Angaanga

6 E I taua tuatau ra, kia maata te au pipi ra, kua tupu iora te urutoe a te Eleni ki te Ebera, no te mea kare ta ratou vaine takaua i akonoia i te tuanga apinga i te au rā katoa ra.

2 E kua akaputuputu maira te ngauru ma rua ra i te au pipi katoa e manganui, kua na ko atura, Kare oki te mea tau ia matou kia kopae i te tuatua a te Atua, ka raverave ei i te kaingakai na.

3 E tenana, e te au taeake nei, e kimi io na kotou i e toko itu puke tangata rongo meitaki, e te ki i te Vaerua Tapu, e te karape, i roto ia kotou na, ko ta matou ïa e akono no te reira angaanga.

4 Kareka matou, ei te pure matou auraka e tukumoe, e ei te apii oki i te tuatua.

5 Mareka rava atura taua aronga maata ravarai i te reira tuatua; e kua iki iora ratou ia Setephano, e tangata ki i te Vaerua Tapu e te akarongo, e Philipa, e Porokoro, e Nikanora, e Timona, e Paremena, e Nikolao, e pipi akonoanga ngati Iuda aia no Anetioka;

6 Ko ta ratou ïa i tuku atu ki mua i te aroaro o te au aposetolo ra; e oti akera te pure, kua tuku maira to ratou rima ki rungao ia ratou ra.

7 Tupu atura te tuatua a te Atua; e maata rava atura oki te au pipi i Ierusalema; e manganui oki to te kau taunga i akarongo i te tuatua.

8 E ko Setephano ra, ki akera ïa i te akarongo e te mana, rave atura aia i te mea umere e te akairo maata i rotopu i te tangata.

9 Kua tu maira tetai pae o te sunago i tuatuaia ra e, no te Libetino, e to Kurene, e to Alekanederea, e to Kilikia, e to Asia, i te taumāro anga mai ia Setephano.

10 E kare atura i tika ia ratou kia patoi mai i te pakari e te vaerua i tuatuaʼi aia ra.

11 Kua tiki atura ratou i te tangata ei tuatua e, Kua akarongo matou iaia i te tuatua anga i te tuatua akakino ia Mose e te Atua.

12 E kua taori atura ratou i te tangata, e te aronga pakari, e te au tata tuatua ra; e tei runga rava maira ratou iaia, kua opu maira, kave atura ki te Sunederi ra.

13 E kua tuku atura oki i nga kite pikikaa, ko tei karanga e, Kare teianei tangata i tukumoe i te tuatua mai i te tuatua akakino i teianei ngai-tapu e te ture nei:

14 Kua kite oki matou iaia i te tuatua anga e, ka pou teianei ngai ia Iesu no Nazareta nei, e ka kore oki iaia te peu tini ta Mose i tuku mai kia tatou nei ra.

15 Te tiroi matariki maira taua Sunederi katoa e noo ra kiaia, e akara atura i tona mata mei te mata o te angela ra.