Luka
4 KUA oki mairā Iesu mei Ioridana mai, ma te ki i te Vaerua Tapu, e aratakiia aia e te Vaerua ki te medebara;
2 E a ngauru akera rā i te timata angaia e te diabolo. Kare rai aia i kai i te manga i taua au rā katoa ra: e ope akera, pongi iora aia.
3 E kua tuatua maira te diabolo kiaia, E Tamaiti koe na te Atua ra, ka karanga atu koe ki teianei toka kia riro ei kai.
4 Kua karanga aturā Iesu kiaia, na ko atura, Kua tataia oki, “Kare o te manga anake ra te mea e oraʼi te tangata nei, ko te au tuatua katoa a te Atua ra.”
5 Kua arataki atura te diabolo iaia ki runga i tetai maunga teitei, e kua akakite maira kiaia i te au basileia katoa o te ao nei, i te kamoanga mata nei.
6 Kua tuatua maira te diabolo kiaia, E oronga atu au i te au, e te inuinu i teianei pa enua, kia koe na; kua tukuia mai oki kiaku, e naku e oronga atu na taku tangata e inangaro.
7 E teianei kia tika ia koe i te akamori mai iaku, noou anake ïa.
8 Kua karanga aturā Iesu kiaia, na ko atura, E aere ke atu koe, e Satani; kua tataia oki e, “Ko toou Atua ra ko Iehova taau e akamori, e koia anake rai taau e akarongo.”
9 E kua arataki atura aia iaia ki Ierusalema, e kua tuku atura iaia ki rungao i te poretiko o te iero, e kua karanga atura kiaia, E Tamaiti koe na te Atua ra, akatopa atu koe ia koe uaorai ki raro i teianei ngai;
10 Kua oti oki i te tataia e, “Ka ikuiku aia i tana au angela ia koe, ei tiaki ia koe;”
11 “Ka mou oki ratou ia koe i to ratou rima, ko te tukia ua atu aea to vaevae ki te toka.”
12 Kua karanga aturā Iesu kiaia, na ko atura, Kua tuatuaia mai e, “Auraka koe e akakoko atu i toou Atua ra ia Iehova.”
13 E ope akera ta te diabolo timata anga, aere ke atura aia, akaruke maira iaia i tetai tuatau iti.
14 Kua oki mairā Iesu ki Galilea ma te mana o te Vaerua: tutuki akera tona rongo e kako rava akera taua enua ra. 15 Apii atura aia ki roto i to ratou au sunago ma te akakakā katoatoaia.
16 E tae maira aia ki Nazareta i te ngai i pakari ei aia ra; kua tomo maira aia ki roto i te sunago i te rā sabati, tana ïa peu tikai, e kua tu akera ki runga e tatau i te tuatua.
17 Kua tuku maira ratou i te buka a te peroveta ra a Isaia ki tona rima, e kia eeu akera aia i taua buka ra, kite iora aia i te ngai i tataia ra,
18 “Tei rungao iaku te Vaerua o te Atu, koia i akatainu mai iaku ei tutu aere i te evangelia i te tangata rikiriki; kua tono mai iaku e akanā i te aronga ngakau aue, ei tutu aere i te ora no te aronga tuikaa, kia akara akaou te matapo, e e tuku oki i te aronga i tapekaia ra,
19 Ei tutu aere i te mataiti inangaro a te Atu ra.”
20 E kokapi akera aia i taua buka ra, kua tuku atura aia ki te tavini ra, kua noo iora ki raro. E kua akara tamou atura te mata o te tangata ravarai i roto i te sunago iaia.
21 Kua akamata atura aia i te tuatua kia ratou, Teianei tuatua i tataia nei, ta kotou i akarongo nei, kua tupu ïa i teianei rā.
22 Kua akatika anake atura ratou iaia, umere atura i te tuatua meitaki no roto mai i tona vaa. Kua karanga iora ratou, Kare aina teia i te tamaiti na Iosepha ra?
