Genese
46 KUA aere mairā Iseraela e tona katoa ra, e tae maira ki Bereseba, e kua apai atura i te atinga ki te Atua o tona ra metua o Isaaka.
2 Kua tuatua maira te Atua kia Iseraela i te au orama i te po, na ko maira, E Iakoba e, e Iakoba. Kua karanga atura aia, Teia au.
3 Kua tuatua maira aia, Ko au te Atua, ko te Atua no toou metua ra; auraka e mataku kia aere ki Aiphiti, e akariro oki au ia koe ei iti-tangata maata i reira:
4 E aere katoa oki au ma koe ki raro ki Aiphiti; e ka akaoki mairai au ia koe ki runga nei: e na Iosepha e topiri i to mata na.
5 Kua akaruke iorā Iakoba ia Bereseba: akauta maira te tamariki a Iseraela i to ratou metua ia Iakoba, e ta ratou au tamariki, e ta ratou au vaine, na runga i te au kariota ra ta Pharao i akau ei akauta mai iaia.
6 E kua taoi oki i ta ratou au puaka, e ta ratou au apinga, i rauka ia ratou i te enua i Kanaana ra, e kua aere maira ki Aiphiti: ko Iakoba, ma tona uanga katoa ra:
7 Tana au tamariki tamaroa, e te au utaro tamaroa nana katoa ra, tana au tamariki tamaine, e te au utaro tamaine nana ra, e tona katoa ra uanga, tei arataki katoaia mai ïa e ia ki Aiphiti.
8 Teia oki te ingoa o taua au tamariki a Iseraela ra, tei aere ki Aiphiti ra, ko Iakoba ma tana au tamariki: ko Reubena, ko ta Iakoba ïa tama mua.
9 E ta Reubena au tamariki tamaroa: ko Hanoka ïa, e ko Palu, e ko Hezerona, e ko Karemi.
10 E ta Simeona au tamariki tamaroa; ko Iemuela ïa, e ko Iamina, e ko Ohada, e ko Iakina, e ko Zohara, e ko Saula, e tamaiti na tetai vaine ngati Kanaana ra.
11 E te au tamariki tamaroa a Levi ra: ko Geresona ïa, e ko Kohata, e ko Merari.
12 E te au tamariki tamaroa a Iuda ra; ko Era ïa, e ko Onana, e ko Sela, e ko Phareza, e ko Zara: mate iorā Era e Onana i te enua ra i Kanaana. E ta Phareza puke tamariki tamaroa, ko Hezerona ïa, e ko Hamula.
13 E te au tamariki tamaroa a Isakara ra; ko Tola ïa, e ko Puva, e ko Ioba, e ko Simerona.
14 E te au tamariki tamaroa a Zebuluna ra; ko Sereda ïa, e ko Elona, e ko Ialeela.
15 Ko nga tamariki ïa a Lea ra, ko tana i anau kia Iakoba i Padana-arama ra, e te tamaine nana ra ko Dina: ko tona katoa ra uanga, te tamaroa, e te tamaine, e toru ngauru ratou, e toru ara.
16 E te au tamariki tamaroa a Gada ra; ko Ziphiona ïa, e ko Hagi, e ko Suni, e ko Ezebona, e ko Eri, e ko Arodi, e ko Areli.
17 E te au tamariki tamaroa a Asera ra; ko Iimina ïa, e ko Isua, e ko Isui, e ko Beria, e to ratou tuaine ko Sera: e nga tamariki tamaroa a Beria ra; ko Hebera ïa, e ko Malakiela.
18 Ko ta Zilipa ïa puke tamariki tamaroa, ko tei orongaia e Labana no tana tamaine ra no Lea; tino ngauru ratou ma ono, ko tana ïa i anau kia Iakoba ra.
19 E nga tamariki tamaroa a te vaine a Iakoba ra, a Rahela; ko Iosepha ïa, e ko Beniamina.
20 E anau akera ta Iosepha i te enua ra i Aiphiti, ko Manase ïa, e ko Epheraima, ko ta Asenata ïa, te tamaine a Potiphera taunga i Ono, i anau kiaia ra.
21 E te au tamariki tamaroa a Beniamina; ko Bela ïa, e ko Bekera, e ko Asebela, e ko Gera, e ko Naamana, e ko Ei, e ko Rosi, e ko Mupima, e ko Hupima, e ko Arada.
22 Ko ta Rahela ïa puke tamariki tamaroa, i anau kia Iakoba ra: tino ngauru ma a katoa ratou.
23 E ko ta Dana tamaiti, ko Husima ïa.
24 E ko ta Naphatali au tamariki tamaroa; ko Iazeela ïa, e ko Guni, e ko Iezera, e ko Silema.
25 Ko ta Bila ïa puke tamariki tamaroa, ko tei orongaia e Labana no tana tamaine ra no Rahela; ko tana teia i anau kia Iakoba ra: toko itu ratou.
26 Taua aronga ravarai ra i aere mai ki Aiphiti, ratou katoa, ko Iakoba ma tana i anau ra, auraka nga vaine a te tamariki a Iakoba ra, e no ngauru ratou e ono ara:
27 E nga tamariki a Iosepha i anau i Aiphiti ra, toko rua ïa. Taua aronga katoa no te kopu-tangata o Iakoba i tae ki Aiphiti ra, e itu ïa ngauru anga.
28 Kua tono akera aia ia Iuda i na mua iaia kia Iosepha, kia akateateamamao aia ia Gosena; e kua aere maira ratou ki taua enua ra ki Gosena.
29 Kua akateateamamao iorā Iosepha i te kariota nona, aere atura ki runga kia aravei i tona metua tane ia Iseraela i Gosena; e kua akakite atura kiaia iaia uaorai, e kua takave atura ki runga i tona kaki, aue ua iora ki runga i tona kaki, e e roa akera.
30 Kua tuatua mairā Iseraela kia Iosepha, I teianei kua tika iaku te mate, ko au i kite i to mata na, ko koe e ora na.
31 Kua karanga aturā Iosepha ki tona ai tuakana, e to te ngutuare o tona metua ra, E aere au e akakite kia Pharao ra, e karanga atu kiaia e, Tera ake toku au tuakana, e to te ngutuare o toku metua, i noo i te enua ra i Kanaana ra, kua aere mai ratou ki ko nei kiaku nei:
32 E e tiaki mamoe taua au tangata nei, ko ta ratou ïa taoonga i te angai i te puaka; e kua taki mai ratou i ta ratou au mamoe, e ta ratou au puakatoro, e te au mea katoa na ratou ra.
33 E kia tuatua mai a Pharao kia kotou, e kia ui ma e, Eaa ta kotou taoonga?
34 E karanga atu kotou i reira, Kua mātau toou au tavini nei i te angai puaka, mei to matou mea ngiti anga mai e teia noaʼi, ko matou e to matou au metua katoa; kia noo oki kotou i te enua nei i Gosena; e mea viivii oki te tiaki anana i to Aiphiti.