Iosua

11 E KITE akera te ariki o Hazora ko Iabina i teianei au mea, kua tono atura i te karere ki te ariki o Madona kia Iobaba, e ki te ariki o Simerona, e te ariki o Akasapha;

2 E te au ariki i noo i te au maunga i te pae i apatokerau ra, e te au ngai mataataa ra i te pae i apatonga i Kinerota ra, e te o katoa ra, e i te enua ra i Dora i te opunga o te rā ra;

3 E te ngati Kanaana katoa i te itinga o te rā e te opunga o te rā, e te ngati Amori, e te ngati Heta, e te Perizi, e te ngati Iebusi i runga i te au maunga ra, e te ngati Hevi i raro ake ia Heremona, i te enua ra ko Mizepe.

4 E tei vao maira ratou, ratou e ta ratou au nuku ravarai, e aronga maata rava, mei te one taatai ra te tu kia tatau, e te oroenua e te kariota e manganui.

5 E uipa katoa maira taua au ariki ra, kua aere maira, kua patia katoa maira i te puakapa i te pae roto i Meroma ra, e tamaki ia Iseraela.

6 E kua tuatua mairā Iehova kia Iosua, Auraka koe e mataku ia ratou; penei apopo, kua tuku katoaia mai ratou e au ki mua i te aroaro o Iseraela ku mate rava; e naau e tipu i te uaua-vaevae o to ratou au oroenua, e ka taʼu i to ratou au kariota ki te ai.

7 Aere aturā Iosua e te au tangata tamaki ravarai ki ona ra e tamaki ia ratou i taua roto ra i Meroma; rave atura ia ratou kare akera i mamia.

8 Kua tuku mairā Iehova ia ratou ki te rima o to Iseraela, kua ta atura ia ratou, e arumaki atura ia ratou e tae ua atura ki Sidona maata, e ki Miserephota-maima, e te pae i te itinga o te rā ra e tae ua atura ki te o ra i Mizepe; e ta iora ïa ia ratou, kare rava akera i akatoeia e ratou.

9 Kua pera oki a Iosua i ta Iehova i tuatua mai kiaia; kua tipu aia i te uauavaevae o to ratou au oroenua, e kua taʼu aia i to ratou au kariota ki te ai.

10 Kua oki aturā Iosua i reira, rave atura ia Hazora, e pou akera, e ta atura i to reira ariki ki te koke; ko te oire maata ra oki ko Hazora i te reira au basileia i muatangana.

11 Ta atura oki ratou i te tangata ravarai i roto ra ki te mata koke, pou takiri rava akera ratou; kare rava tetai i uti i te aʼo ra i vaooia; e kua tutungi aia ia Hazora ki te ai.

12 E te au oire ravarai o taua au ariki ra, e te au ariki katoa no reira ra, ko tei pou rava ïa ia Iosua i te taia ki te mata koke; e pou takiri rava akera ratou iaia, ta te tavini o Iehova ta Mose i akaue maira.

13 Kareka te au oire turanga tuaivi ra, kare Iseraela i tutungi i te reira, mari ra ko Hazora tei tutungiia e Iosua ra.

14 E te apinga tini ravarai o taua au oire ra, e te au puaka, i raveia ïa e te tamariki a Iseraela ei apinga na ratou uaorai; kareka te tangata katoa ra i taia ïa e ratou ki te mata koke, e pou rava akera ïa ia ratou, kare rava tetai i uti i te aʼo ra i vaooia e ratou.

15 Ko ta Iehova i akaue mai ki tona tavini ra kia Mose, ko ta Mose ïa i akaue mai kia Iosua, e kua pera katoā Iosua; kare rava e mea i vaooia e ia ta Iehova i akaue ia Mose.

16 Rauka iora taua enua katoa ra ia Iosua, koia te enua tuaivi, e to te pae katoa i apatonga ra, e te enua katoa ra ko Gosena, e te o, e te Araba, e te au maunga o Iseraela, e te o katoa i reira;

17  ei te maunga maira ko Halaka tei tae roa ki Seira, e tae rava akera ki Baalagada, i te o i Lebanona ra, i raro ake i te maunga ra ko Heremona: e to ratou au ariki, pou iora ïa iaia, ta iora ia ratou e mate rava akera.

18 E tamaki anga roa ta Iosua i taua au ariki katoa ra.

19 Kare rava tetai oire i akamoe mai i te au i te tamariki a Iseraela, mari ra ko te ngati Hevi, ko to Gibeona; ko te au oire katoa ra i rauka tamaki ïa ra.

20 No ko ia Iehova i māro ei to ratou ngakau kia aravei ia Iseraela i te tamaki, kia ou takiri rava ratou; kia kore ratou e akaperepereia, kia tairipoti rava ra aia ia ratou; ta Iehova oki i akaue mai ia Mose ra.

21 I reira ta Iosua rave anga i te ngati Anake i runga i te au maunga, to Heberona, e to Debira, e to Anaba, e to te au maunga katoa o Iuda ra, e to te au maunga katoa o Iseraela ra; taitaipakoko rava aturā Iosua ia ratou, e to ratou katoa ra au oire.

22 Kare rava e ngati Anaka i toe i te enuā o te tamariki a Iseraela: i Gaza anake ra te toe anga, e i Gata, e i Asedoda oki.

23 Rauka iora taua enua katoa ra ia Iosua, mei ta Iehova oki i tuatua mai kia Mose ra; e kua tuku akerā Iosua i te reira ra ei nooanga no te Iseraela, ta ratou katoa ra au tuanga, e ope rava akera i to ratou au kopu. Vaoo ua iora taua enua ra, kore akera te tamaki.