23 Kua karanga atura aia kia ratou, E riro kotou i te akaaite mai iaku i te manga tuatua ra e, E te taunga ra, ka akaora ia koe uaorai: ko te angaanga taau i rave i Kaperenauma ra, ta matou i akarongo akenei, e rave katoa koe i ko nei i toou nei enua.
24 Kua na ko atura aia, Koia tika taku e karanga atu kia kotou na, Kare ua te peroveta i kiteia mai i tona uaorai enua tikai.
25 E tuatua-mou ra teia taku e karanga atu kia kotou na, E manganui te vaine takaua i Iseraela i te tuatau ia Elia, ka momaniaʼi te rangi ra, e toru akera mataiti e ono oki marama, ka pini takakoiaʼi taua enua ra e te onge maata;
26 Kare rā Elia i tonokia atu kia ratou ra, mari ra ki tetai vaine takaua i Zarephata i Sidona.
27 E manganui oki te lepera i Iseraela i te tuatau i te peroveta ra ia Elisaia, kare ra tetai o ratou i akaoraia, mari ra ko Naamana no Suria.
28 Tei te akarongo anga ratou i taua tuatua nei, riri rava akera to te sunago katoa.
29 Kua tu akera ratou ki runga, opara atura iaia ki vao i taua oire ra, arataki atura iaia ki te nia o taua maunga i akatuiaʼi to ratou oire ra, e titiri atu iaia ki raro.
30 Aere ke atura ra aia, na rotopu ua atura ia ratou te aere.
31 E tae atura aia ki Kaperenauma, ki tetai oire i Galilea, e apii atura ia ratou i te rā sabati.
32 Umere maira oki ratou i taua apii anga nana ra: te mana ra oki tana tuatua.
33 Tei roto i taua sunago ra tetai tangata, e vaerua demoni viivii tona, kua kapiki ua maira aia ma te reo maata,
34 Na ko maira, Aue, e Iesu o Nazareta e! eaa taau ia matou nei? I aere mai aina koe e ta ia matou? Kua kite au ia koe, ko te Mea Tapu o te Atua ra.
35 Kua kauvae aturā Iesu iaia, na ko atura, Ka muteki, ka aere mai ki vao. Kua titiri iora taua demoni ra iaia ki raro i rotopu ia ratou, aere atura ki vao, kare aia i paruparu.
36 Umere iora ratou ravarai, e kua tuatua iora ratou ratou uaorai, na ko akera, Eaa ra tenana tuatua? te akaue ua nei oki aia i te vaerua viivii nei ma te ririnui e te mana, e te aere nei rotou ki vao!
37 E tutuki atura tona rongo, e pini rava akera taua enua ra.
38 E riro atura aia ki vao i taua sunago ra, tomo atura aia ki roto i te are o Simona: kua mate te metua ongoai vaine o Simona i te vera maata; kua tuatua meitaki maira ratou kiaia, i taua vaine ra.
39 Tu iorā Iesu i rungao iaia, kua kauvae atura i te vera, e peke ke atura: kua tu maira aia ki runga i reira, matuapuru maira ia ratou.
40 E topa atura re rā, e maki tei ko i o ratou ra, kua apai maira kiaia, e manganui te tu; kua akairi atura aia i tona rima ki rungao ia ratou ravarai, akaora atura.
41 E te demoni katoa e manganui aere maira ki vao, ma te kapiki ua, i te na ko anga e, Ko te Mesia koe, te Tamaiti a te Atua. Kua kauvae atura aia ia ratou, auraka ratou e tuatua mai; no te mea kua kite ratou e, ko te Mesia aia.
42 E ao akera, riro ke atura aia ki tetai ngai motutaa: e kua kimi maira taua aronga maata ra iaia, e kitea maira, kua pupuru maira iaia, auraka aia e akaruke ia ratou.
43 Kua karanga atura aia kia ratou, E tutu aere rai au i te evangelia o te basileia o te Atua i te au oire ke atu e tikaʼi; i tonokia mai ei oki au.
44 Kua ako atura oki aia i roto i te au sunago i Galilea.