Deuteronomi
14 E TAMARIKI kotou na to kotou Atua ra na Iehova; auraka kotou e kotikoti ia kotou, e auraka oki e mangore i to kotou rae i te tangata kia mate ra.
2 E aronga tapu oki koe no to Atua ra no Iehova, e kua iki a Iehova ia kotou no roto i te au iti-tangata ravarai o te ao nei, ei iti-tangata tikai nona uaorai.
3 Auraka rava koe e kai i te mea viivii.
4 Teia te au puaka e tika ia kotou kia kai ra: ko te puakatoro, te mamoe, e te puaka-nio,
5 Te aili, e te zabi, e te kemura, e te puaka-nio taetaevao, e te disona, e te teo, e te zemera.
6 E te au puaka maikuku ngaa katoa, e ngaa rua ua te maikuku ra, e tei tamaru i te kai, i roto i te au puaka ra, e tika ïa ia kotou kia kai.
7 Teia ra ta kotou e kore e kai no roto i tei tamaru i te kai ra, e tei ngaa te maikuku ra: ko te kamela, e te aranebeta, e te saphana; e tamaru ua oki te reira i te kai, kare ra i ngaa te maikuku; ei mea viivii oki te reira ia kotou.
8 Koia oki te puakamaori, ngaa ua tona maikuku, koia ra kare i tamaru i te kai, ei mea viivii te reira ia kotou: auraka rava kotou e kai i te kiko o te reira, auraka oki e akaatinga ua atu i te reira kia mate ra.
9 Ko to raro i te tai e te vai ra, teia te tika ia kotou kia kai; ko tei peauia, e tei poaia ra, ka kai ïa kotou:
10 Kareka te au ika peau kore, e te poa kore ra, kare e tika ia kotou kia kai; ei mea viivii ïa te reira ia kotou.
11 E kai kotou i te au manu viivii kore ravarai.
12 Teia ra te kore e tika ia kotou kia kai ra: ko te aeto, e te peresa, e te ozeni,
13 E te raa, e te aie, e te daa, i to ratou tu,
14 E te orebi, i to ratou tu,
15 E te ione, e te takemesa, e te sakapha, e te neza, i to ratou tu,
16 E te kusa, e te ianesupha, e te tenesemata,
17 E te kate, e te rakama, e te salaka,
18 E te kasida, e te kotuku, i to ratou tu, e te dukipata, e te moa kirikiri.
19 E te au mea rere katoa e totoro aere ra ei mea viivii ïa ia kotou; auraka te reira e keingaia.
20 Kareka te au manu viivii kore katoa ra, e kai ïa kotou i te reira.
21 Auraka kotou e kai i te mea mate ua ra; e apai koe i te reira na te tangata ke e noo i o ou ra, e nana e kai; e tika oki ia koe kia oko i taua mea ra ki te tangata ke; kareka koe ra, e iti-tangata tapu ïa no to Atua ra no Iehova. Auraka koe e tunu i te punua puakanio i te u o tona tinana.
22 Ei ngauruanga taau e oronga i tei tupu i te enua i taau katoa ra ua i tanu, i tera mataiti, i tera mataiti.
23 E te ngauruanga no taau ra sitona, no taau ra wina, e no taau ra inu, e te anaunga mua i to au puakatoro, e to au mamoe, e kai koe i te reira ki mua i te aroaro o to Atua o Iehova, i te ngai tana e akono ei vairanga no tona ra ingoa; kia apii koe, e kia mataku i toou Atua ra ia Iehova i te au rā katoa ra.
24 Kia mamao ra ia koe taua ngai i akonoia e to Atua ra e Iehova ei vairanga no tona ra ingoa, e kare atura e tika ia koe kia apai i taau ngauruanga, i te mamao oki o taua ngai ra, kia akameitakiia koe e to Atua e Iehova ra;
25 E akariro koe i taua mea ra ei moni i reira, ka rave ei i taua moni ra i to rima, ka aere ei ki te ngai i akonoia e to Atua ra e Iehova:
26 Ka oko ei koe i te au mea katoa taau i anoano ra ki te moni, i te puakatoro ra, e te mamoe ra, e te wina ra, e te kava, e te au mea katoa atu taau e anoano ra; ka kai ei koe ki reira ki mua i te aroaro o to Atua ra o Iehova, e rekarekaʼi koe, ko koe, e to ngutuare ra:
27 E te ngati Levi i noo i o ou ra, auraka koe e akaruke iaia; no te mea kare ana tuanga e te kainga i o ou ra.
28 E kia tae ki te openga o te toru o te mataiti, ka apai mai koe i te ngauruanga ravarai o taau ra apinga i tupu i te reira mataiti, ka akaputuputu ei i roto i toou ra are;
29 E ka aere mai te ngati Levi, no te mea kare ana tuanga e te kainga i o ou ra, e te tangata ke, e te matiroeroe, e te vaine takaua katoa i o ou ra, ka kai e kia merengo: kia meitaki oki koe i to Atua ra ia Iehova i te au angaanga katoa ta to rima e rave na.