1 Samuela

4 TAE maira te tuatua a Samuela ki Iseraela katoa ra. Aere atura Iseraela e tamaki i te Philiseti, e kua patia iora i te puakapa i Ebenezera: e kua patia iora te Philiseti i te puakapa i Apheka.

2 Kua akanoo iora te Philiseti i ta ratou tamaki ia Iseraela; e araveitu akera ratou i te tamaki ra; pou akera Iseraela ki mua i te aroaro o te Philiseti; mate iora e a katoa paa tausani ia ratou i taua tamaki anga ra.

3 E tae maira te tangata ki te puakapa ra, kua tuatua akera te aronga pakari i Iseraela ra, Eaa ra oki tatou i tataʼi e Iehova ki mua i te aroaro o te Philiseti i teianei rā? E tiki tatou i te aruna koreromotu a Iehova i Silo ra, e apai mai i ko nei ia tatou nei, kia na rotopu ia tatou nei, ei akaora ia tatou i te rima o to tatou au enemi.

4 Kua tono akera te au tangata i te karere i Silo, e apai mai i te aruna koreromotu a Iehova Sabaota ra, e noo i rotopu i nga kerubi ra: i reira katoa nga tamariki a Eli ra, ko Hophini raua ko Phinehaza, e taua aruna koreromotu a te Atua katoa ra.

5 E tae atura te aruna koreromotu a Iehova ki roto i te puakapa ra, kua maeva iora Iseraela katoatoa, e maeva maata, keukeu atura te enua.

6 E kite akera te Philiseti i te aruruanga o taua maeva ra, kua tuatua akera ratou, Eaa ra teianei maeva maata e maoro i te puakapa o te ngati Ebera ra? Kite akera ratou e, kua tae mai te aruna a Iehova i roto i te puakapa ra.

7 Mataku iora te Philiseti, e kua tuatua akera oki ratou, E Atua tei aere mai ki roto i taua puakapa ra. E kua tuatua akera oki ratou, Aue oki tatou nei e! kare rai teia mei muatangana roa mai.

8 Aue oki tatou e! ka ora tatou iaai i te rima o te ra au atua mana? Ko te au atua ïa i ta i to Aiphiti i taua au maki-mate katoa i te medebara ra.

9 E akamaroiroi, e akatangata tikai, e te Philiseti e, kia kore kotou e riro ei ao na te ngati Ebera, mei ia ratou i riro ei ao na kotou ra: e akatangata tikai, e tamaki.

10 Kua tamaki maira te Philiseti, e eke iora Iseraela, oro iora te tangata ravarai ki to ratou ngutuare: e maata ua atu taua pou ra: e toru oki ngauru anga o te tausani to Iseraela au tangata aere ua i mate ra.

11 Riro atura oki te aruna a te Atua; e nga tamariki a Eli ra, ko Hophini raua ko Phinehaza, kua taia.

12 Kua oro maira tetai tangata no te ngati Beniamina mei te nuku maira, e tae maira ki Silo i taua rā ra, kua aaeia ona kakau, e ma te one ki runga i te mimiti nona ra.

13 E tae maira aia, e i na, te noo rā Eli ki runga i tetai nooanga i te pae arataa ra, te tiaki ra i te tuatua: te kurukuru ra oki tona ate i te aruna a te Atua. E tae maira taua tangata ra ki roto i te oire ma taua tuatua ra, kua pukaoa ua atura to te oire katoa ra.

14 E kite akerā Eli i te pukaoa anga o te aue ra, kua tuatua akera aia, Eaa teia maoro e tu te kaunga nei a te tangata? Kua aere viviki maira taua tangata ra ki roto, e kua akakite maira kia Eli.

15 Ka iva akera ngauru anga to Eli mataiti e varu oki ara; kua avarevare oki tona mata, kare e kite kia akara.

16 Kua tuatua maira taua tangata ra kia Eli, Mei te nuku mai au, i oro mai nei au mei roto mai i te nuku i teianei rā. Kua karanga atura aia, Eaa te tuatua, e taku tamaiti?

17 Kua tuatua maira taua tangata ra, na ko maira, Kua ati Iseraela ki mua i te aroaro o te Philiseti; e pou maata oki to tatou, kua mate oki o puke tamariki ra ko Hophini e ko Phinehaza, e kua riro oki te aruna a te Atua.

18 E tei te akaiki anga aia i te aruna a te Atua ra, inga tiraa atura aia ki raro mei runga mai i taua nooanga ra, i te pae ngutupa ra, aati iora tona kaki, e mate rava akera: e tangata ruaine oki aia, e te teimaa. Ka a akera ona ngauru anga i te mataiti i te akava anga ia Iseraela ra.

19 Kua nui tana unonga te vaine a Phinehaza, e kua vaitata i te anu: e kite akera aia i te tuatua e, kua riro te aruna a te Atua, e kua mate tona metua ongai, e tana tane katoa, rokoia iora aia e te anau; mamae iora oki aia.

20 E vaitata akera aia i te mate, kua karanga atura te au vaine i vaitata iaia ra, Auraka e mataku; e tamaiti taau kua anau. Kare ra aia i ki mai, e kare oki i akono ua mai.

21 Tapa iora aia i taua tamaiti ra ia Ikaboda, na ko akera, Kua kore te kakā ia Iseraela nei: no te mea kua riro te aruna a te Atua, e no te metua ongoai, e no te tane nana.

22 Kua tuatua akera oki aia, Kua kore te kakā ia Iseraela nei: kua riro oki te aruna a te Atua.