Luka

14 E TAE akera ki tetai sabati, aere atura aia ki roto i te are o tetai Pharisea tangata mana e kai i te kai, te akara matariki maira ratou iaia.

2 E i na, tei mua i tona aroaro tetai tangata, kua mate i te koao.

3 Kua karanga aturā Iesu ki te au apii ture e te au Pharisea, na ko atura, E mea tika aina i te akaora i te maki i te rā sabati.

4 Kare ra ratou i ki mai. Kua rave atura aia iaia ra, akaora atura, e tuku atura kia aere ana:

5 E kua karanga atura aia kia ratou, na ko atura, Koai to kotou e kare e totō mai i tana asini ki runga, e tana puakatoro, kia topa ki roto i te vaarua i te rā sabati?

6 E kare atura e tika ia ratou kia patoi mai i taua tuatua ra.

7 E kia akara atu aia i taua au manuiri ra i te rapurapu anga, kia riro ia ratou te ngai teitei i te kaingakai ra; kua tuku atura aia i tetai parabole, na ko atura kia ratou,

8 Kia tuatuaia mai koe e aere ki te oroa akaipoipoanga, auraka e aere ki te ngai teitei i te kaingakai: ko te tuatua katoaia atu aea tetai tangata taoiau maata atu;

9 Ko te aere atu oki taua tangata i tuatua ia korua ra, e te karanga atu kia koe e, Ka tuku mai i tenana ngai ki teianei tangata; ko te aere akama ua atu oki koe ki te ngai akaaka.

10 Kia tuatuaia koe ra, e aere ua atu ki te ngai akaaka; e kia tae mai tei tuatua kia koe ra, kia na ko mai aia kia koe e, E tama, e aere atu koe ki runga atu: e teitei atura koe ki mua i te aroaro o te aronga e noo katoa i te kaingakai ra.

11 Ko tei akateitei iaia uaorai, ka taakaakaia ïa; e tei taakaaka iaia uaorai, ka akateiteiia ïa.

12 Kua karanga atura aia kiaia i tuatua mai iaia ra, Kia akatupu koe i te kaingakai avatea, e te kaingakai aiai, auraka e tiki atu i toou au oa ra, e toou au taeake, e toou kopu-tangata, e te aronga tangata tupu apinga nui ra; ko te tiki katoa mai aea ratou ia koe, ka tutakiia mai aea koe.

13 Kia akatupu ra koe i te pokai, ko te tangata rikiriki te tiki atu, ko te rima motu ra, ko te pirikoki, ko te matapo:

14 E e ao toou i reira, kare oki a ratou kia tutaki mai ia koe: e tutakiia mai oki koe kia tae ki te tuakaouanga o te aronga tuatua-tika.

15 Kua na ko maira tetai i taua au manuiri ra, i akarongo mai i taua tuatua ra, kiaia, E ao tona to te kai i te manga i te basileia o te Atua ra.

16 Kua karanga atura aia kiaia, E kaingakai maata ta tetai tangata, e kua karanga atura aia ki te tangata e manganui.

17 E tae akera ki te ora e kai ei ra, kua tono atura i tona tavini e tiki i taua aronga i tuatuaia ra, e karanga atu, E aere mai, kua vave te kai, kare e ape toe.

18 Kua kotoe ua atura ratou ravarai. Na ko maira tetai, I oko ana au i tetai kainga, e aere ana au e atoro e tikaʼi; kia tukuia au e koe.

19 Kua tuatua maira tetai, I oko ana au i te puakatoro e rima zugo, e te aere nei au e timata; kia tukuia au e koe.

20 Kua tuatua maira tetai, I akaipoipo ana au i te vaine, kare oki au e tika kia aere.

21 E kia oki maira taua tavini ra, kua akakite maira ki tona pu i taua au tuatua ra. Riri akera te pu o te are, kua karanga atura ki tona tavini, E aere viviki ki te au arataa, e te au mataara, i te oire nei, e arataki mai i te tangata rikiriki, e te rima motu, e te pirikoki, e te matapo.

22 Kua tuatua maira taua tavini ra, E te atu, kua oti akenei taau i akaue mai nei, e te atea ua nei rai.

23 Kua karanga atura taua pu ra ki te tavini, E aere koe i runga i te au ara tiroa e te au pae koro ra, e unuunumou tika atu ei ki te tangata kia aere mai, kia ki rava toku are.

24 E akakite atu oki au kia kotou, Kare rava tetai, i taua aronga i tuatuaia ra, e kai iti ua ake i taku nei kaingakai.

25 E urupu maata tei aru aere mai iaia: e kua ariu maira aia, kua tuatua maira kia ratou,

26 Ko te tangata e aere mai kiaku nei, e kare i akaruke i tona metua tane, e tona metua vaine, e tana vaine, e tana au tamariki, e tona au taeake, e tona au tuaine, e tona katoa uaorai ora, kare aia e riro ei pipi naku.

27 E te kore e apai i tona uaorai satauro, ka aru mai ei iaku, kare aia e riro ei pipi naku.

28 Koai ïa tangata i o kotou na, kia akakoro i te are e akatu, kare e timata ana i te noo ki raro, ka tatau ei i te apinga ei ou e oti ei, i te rava anga tona apinga?

29 Ko te tamou aea aia i te tango ki raro, e kare akera i oti iaia, e riro oki te aronga i akara ra i te aviri mai iaia,

30 Na ko maira, I timata io nei teianei tangata i te akatu i te are, e kare akenei i oti iaia.

31 E koai oki ïa ariki kia aere aia e tamaki atu ki tetai ariki, kare e noo ana ki raro, ka akaeatu marie ei i te tika anga iaia e tona aronga tangata okotai ngauru i te tausani, kia aravei ua atu aia i tetai e tiki e tamaki iaia ra, ma tona au tangata e rua ngauru i te tausani?

32 E kare ra, e vaio atea tetai, ka tono atu ei i te karere e pati atu i te au.

33 Koia katoa oki kotou, ko tei kore i akaruke i te au mea katoa nana ra, kare aia e riro ei pipi naku.

34 E mea meitaki te tai, kia riro ra te tai ei mea mangaro, eaa atura te mea e taitai ei?

35 Kare e meitaki i te one, kare oki i te taruta teita; e akaruke ravaia ra. E taringa tona ei akarongo ra, e akarongo aia.