Ioane

4 E KITE akera te Atu e, kua akakiteia te au Pharisea e, e maata ta Iesu i akariro ei pipi, e tana i bapetizo ra, i ta Ioane;

2 (Kare rā Iesu tikai i bapetizo, na tana au pipi ra:)

3 Akaruke iora aia i Iudea, oki akaou atura ki Galilea.

4 E na Samaria aia i te aere e tikaʼi.

5 E tae atura aia ki tetai oire i Samaria, ko Sikara te ingoa, tei vaitata ra ki te kotinga kainga ta Iakoba i oronga atu no tana tamaiti no Iosepha.

6 Tei reira te ruavai a Iakoba ra: E roiroi akerā Iesu i te aerenga, noo ua iora aia ki te pae o tau ruavai ra; kua tae ki te ono o te ora ra.

7 Kua aere maira tetai vaine Samaria e uti i te vai: kua karanga aturā Iesu kiaia, Ka o mai ana e inu.

8 Kua topa atura oki tana au pipi ki roto i te oire, e oko i te kai.

9 Kua tuatua maira taua vaine Samaria ra kiaia, Eaa ua koe, te ngati Iuda na, i pati mai ei iaku i te vaine Samaria nei i te vai? kare oki te ngati Iuda e tau meitaki i to Samaria.

10 Kua karanga aturā Iesu kiaia, na ko atura, Naringa koe i kite ana i ta te Atua i oronga maira, e tei karanga atu kia koe na e, Ka o mai na e inu; kua pati mai ïa koe iaia, e kua oronga aia i te vai ora naau.

11 Kua tuatua maira taua vaine ra kiaia, E te Atu, kare aau apinga e uti ei, e rua oonu teia; eiea taau vai ora e raukaʼi?

12 E maata ainei koe ia Iakoba i to matou metua, ko tei oronga mai na matou i teianei ruavai, e kua inu aia uaorai, e tana au tamariki, e te au puaka?

13 Kua karanga aturā Iesu, na ko atura kiaia, Ko te inu i tenana vai, ka kaki akaou ïa:

14 Kareka te ka inu i te vai e orongaia atu e au nei, kare rava atura aia e kaki akaou; ka riro ra taua vai e orongaia atu e au nana ra, ei vai pupui ua i roto iaia, e tika i te pupui anga, e tae ua atu ki te ora mutu kore ra.

15 Kua tuatua maira taua vaine ra kiaia, E te Atu, ka o mai ana i taua vai ra naku, kia kore au e kaki akaou, kia kore oki e aere mai i ko nei e uti.

16 Kua karanga aturā Iesu kiaia, Ka aere, ka tiki i to tane, ka oki mai ei.

17 Kua tuatua maira taua vaine ra, na ko maira, Kare aku tane. Kua karanga aturā Iesu kiaia, E tika taau i tuatua maira e, Kare aku tane:

18 Ka toko rima akenei oki aau tane; e tenana taau e moe ana, kare ïa te tane naau: e tuatua-mou taau i tuatua mai nei.

19 Kua tuatua maira taua vaine ra kiaia, E te Atu, e peroveta koe, te kite nei au.

20 I akamori ana to matou ui metua ki runga i teianei maunga; e te karanga nei kotou e, tei Ierusalema te ngai e tikaʼi kia akamori.

21 Kua karanga aturā Iesu kiaia, Ka akarongo mai ana, e maine, kua vaitata te ora e, kare kotou e akamori i te Metua i teianei maunga, e kare rai oki i Ierusalema.

22 Kare kotou i kite i ta kotou e akamori nei: kua kite matou i ta matou e akamori nei: no te ngati Iuda mai oki te ora.

23 Kua vaitata, e teianei oki taua ora ra, e akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra.

24 E Vaerua te Atua, e te aronga e akamori iaia ra, kia akamori ma te vaerua e te tuatua-mou ra e tikaʼi.

25 Kua tuatua maira taua vaine ra kiaia, Kua kite au e, te aere maira te Mesia, ko te Akatainuia ra ïa: kia riro mai aia ra, nana e akakite mai kia matou i te au mea ravarai.

26 Kua karanga aturā Iesu kiaia, Ko au ïa e karanga atu kia koe na.

27 I reira te tae anga mai o tana au pipi, va ua akera ratou, koia i karangaranga atu ki taua vaine ra: kare ua atura tetai i karanga atu e, Eaaa taau e ui ana? eaa koe i karangaranga atu ei kiaia?

