki roto i te pia, tei reira taua tamaine ra i te vai ua anga.

41 Kua rave atura i te rima o taua tamaine ra, na ko atura iaia, Talita kumi: tera te akatau anga, E maine, ka tu ki runga, te akaue atu nei au ia koe.

42 Kua tu maira taua tamaine ra ki runga i reira, aaere iora, raungauru ma rua oki ona mataiti; va maata ua iora ratou.

43 Kua ako ua atura aia kia ratou e, auraka rava e akakite atu ki te tangata: kua akaue atu oki i te manga na taua tamaine ra.