Iosua

4 E OPE takiri rava akera te tangata i te tae ki tetai pae Ioridana ra, kua tuatua mairā Iehova kia Iosua, na ko maira,

2 Ka iki ana i te tangata tino ngauru ma rua no roto i te au tangata nei, okotai kopu okotai tangata e pini ua ake;

3 Ka akaue atu ei kotou ia ratou, e na ko atu, Ka rave ana kotou i te toka kia okotai ngauru ma rua, no rotopu i Ioridana nei, i te ngai i tuia e te vaevae o te kau taunga ma te turori kore ra; ka apai katoaʼi ki te ngai ta kotou e moe i teianei po ka vaoo ei.

4 Kua karanga aturā Iosua ki nga tangata tino ngauru ma rua, ko tana ïa i akono no roto i te tamariki a Iseraela, okotai kopu okotai tangata e pini ua ake:

5 Kua karanga aturā Iosia kia ratou, Ka aere kotou ki tetai pae mai na mua i te aruna a to kotou Atua ra a Iehova, ki rotopu tikai i Ioridana nei, ka rave ei kotou ravarai i te toka ki runga i to kotou pakuivi, kia aite katoa ki te au kopu o te tamariki a Iseraela nei kia tatau ra;

6 Kia riro taua mea nei ei akairo no kotou; kia ui mai ta kotou au tamariki a muri atu, kia tuatua mai e, Eaa teianei au toka?

7 Ei reira kotou ka karanga atu ei kia ratou, I kokotiia te vai nei ko Ioridana i mua i te aruna koreromotu a Iehova ra, ka tae ei na rotopu i Ioridana, i kokotiiaʼi te vai nei ko Ioridana: ei akakite oki teianei au toka ki te tamariki a Iseraela e tuatau ua atu.

8 Kua pera oki te tamariki a Iseraela i ta Iosua i akaue maira; kua rave iora ratou i te toka okotai ngauru ma rua no rotopu i Ioridana, i ta Iehova i tuatua mai kia Iosua ra, kua tau ki te au kopu o te tamariki a Iseraela kia tatau ra, e kua apai katoa ratou i taua au toka ra i ta ratou ngai i moe ra, e tuku iora ki reira.

9 E puke toka oki ta Iosua i akatu i rotopu i Ioridana okotai ngauru ma rua, i te ngai i tuia e te vaevae o te kau taunga ra, ko tei apai i te aruna koreromotu ra; e tei reira rai taua au toka ra e tae rava akenei ki teianei rā.

10 Kua tu ua iora oki te kau taunga i apai i te aruna ra i rotopu i Ioridana, e kia ope rava te au mea katoa i te raveia ta Iehova i akaue mai kia Iosua ra e, e tuatua ki te tangata, i ta Mose i akaue katoa maira kia Iosua. Aere atura te tangata ki tetai pae ma te aere viviki.

11 E ope takiri rava akera te tangata i te tae ki tetai pae, kua aere katoa iora te kau taunga ma te aruna a Iehova ki mua i te aroaro o te tangata ra.

12 E te tamariki a Reubena, e te tamariki a Gada, e te kopu veenga o Manase ra, na mua atura ratou i te tamariki a Iseraela te aere, mei te tangata tamaki, ki tetai pae ra, ta Mose oki i tuatua mai kia ratou ra.

13 E a ngauru anga o te tausani i te tangata ma te taoonga tamaki katoa, tei na mua ia Iehova te aere ki te tamaki anga i te ngai mataataa i Ieriko ra.

14 Kua akamaatā Iehova ia Iosua i taua rā ra ki mua i te mata o Iseraela katoa ra; e mataku iora ratou iaia mei ia ratou i mataku ia Mose ra, e ope rava akera ona puke rā i te ora anga nei.

15 Kua tuatua mairā Iehova kia Iosua, na ko maira,

16 E akaue atu i te kau taunga i apai i te aruna kite ra, e aere mai ratou ki runga mei rotopu mai i Ioridana.

17 Kua karanga aturā Iosua ki taua kau taunga ra, na ko atura, Ka aere mai kotou ki runga nei mei raro mai i Ioridana ra.

18 E tae maira te kau taunga i apai i te aruna koreromotu a Iehova ra ki runga, mei rotopu mai i Ioridana, e takai maira te tapuae o te kau taunga ki runga i te pae, kua oki akaou maira taua vai ra ko Ioridana ki tona ngai tikai, e pani rava atura i runga i tona au nia katoa, mei tei muatangana ra.

19 I te rā okotai ngauru i te marama mua ra to taua au tangata ra tae anga ki runga mei raro mai i Ioridana ra, e kua patia iora i te puakapa i Gilagala i te pae i te itinga o te rā i Ieriko ra.

20 E taua au toka okotai ngauru ma rua, ta ratou i rave mai mei raro mai i Ioridana ra, kua akatu akerā Iosua i te reira i Gilagala ra.

21 Kua karanga atura aia ki te tamariki a Iseraela, na ko atura, Kia ui mai ta kotou au tamariki ki to ratou au metua a muri atu e, Eaa teianei au toka?

22 Ei reira kotou e akakite atu ei ki ta kotou au tamariki, e karanga atu ei, I aere mai Iseraela ki teia pae Ioridana nei na runga i te one marō.

23 Na to kotou Atua oki na Iehova i tamarō i taua vai ra ko Ioridana ki mua ia kotou, e tae ua akera kotou ki tetai pae ra, mei ta to kotou Atua ta Iehova i rave i te Tai Muramura ra, tana i tamarō ki mua ia tatou e tae ua maira tatou ki tetai pae ra:

24 Kia kite to te ao katoa nei i te tu o te marōrō o te rima o Iehova; e kia mataku oki kotou i to kotou Atua ra ia Iehova e tuatau ua atu.