Deuteronomi

2 KUA ariu atura tatou, aere atura tatou ki te medebara e tae atu ei ki te Tai Muramura ra, i ta Iehova i tuatua mai kiaku ra. E roa akera to tatou akapini anga i te maunga ra ko Seira,

2 Kua tuatua mairā Iehova kiaku, na ko maira,

3 Kua roa to kotou akapini anga i teianei maunga, ka ariu ana ki te pae i apatokerau ra.

4 E akaue atu koe i te au tangata na, e na ko atu, Teia kotou ka aere na te pae o to kotou ra ai taeake ko te tamariki a Esau ra, e noo i Seira nei; e ka riro ratou i te mataku mai ia kotou: e tenana, e akono meitaki ana kotou:

5 Auraka e taeko ua atu ia ratou, kare oki au e oronga ua atu i to ratou enua no kotou, e mei te ngai i takaiia e te vaevae te maata; no te mea kua oronga au i te maunga ra ko Seira no Esau ei nooanga.

6 Ko te manga ta kotou e kai ra ka oko ïa kotou ki te moni; e te vai ta kotou e inu ra, ka oko katoa kotou ia ratou ki te moni.

7 Kua akameitaki mai oki to Atua ra ko Iehova ia koe i te au mea katoa i raveia e to rima; kua kite oki aia i toou aerenga na roto i teianei medebara maata: i vaitata rai to Atua ra ko Iehova ia koe, e a akenei ngauru anga i te mataiti; kare akenei koe i ngere ua ake i tetai mea ngiti.

8 Kua aere ke maira tatou, vaoo atura to tatou au taeake i te tamariki a Esau, i noo i Seira ra; e kua na te Araba mai tatou mei Elata, e mei Eziona-gebera mai, kua anga iora tatou na roto i te medebara ra i Moabi.

9 Kua tuatua mairā Iehova kiaku, Auraka e taeko ua atu i to Moabi, auraka e tamaki ua atu ia ratou; kare oki au e oronga ua atu i tetai ngai o to ratou enua noou ei nooanga; no te mea kua oronga oki au ia Ara no te tamariki a Lota ei nooanga.

10 (Te Emi tei noo i reira i muatangana ra, e aronga mamaata e te manganui kia tatau, e te teitei, mei te ngati Anaka ra;

11 Ko tei tuatua katoaia e tangata roangarere mei te ngati Anaka ra, kareka te ngati Moabi ra, e Emi ta ratou ingoa i tapa.

12 Te ngati Hori katoa tei noo i Seira i muatangana ra; tupauia iora ratou e te au tamariki a Esau, kia pou ratou ia ratou i mua i to ratou aroaro, e kua noo iora i o ratou ra, mei ia Iseraela katoa i rave i te enua nona, ta Iehova i oronga mai kia ratou ra.)

13 E tenana, ka tu, ka aere ki tetai pae i teianei kauvai i Zereda nei. Aere maira oki tatou ki tetai pae i taua kauvai ra i Zereda.

14 E te manga tuatau i topa i taua aerenga mai o tatou mei Kadesabarenea mai, e tae rava maira tatou ki teia pae i te kauvai ra ko Zereda, e toru ïa ngauru e varu ara i te mataiti; e ope roa akera taua uki tangata tamaki katoa i roto i te nuku nei i te mate, i ta Iehova i taputou ia ratou ra.

15 Tei runga tikai oki te rima o Iehova ia ratou i te tamate takiri anga ia ratou, i roto i te nuku ra, e pou rava akera ratou.

16 E pou takiri rava akera taua aronga tangata tamaki i rotopu i te tangata nei i te mate,

17 Kua tuatua mairā Iehova kiaku, na ko maira,

18 Akonei koe e aere ei na roto ia Ara ra, i te pae i o Moabi ra:

19 E kia vaitata mai te tamariki a Amona ia koe, auraka e taeko ua atu ia ratou, auraka e rave atu; kare oki au e oronga atu i te enua o te tamariki a Amona ei nooanga noou; no te mea kua oronga au i te reira ei nooanga no te tamariki a Lota ra.

