1 Samuela

15 KUA karanga aturā Samuela kia Saula, Kua tono mai a Iehova iaku e akatainu ia koe ei ariki ki rungao i tona tangata ia Iseraela ra; e teianei, e akarongo koe i te reo i te au tuatua a Iehova.

2 Te na ko mairā Iehova Sabaota ra, Te manako nei au i ta Amaleka i rave ia Iseraela nei, tana moetapapa anga iaia i te arataa ra iaia i aere mai mei Aiphiti maira.

3 E tenana, e aere e ta ia Amaleka, e kia pou takiri rava te au mea katoa na ratou ra, auraka rava e akaperepere ia ratou; ka ta katoa ra i te tane, e te vaine, te tamaiti varevare e te kai u, te puakatoro e te mamoe, te kamela e te asini.

4 Kua akaputuputu mairā Saula i te au tangata i Telaima, e kua tatau iora, e rua anere anga i te tausani i te tangata aere ua, e okotai ngauru anga i te tausani i te tangata no Iuda.

5 E kua tae aturā Saula ki tetai oire no Amaleka, e kua moetapapa iora ki raro i te o ra.

6 Kua karanga aturā Saula ki te ngati Keni ra, Aere ke kotou, kia taka ke atu i te ngati Amaleka nei, ko te mate katoa aea kotou e ratou katoa ra iaku; kua takinga-meitaki kotou i te au tamariki ravarai a Iseraela ka aere mai ei ratou mei Aiphiti maira. Aere ke atura te ngati Keni mei roto mai i to Amaleka ra.

7 E ta aturā Saula i to Amaleka mei Havila atu, e tae ua atura koe ki Sura, i anga tika ki Aiphiti ra.

8 E te ariki o to Amaleka ra ko Agaga i opu ora uaia e ia, e kua tairipoti rava atura i te au tangata katoa ki te mata koke.

9 Kua akaora aturā Saula e te au tangata ia Agaga, e te au mamoe memeitaki, e te au puakatoro, e te au puaka a meitaki akera, e te au punua mamoe; et e au mea memeitaki katoa ra, kare ïa i akapou rava i te reira: ko te au mea kino katoa ra, e te puapinga kore ra, kua akapou takiri ravaia ïa.

10 Kua tae maira te tuatua a Iehova kia Samuela i reira, na ko maira,

11 Kua tataraara akenei au, ko au i akaariki ia Saula: kua anga ke oki aia i te aru anga mai iaku, kare aia i rave i taku i akaue atu iaia ra. Iriea akerā Samuela i taua tuatua ra; e kua kapiki atura aia kia Iehova e ao ua akera te po.

12 E tu akerā Samuela ki runga e aere e aravei ia Saula i te popongi roa; e akakiteia mairā Samuela, i tuatuaia mai, I aere mai a Saula ki Karamela, e i na, kua akatu aia i tetai akairo nona uaorai, e mei reira oki ariu atura, aere atura ki Gilagala.

13 Aere aturā Samuela kia Saula ra; e kua tuatua mairā Saula kiaia, Kia ora koe ia Iehova: kua rave au i ta Iehova i akaue maira.

14 Kua karanga aturā Samuela, Eaa ra oki teianei kakina anga mamoe, e te ngunguru anga puakatoro, taku e rongo nei?

15 Kua karanga aturā Saula, E me araveia mai e ratou no ko i te ngati Amaleka; kua voo oki te au tangat anei i te au mamoe memeitaki, e te au puakatoro ra, ei atinga na to Atua ra na Iehova; e tetai papaki ra kua pou takiri rava ïa ia matou.

16 Kua karanga aturā Samuela kia Saula, Arika na, e akakite atu au kia koe i ta Iehova i tuatua mai kiaku i teianei po. Kua karanga maira aia kiaia, Ka tuatua mai.

17 Kua karanga aturā Samuela, Kare aina i to akaaka anga ra, i toou uaorai akara anga, i akariroiaʼi koe no rungao i te au kopu o Iseraela nei? e i akatainu a Iehova ia koe ei ariki ki rungao ia Iseraela?

