Ieremia

22 KUA na ko mairā Iehova, Aere ki raro ki te are o te ariki o Iuda, ka karanga atu ei koe i teianei tuatua ki reira, Ka na ko atu ei,

2 E akarongo mai i te tuatua a Iehova, e te ariki o Iuda e, tei noo ki runga i te terono o Davida, ko koe, e to au tavini, e to au tangata, tei na teianei au ngutupa i te tomo ra:

3 Te na ko mairā Iehova, Ka rave ana i te tuatua-tau, e te tuatua-tika, ka akaora atu i tei pou i te āru i te rima o te takinga-kino; e te tangata ke, e te matiroeroe, e te vaine takaua, auraka e takinga-kinoia atu, auraka oki te toto ara kore kia maringi i teianei ngai.

4 Kia rave tikai oki kotou i teianei tuatua, e ui ariki te ka tomo na roto i te au ngutupa o teianei are, e te noo anga ki runga i te terono o Davida, e te oro anga na runga i te au kariota, e i runga i te au oroenua, koia ma tona katoa ra au tavini, e tona katoa ra au tangata.

5 Kia kore ra kotou e akarongo mai i teianei au tuatua, te tuatua mairā Iehova, kua taputou au iaku uaorai, e riro tikai teianei are i te tanea.

6 Te na ko maira oki a Iehova, i te are o te ariki o Iuda ra, Ko Gileada koe iaku nei, te upoko o Lebanona ra; e akariro tikaia ra koe e au ei medebara, ei au oire noo koreia.

7 E naku e akonokono atu i te akapou ia koe ra, ko te tangata ravarai ma tana taoonga; e na ratou e tipu i te au arezi inangaro naau ra, e uri atu oki ki roto i te ai.

8 E manganui te enua te ka aere na vaitatao i teianei oire, ma te tuatua te tangata ravarai ki tona tangata tupu, Eaa i peraʼi Iehova i te rave i teianei oire maata?

9 Ei reira ratou e karangaia atu ei, No te mea, kua akaruke ratou i te koreromotu a to ratou Atua, a Iehova, e kua akamori i te au atua ke, e kua tavini atura ia ratou.

10 Auraka kotou e aue ki tei mate ra, auraka e tangi iaia: kia maata ra te aue i tei riro ke ra: kare oki aia e oki akaou mai, e te enua i anau ei aia ra, kare ïa e kite.

11 Te na ko maira oki a Iehova ia Saluma, i te tamaiti a Iosia, ariki no Iuda ra, ko tei riro iaia te au ei tupau i tona metua, ia Iosia ra, ko tei riro atu mei ko nei atu; Kare aia e oki akaou mai ki ku nei.

12 Taua ngai ra i arataki tuikaaia atu ei aia e ratou ra, ei reira aia e mate ei, kare aia e kite akaou mai i teianei enua.

13 Aue tona, to tei akatu i tona are ma te tuatua-tika kore, e tona au pia ki runga ra ma te tau kore, ko tei akaue i tona tangata tupu kia rave ua i te angaanga, kare e oko, kare oki e tutaki atu iaia i tana angaanga;

14 Ko tei karanga e, E akatu atu i tetai are maata noku uaorai, e te au pia pararauare i runga; e te tarai anga i te māramārama nona uaorai, e te akaapapa anga ki runga ki te arezi, e te amo anga ki te muramura.

15 E noo ariki ua rai ainei koe, ko koe i noinoi i te arezi? kare ainei toou metua i kaikai, e i inu oki, e kua rave i te tuatua-tau, e te tuatua-tika? Meitaki atura oki aia i reira;

16 Kua akatika aia i te tuatua a te aronga ao, e tei putaua ra, meitaki akera ïa i reira: kare ainei teia te kite mai iaku ra? te tuatua mairā Iehova,

17 Kareka oou mata, e toou ngakau, tei runga anake ïa i te au mea i noinoiia e koe ra, e tei runga rai i te toto ara kore kia maringi, e tei runga i te āru, kia raveia.

18 I na ko mai ei a Iehova kia Iehoiakima, i te tamaiti a Iosia, ariki o Iuda, Kare ratou e aue iaia, i te na ko anga e, Aue, e taku taeake! Aue, e taku tuaine e! kare oki ratou e aue iaia, i te na ko anga e, Aue, e te pu e! Aue tona manea e!

19 Mei te tanu anga i te asini tona tanumanga, e kika uaia, e akarukeia atu ki vao mai i te au ngutupa o Ierusalema.

20 Ka aere ki runga ki Lebanona, ka kapiti uaʼi; e ei runga ia Basana, akateitei ei i to reo, ka kapiki ua atu ei ki runga ia Abarima: te aronga katoa i inangaro mai ia koe ra, kua pou anake ïa.

21 Kua karanga atu oki au ia koe i to meitaki anga ra, kua tuatua maira koe, Kare au e akarongo atu. Ko toou ïa tu rai mei toou ou anga mai, kare oki koe i akarongo mai i toku reo.

22 E pou to au tiaki katoa i te matangi, e te aronga i inangaro mai ia koe ra, e riro keia ïa ei tuikaa; ei reira tikai koe e akamaʼi, e e aringaringaʼi oki, i toou au kino katoa.

23 E to Lebanona e, ko tei anga i to koanga ki roto i te au arezi ra, kare ra e tangi ia koe kia rokoia mai koe e te mamae, e mamae mei to te vaine anau ra.

24 Te tuatua mairā Iehova, Te ora nei au ra, riro ua a Konia, te tamaiti a Iehoiakima, ariki no Iuda, ei akairo ki runga i toku rima katau, e kiritiia koe e au i reira;

25 E e oronga atu au ia koe ki te rima o te aronga i kimi mai ia koe kia mate, e te rima katoa o te aronga no ratou te mata taau e mataku ra; i te rima oki o te ariki o Babulonia ko Nebukanesa ra, e te rima katoa o te Kaledea.

26 E titiri ke atu au ia koe, e to metua vaine nana koe i anau ra, ki tetai enua ke, kare kotou i anau i reira; e ei reira kotou e mate ei.

27 Kareka te enua ta ratou i inangaro kia oki maira, kare ratou e oki mai ki reira.

28 E āriki ngaangaa ainei, e te akaviiviia, teianei tangata ko Konia? e e āriki inangaro koreia ainei aia? eaa ra oki ratou i titiri keiaʼi, koia e tona uanga katoa ra, e kua uriia ki runga i te enua kare i kitea e ratou?

29 E te enua e! e te enua e! e te enua e! e akarongo mai i te tuatua a Iehova.

30 Te na ko mairā Iehova, E tata kotou i teianei tangata, ei anau tama kore, ei tangata kare e manuia i tona ra au rā: kare rava oki tona uanga e manuia, ma te noo ki runga i te terono o Davida, e te tutara akaou anga ki runga ia Iuda.