28 Vaio ua iora taua vaine ra i tana āriki vai, aere atura ki roto i te oire, e karanga atura ki te tangata.

29 Ka aere mai, ka akara i te tangata i akakite mai kiaku i taku au peu katoa nei; kare ainei tera ake te Mesia?

30 Aere atura ratou kiaia ra, no roto mai i te oire.

31 Kua tuatua na tana au pipi kiaia, kua na ko ana, E Rabi, ka kai.

32 Kua tuatua maira aia kia ratou, E kai taku kia kai, kare ua kotou i kite.

33 Kua tuatua iora te aronga pipi ia ratou uaorai, I apai mai ainei te tangata i te kai nana?

34 Kua tuatua mairā Iesu kia ratou, Teia taku kai, ko te akono i tona anoano, to tei tono mai iaku ra, ma te akaoti i tana angaanga.

35 Kare kotou i karanga e, e a marama toe e mou ei? i na, e karanga atu au kia kotou, Ka akateitei i to kotou mata, ka akara i te au koro ra; kua teatea ïa i teianei kua mou.

36 Te tangata e kokoti ra, e tutaki tana, e kua akaputu i te meitaki no te ora mutu kore: kia rekareka kapipiti, ko te ruru e ko te kokoti.

37 Kua tupu io nei te manga tuatua ra e, Na tetai e ruru, e na tetai ke e kokoti.

38 E tono au ia kotou ei kokoti i tei kore i angaia e kotou na: na etai ke i angaanga, e te akao ua atu nei kotou ki roto i ta ratou angaanga.

39 E manganui maira te tangata no taua oire i Samaria ra i akarongo kiaia, no te tuatua a taua vaine i karanga e, Kua akakite mai aia kiaku i taku au peu katoa ra.

40 E kia riro mai to Samaria kiaia ra, kua tāpu maira ratou iaia e noo ki o ratou ra: kua noo iora aia i reira e po rua.

41 Manganui atura tei akarongo i tana uaorai tuatua;

42 Kua tuatua akera ki taua vaine ra, Kare no te tuatua aau i tuatua maira, i akarongo atu ei matou: kite ua akenei matou iaia uaorai, kua kite atura matou e, ko te ora mou teia o to te ao, ko te Mesia.

43 E po rua akera, aere ke atura aia ki Galilea.

44 I tuatua anā Iesu uaorai e, kare te peroveta e rekaia mai e tona uaorai enua tikai.

45 E tae atura aia ki Galilea, kite meitaki maira to Galilea iaia, i akara na oki ratou i te ravenga tini tana i rave i te oroa i Ierusalema ra: i reira katoa ratou i taua oroa ra.

46 E tae akaou atura oki a Iesu ki Kana i Galilea, i te ngai tana i akariro i te vai ei wina ra. Te mate ra te tamaiti a tetai tangata mana ra i te maki i Kaperenauma.

47 Kite akera aia e kua tae mai a Iesu ki Galilea mei Iudea mai, aere atura aia kiaia ra, pati atura kiaia, kia aere mai aia e akaora i tana tamaiti: kua vaitata oki aia i te mate.

48 Kua tuatua mairā Iesu kiaia, Kia kore kotou e kite i te akairo ma te piri ra, kare ua kotou e akarongo.

49 Kua karanga atura taua tangata mana ra, E taku Atu, aere mai ka aere, ka mate aea taku tamaiti.

50 Kua tuatua mairā Iesu kiaia, Ka aere i toou aerenga; kua ora to tamaiti. Akarongo ua atura taua tangata ra i te tuatua a Iesu i tuatua maira, aere atura i tona aerenga.

51 E te oki atura aia ra, kua aravei maira tona au tavini iaia, kua tuatua maira, ka ko maira, Kua ora to tamaiti.

52 Kua ui atura aia ia ratou i te ora i amaru mai ei. Kua tuatua maira ratou kiaia, I nanai i te itu o te ora i peke ei te vera.

53 Kite akera te metua e, ko te ora mou ra ïa i tuatua mai ei a Iesu e, Kua ora to tamaiti: akarongo atura aia, e tona kopu-tangata katoa.

54 Ko te rua ïa i ta Iesu akairo, iaia i oki mai ki Galilea no Iudea mai, i rave ei.