18 E na Iehova koe i tono i toou ra tere, e kua tuatua maira, Ka aere, ka ta i tera ra aronga rave ara i to Amaleka ra, e kia pou takiri rava, ka tamaki atu ei ia ratou e kia ope rava atu ratou ra.

19 Eaa oki i kore ei koe i akarongo i te tuatua a Iehova, i oro atu ei ki runga i te apinga ra, e kua rave i te mea kino ki mua i te aroaro o Iehova?

20 Kua tuatua mairā Saula kia Samuela, Koia ïa, kua akamako au i te reo o Iehova, e kua aere ua na te ara i tokokiaʼi au e Iehova ra, kua taoi mai au i te ariki o to Amaleka ra, ia Agaga, e kua akapou takiri rava i to Amaleka.

21 Kua rave ra te au tangata i te apinga, te au mamoe, e te au puakatoro, te au apinga memeitaki ra, tei akonoia e e akapou, ei atinga na to Atua ra na Iehovaj i Gilagala ra.

22 E kua karanga aturā Samuela, Tei te atinga karakaratio e te atinga ta Iehova i pingapingareka, mei tei te akarongo i te tuatua a Iehova ra? I na, e meitaki maata tei te akono i tei te atinga, e meitaki maata tei te akarongo i tei te tongaua mamoe ra.

23 Kua aite katoa te meameaau ki te ara ra ki te purepure, e te māro ki te kino e te akamori idolo ra. E tenana, kua akaruke koe i te tuatua a Iehova ra, kua akaruke katoa aia ia koe, auraka koe ei ariki.

24 Kua tuatua mairā Saula kia Samuela, Kua ara au: kua tatipake au i te akauenga a Iehova, e te au tuatua naau ra: ko au i mataku i te au tangata ra, e kua akarongo i ta ratou tuatua.

25 E teianei, teia taku tuatau kia koe, e akakore mai koe i taua ara naku nei, e oki katoa taua, kia akamori ra au ia Iehova.

26 Kua karanga aturā Samuela kia Saula, Kare au e oki ki toou tere: kua akaruke oki koe i te tuatua a Iehova, e kua akaruke a Iehova ia koe, auraka koe ei ariki i rungao ia Iseraela ra.

27 E tei te ariu angā Samuela e aere ra, kua rave iora aia i tona tapa kakau, e kua ngaae ra.

28 Kua karanga aturā Samuela kiaia, Kua aeae keia mai e Iehova te basileia o Iseraela ia koe i teianei rā, e kua orongaia e ia ki tetai tangata tupu i o ou ra ko tei meitaki ïa ia koe ra.

29 Kare oki te Maroiroi o Iseraela e pikikaa, kare oki e tataraara; kare oki aia i te tangata ka tataraaraʼi aia.

30 Kua tuatua mairai aia, Kua ara au: teia ra taku tuatua kia koe, kia akangateiteiia ana au e koe ki mua i te aronga pakari o toku au tangata nei, e ki mua i to Iseraela nei, e oki katoa taua kia akamori au i to Atua ra ia Iehova.

31 Kua oki aturā Samuela raua katoa ko Saula: e kua akamori aturā Saula ia Iehova.

32 E kua karanga aturā Samuela, Ka arataki mai kotou i te ariki o to Amaleka ia Agaga kiaku nei. E kua aere akaieie ua mairā Agaga. Kua tuatua akera oki a Agaga, Kua kore tika akenei te kavangu o te mate.

33 Kua karanga aturā Samuela, Mei te au vaine i akangereia i te tamariki e te koke naau ra, koia katoa to metua vaine i roto i te au vaine katoa ra e ngere katoa ïa i te tamariki. E kua tipupu iorā Samuela ia Agaga e motumotu taka ke atura i Gilagala, ki mua i te aroaro o Iehova.

34 Kua oki mairā Samuela ki Rama, aere atura oki a Saula ki tona uaorai ngutuare i Gibea i o Saula ra.

35 E kare ravā Samuela i akara akaou mai ia Saula e tae ua atura ki te rā i mate ei aia ra; kua aue rā Samuela ia Saula: kua tataraara rā Iehova i te mea kua akaariki aia ia Saula ei ariki no Iseraela.