20 (E tangata-roangarere katoa teianei enua i te tuatua anga; e tangata-roangarere tei noo taito ra i reira, kareka te ngati Amona ra, e Zamazumi ta ratou ingoa i tapa.

21 E aronga mamaata e te manganui oki kia tatau ra, e te teitei, mei te ngati Anaka ra; i pou iora ra ratou ia Iehova i mua i to ratou aroaro; tupauia akera ratou ia ratou, e kua noo i o ratou ra:

22 Mei tana oki i rave i te tamariki a Esau ra, i tei noo i Seira ra, iaia i ta i te ngati Hori i mua ia ratou ra; tupauia akera ratou ia ratou i te noo anga i o ratou ra, e tae rava akenei ki teianei rā:

23 E to Avi i noo i Hazerima, e tae ua atura ki Gaza, to Kaphatori mei Kaphatori mai, tei ta ia ratou, e kua noo i o ratou ra.)

24 Ka tu, ka taki aere, ka aere ki tetai pae i te kauvai ra ko Aranona; i na, kua oronga atu au ia Sihona ngati Amori ariki no Hesebona, e tona ra enua, ki toou rima; ka timata ana i te rave, e tamaki atu iaia i te tamaki.

25 Akonei au e timata i te tuku i te mataku ia koe, e te ngarangara ia koe ki runga i te pa enua i raro ake i te rangi katoa nei, ko te kite i toou rongo, e ka rutetetete, e te mamae maata ia koe na.

26 Kua tono atura au i te karere, mei te medebara atu mei Kedemota, kia Sihona ariki o Hesebona ra, ma te au, i te tuatua anga atu e,

27 E aere ana au na toou nei enua; e na te ara tiroa ua au i te aere, kare au e anga ke ua atu ki te pae katau e te pae kaui.

28 E taku kai e kai ra naau e oko mai i te moni, e te vai taku e inu ra, naau e oronga mai ei oko moni; e tuku ua atu koe iaku kia aere ua au na toou nei enua, mei te tuitarere ua;

29 Mei ta te tamariki a Esau i noo i Seira ra, e te ngati Moabi i noo i Ara ra, i akapera mai iaku ra;) e tae ua atu au ki tetai pae Ioridana, ki te enua ta to matou Atua ta Iehova e oronga mai no matou nei.

30 Kare akera te ariki o Hesebona ra ko Sihona i tuku ia tatou kia aere na tona pae: kua akaketaketa atura oki to Atua ra ko Iehova i tona ra vaerua, e kua akamārokiakia i tona ngakau, kia tuku mai aia iaia ki toou rima, mei tei teianei rā.

31 Kua tuatua mairā Iehova kiaku, I na, kua akamata ana au i te oronga atu ia Sihona, e tona enua, kia koe; ka timata ana i te rave e noo i taua enua nona ra.

32 Kua aere mairā Sihona e rave mai ia tatou; koia ma tona tangata katoatoa e tamaki mai ia tatou i Iahaza ra.

33 Kua tuku maira to tatou Atua ra ko Iehova iaia kia tatou nei: e kua ta iora tatou iaia, e tana au tamariki, e tona katoa ra au tangata.

34 Riro maira te au oire ravarai nona ia tatou i reira, e kua tairiiripoti rava atura tatou i te tangata, e te au vaine, e te au tamariki i te au oire katoa ra; kare e korakora toe:

35 Kua rave ra tatou i te au puaka ei apinga na tatou, e te apinga tini o taua au oire i pou ia tatou ra.

36 Mei Aroera mai i te pae o te kauvai ra ko Aranona, e te au oire i te pae o taua kauvai ra, e tae na atura ki Gileada, kare rava tetai oire i ketaketa ia tatou: kua ope roa ake i te tukuia mai e to tatou Atua e Iehova kia tatou nei:

37 Kareka i te enua o te tamariki a Amona ra kare koe i tae ua atu ki reira; e te au ngai katoa i te pae o te kauvai ra ko Iaboka, e te au oire i runga i te maunga ra, e te au ngai katoa oki ta to tatou Atua ta Iehova i tuatua mai e, auraka.