Ioane

9 E TE aere ua ra aia ra, kite atura aia i tetai tangata matapo mei te anau anga mai.

2 Kua ui maira tana au pipi kiaia, na ko maira, E Rabi, naai te ara, nana uaorai aina e na nga matua ainei, i anau matapo mai ei aia?

3 Kua karanga aturā Iesu, Kare to te ara a teianei tangata, e te ara a nga matua ra: no te mea ra, kia kitea te angaanga a te Atua iaia nei.

4 Ka rave au i te angaanga a tei tono mai iaku nei, koi vai ake te ao: te vaitata mai nei oki te po, kare roa e tangata e angaanga i reira.

5 Te noo nei au i te ao nei, ko au te mārama o teianei ao.

6 I akapera aia i te tuatua anga, kua tutua iora i te uavare ki raro i te one, kua oi iora i tona uavare e te vari, kua amo atura i te vari ki te mata o taua tangata matapo ra,

7 Kua karanga atura kiaia, Ka aere, ka orei i te vai paî i Siloama ra, (koia oki Tonokia.) Aere atura aia, orei iora, kua aere maira oki ma te kite.

8 Kua tuatua iora to reira ra, e te aronga i kite iaia i muatangana i te vai matapo anga, Kare ainei teia te tangata i noo ua ma te pati i te apinga ra?

9 Kua tuatua maira tetai aronga, Koia oki teia; kua na ko maira tetai papaki, Mei iaia nei rai te tu; kua tuatua maira aia uaorai, Ko au oku paa ïa.

10 Kua ui atura ratou kiaia, I akapeeaia to mata i pueraʼi?

11 Kua tuatua maira aia, na ko maira, I oiia te vari e tetai tangata ko Iesu te ingoa, e kua amo maira ki toku mata, kua na ko maira kiaku, Ka aere ki te vai paî i Siloama ra, ka orei: aere atura au, orei iora, e kite atura.

12 Kua ui atura ratou kiaia, Teiea taua tangata ra? Kua tuatua maira aia, Kare ua au i kite.

13 Kua arataki atura ratou i te tangata i matapo ana ra ki te au Pharisea ra.

14 E sabati te rā i oi ei a Iesu i te vari, i te akapuera anga i tona mata.

15 Kua ui akaou maira te au Pharisea ra kiaia i te puera anga o tona mata. Kua karanga atura aia kia ratou, I amokia e ia taku mata i te vari, orei iora au, e te kite nei au.

16 Kua na ko akera tetai papaki o taua au Pharisea ra, Kare teia tangata i to te Atua, kare aia i akono i te sabati. Kua na ko akera tetai papaki, Eaa e tikaʼi i te tangata ara kia rave i te akairo mei teianei? Kua mavete iora ratou.

17 Kua ui akaou maira ratou ki taua tangata matapo ra, Eaa taau tuatua kiaia, koia i akapuera i to mata na? Kua karanga atura aia, E peroveta tikai aia.

18 Kare ra te ngati Iuda i akarongo e, e matapo to taua tangata ra, e kua akapueraia oki tona mata, kia tiki ra ratou i nga matua o taua tangata i akapueraia te mata ra.

19 E kua ui atura ratou kia raua, na ko atura, Ko ta korua tamaiti teia, i tuatua ra e, i anau matapo mai aia? eaa oki aia i kite ei i teianei?

20 Kua tuatua maira nga matua nona ra, na ko maira, Kua kite maua, na maua tikai teianei tamaiti, e matapo tikai aia mei te anau anga mai:

21 Kareka ra te mea i kite ei aia i teianei, kare ua maua i kite; me naai i akapuera i tona mata, kare rai maua i kite: kua pakari oki aia; ka ui atu kiaia: nana uaorai e tuatua mai.

22 I akapera atura nga matua nona ra, no te mea te mataku ra raua i te ngati Iuda; kua akatau ana te ngati Iuda i ta ratou tuatua, i te tangata e na ko e, koia te Mesia, ka tuku iaia ki vao i te sunago ra.

23 I karanga atu ei nga matua nona ra, Kua pakari aia; ka ui atu kiaia.

24 Kua karanga akaou atura ratou ki tau tangata matapo ra, na ko atura kiaia, Ka akameitaki i te Atua: kua kite oki matou e, e tangata ara teianei tangata.

25 Kua tuatua maira aia, na ko maira, Kare au i kite e, e tangata ara aina aia: okotai rava aku tuatua i kite, e matapo toku i muatangana, e teianei, te kite nei au.

26 Kua karanga akaou atura ratou kiaia, I aa mai aia ia koe? i akapeea aia i te akapuera anga i to mata?

27 Kua tuatua maira aia, Kua aaki atu na oki au ia kotou; kare kotou i akarongo: eaa ra oki kotou i anoano akaou ei i te akarongo? ei pipi katoa ainei kotou nana?

28 Kua akakino atura ratou iaia, na ko atura, Ko koe tana pipi; kareka matou, e pipi matou na Mose.

29 Kua kite matou e, kua tuatua mai te Atua ia Mose; kareka teianei tangata, kare matou i kite e noea aia.

30 Kua tuatua maira taua tangata ra kia ratou, na ko maira, E mea tu ke oki tena, kare kotou i kite e noea aia, e i na, kua akapuera aia i toku nei mata.

31 Kua kite oki tatou e, kare te Atua e akarongo i te tangata ara: ko te tangata ra e akamori i te Atua, e ko te akono i tona anoano, ko tana ïa e akarongo.

32 Kare akerai i kitea te matapo anau nei i te ora anga i te tangata, mei te akamata anga mai o te enua nei.

33 Naringa teianei tangata kare to te Atua ra, kare rava tana ravenga e tika.

34 Kua karanga atura ratou, na ko atura kiaia, I anau rava mai koe ma te ara, e ka apii mai koe ia matou? Kua tuaru ratou iaia ki vao.

35 E kite akerā Iesu e kua tukuia aia e ratou ki vao; e aravei akera aia iaia, karanga atura kiaia, Kua akarongo koe i te Tamaiti a te Atua?

36 Kua tuatua maira aia, na ko maira, E te Atu, koai aia, kia akarongo atu au iaia?

37 Kua karanga aturā Iesu kiaia, Kua akara oki koe iaia, e koia oki teia e karangaranga atu kia koe nei.

38 Kua tuatua maira aia, E te Atu, kua akarongo au: kua tipapa iora ki raro i mua i tona aroaro.

39 Kua karanga aturā Iesu, I aere mai nei au ki te ao nei kia tupu te tuatua-tau; kia kite te aronga kite kore nei, e kia riro te aronga kite ra, ei matapo.

40 Te akarongo maira tetai aronga Pharisea i reira katoa i taua tuatua ra, e kua tuatua maira kiaia, E matapo katoa ainei matou nei?

41 Kua karanga aturā Iesu, Naringa kotou e matapo ra, kare ïa a kotou e ara: te tuatua maira kotou e, Kua kite matou; te vai ra ïa ta kotou ara.