Deuteronomi

29 KO te au tuatua teia i te koreromotu ta Iehova i akaue ia Mose e papau ki te tamariki a Iseraela i te enua ra i Moabi, te taka ra te koreromotu tana i papau atu kia ratou i Horeba ra.

2 Kua karanga aturā Mose kia Iseraela ravarai, e kua na ko atura kia ratou, Kua kite kotou i te au mea katoa ta Iehova i rave ki mua i to kotou mata i te enua ra ko Aiphiti, kia Pharao, e tona au tavini katoa, e tona enua katoatoa ra;

3 I taua au timataanga maata ta toou mata i kite ra, taua au akairo ra, e taua au mea umere mamaata ra:

4 Kare rā Iehova i oronga mai i te ngakau kite, e te mata kite, e te taringa akarongo, kia kotou, e tae ua akenei ki teianei rā.

5 Kua arataki ra au ia kotou na te medebara, e a akenei ngauru anga o te mataiti: kare to kotou au kakau i runga ia kotou i piro, kare oki to tamaka i runga i to vaevae i pe.

6 Kare kotou i kai i te areto; kare oki kotou i inu i te wina, e te kava kona: kia kite kotou e, ko au to kotou Atua ra ko Iehova.

7 E tae maira kotou ki teianei ngai, kua aere mai nā Sihona ariki no Hesebona, e ko Oga ariki no Basana, e aravei ia tatou i te tamaki, e pou iora raua ia tatou:

8 Rave iora tatou i to raua enua, apai atura ei nooanga no te ngati Reubena, e no te ngati Gada, e no te kopu veenga o Manase ra.

9 E tenana, e akono kotou i te au tuatua o teianei koreromotu, e e rave tikai, kia meitaki kotou i te au mea katoa ta kotou e rave ra.

10 Tei mua kotou ravarai i te aroaro o to kotou Atua ra ia Iehova te tu anga i teianei rā; ko te au rangatira o to kotou au kopu, to kotou aronga pakari, e to kotou aronga akava, e te au tangata ravarai o Iseraela nei,

11 Ko ta kotou au tamariki, ta kotou au vaine, e to tangata ke i roto i toou na puakapa, mei te pāpā vaie naau ra e tae ua atu ki te uti vai noou ra;

12 Kia e mai koe ki roto i te koreromotu, koe, e to Atua ra ko Iehova, e ki roto i te taputou nana ta to Atua ta Iehova e taputou ia koe i teianei rā:

13 Kia akatinamou aia ia koe ei tangata nona uaorai i teianei rā, e ei Atua aia noou, tana oki i tuatua mai kia koe, e tana i taputou mai ki to ai metua, kia Aberahama, kia Isaaka, e kia Iakoba.

14 Kare ra ia kotou anake ra taku e papau i teianei koreromotu, e teianei taputou;

15 Ko te tangata katoa ra, ko te tu katoa i roto ia tatou i teianei rā ki mua i te aroaro o to tatou Atua ko Iehova, e te aronga oki kare i roto katoa ia tatou i teianei rā:

16 Kua kite oki kotou i to tatou noo anga i te enua ra i Aiphiti, e i to tatou aere anga mai na roto i te pa enua i topa ia kotou ra;

17 Kua kite oki kotou i ta ratou au mea viivii, e to ratou au idolo, te rakau e te toka, te ario e te auro, i roto ia ratou ra;

18 Ko te vai ua aea tetai tangata, e kare ra, tetai vaine, e tetai kopu-tangata, e tetai kopu, ia kotou, te ariu ke ra tona ngakau i to tatou Atua ra ia Iehova i teianei rā, e oki e akamori i te au atua no taua pa enua ra; ko te vai ua aea tetai tumu e ua i te mea kava e te maramara i roto ia kotou na;

19 E kia akarongo aia i te au tuatua o teianei akakino, kua tuatua koperepere ua iora i roto i tona uaorai ngakau, kua na ko akera, Ka ora rai au, aru ua atu rai au i te anoano o toku ngakau e e kapiti i te konā kava ki te kaki nui ra:

20 Kare ravā Iehova e akaperepere iaia, ka otooto ra to Iehova riri e tona vareae i te reira tangata, e te au taumaa ravarai i tataia i roto i teianei buka, ka vai ïa ki runga iaia, e ka taparaparā Iehova i tona ingoa i raro ake i te rangi nei.

21 E ka akataka ke a Iehova iaia te au kopu ravarai o Iseraela no te kino, kia tau i te au taumaa katoa o te koreromotu i tataia i roto i teianei buka ture:

22 E na tetai uki a muri ake e tuatua, na ta kotou tamariki e tupu i muri ake ia kotou, e na te au tangata ke mei te enua mamao mai, kia akara ratou i te au mate o te enua, e te au maki ta Iehova i tuku ki rungao i te reira ra;

23 I te akakino anga i te enua katoatoa i te teio ka ua e te tai; kare i ruruia te ua, e kare e mea i tupu, kare rava oki e ngangaere i tupu ki rungao; mei te tutuamu anga ia Sodoma, e ia Gomora, ko Adama e ko Zeboima, i ta Iehova i tutuamu i tona riri ka makitakitaʼi ra:

24 Na te pa enua ravarai e tuatua e, Eaa a Iehova i akapera mai ei i teianei enua? eaa teia riri maata i viviki mai ei?

25 Ei reira te tangata e tuatuaʼi e, No te mea kua akaruke ratou i te koreromotu a Iehova a te Atua o to ratou ai metua ra, tana i papau ia ratou, iaia i arataki mai ia ratou mei te enua maira mei Aiphiti:

26 Kua aere oki ratou e kua araara i te au atua ke, e kua akamori ia ratou, e au atua kite koreia e ratou, kare oki aia i o mai no ratou:

27 I otooto ravaʼi to Iehova riri i teianei enua, i apai mai ei aia i te au taumaa ravarai i tataia i roto i teianei buka ki runga i te reira:

28 Uritumu iorā Iehova ia ratou i to ratou enua, ma te makitakita, e te riri, e te otooto anga riri, tuaru atura ia ratou ki te enua ke, mei tei teianei rā.

29 Te tuatua muna ra, tei to tatou Atua ïa tei ia Iehova: ko te tuatua ra i akakiteia mai, na tatou ïa, e ta tatou au tamariki e tuatau ua atu, kia akono tatou i te au tuatua katoa i teianei ture.